22

Wala akong pagpipilian.

Kung hindi ko makukuha ang sagot kay Viviana, kailangan kong humanap ng ibang paraan. At ang tanging koneksyon na naiwan ko... ay ang pamilya Illustre.

At si Noelle Katherine mismo ang susi.

Nakaharap ako ngayon kay Detective Alcaraz sa isang tahimik na café. Hindi na ako nag-aksaya ng oras at diretsahan kong sinabi sa kanya ang naisip ko.

"Kailangan kong makalapit kay Noelle."

Tumingin siya sa akin na para bang nababaliw ako. "Anong ibig mong sabihin?"

Huminga ako nang malalim. "Ang pamilya Illustre ay konektado rito. Hindi ko pa alam kung paano, pero may alam sila tungkol sa nanay ko—o kay Celine Lirazan."

"At paano mo gagawin 'yan?" tanong niya, pinagmamasdan ako nang mabuti.

Napakagat ako sa labi. "Kakaibiganin ko siya."

Hindi ako sigurado kung ano ang magiging reaksyon ni Detective Alcaraz, pero ang bumungad sa akin ay isang buntong-hininga na parang nagsasabing hindi siya natutuwa sa plano ko.

"Delikado 'yan, Abigail."

"Mas delikado kung hindi ko gagawin," sagot ko. "Kung hindi ako kikilos, mananatili akong walang alam. Kung gusto kong malaman ang totoo, kailangan kong gawin ang kahit anong paraan para makuha ito."

Saglit siyang nanahimik. "At paano kung madamay ka?"

Nagkibit-balikat ako. "Eh 'di madadamay ako."

Nagtagal pa ang katahimikan bago siya muling nagsalita. "At paano kung maging totoo?"

Nalaglag ang balikat ko. "Ano?"

"Paano kung maging totoo ang pagkakaibigan mo sa kanya?" seryoso niyang tanong. "Kaya mo bang ituloy ang planong 'to kahit dumating sa puntong hindi mo na lang siya ginagamit para sa impormasyon?"

Hindi ko alam kung paano sumagot.

Dahil sa totoo lang... hindi ko pa alam ang sagot.

At sa ngayon, wala akong ibang pagpipilian kundi ituloy ito.

At kung totoo ngang may tinatago ang pamilya ni Noelle... hindi ko na papalampasin ang pagkakataong malaman ang lahat.