14

13:23, 15 June 2025

အပြန်လမ်းခရီးသည် တိတ်ဆိတ်ငြိမ်သက်နေသည်။

အမြန်လမ်းမပေါ် အရှိန်မှန်မှန်ဖြင့် မောင်းနှင်နေပါသော ကားငယ်လေး၏ အငွေ့အသက်သည် ခြောက်ခြားဖွယ်ကောင်းလွန်းလှပါသည် ။ လေထုအတွင်း အေးစက်လှသော ရိုက်ခတ်မှုများသည် ကားတစ်ခုလုံးကို ကြီးစိုးထားပါသည် ။ ထိုသို့ ကြီးစိုးထားခြင်းနှင့်အတူ ကားပေါ်ရှိလူသုံးယောက်၏တိတ်ဆိတ်မှုနှင့် အငွေ့အသက်သည်လည်း မကြာခင် ပေါက်ကွဲတော့မလို မည်သူမျှ စကားမဆိုကြပါချေ ။

လမ်းမဘေးကို ငေးလျက်သာ လိုက်ပါလာခဲ့ပြီး မွန်းကျပ်လွန်းသည့် ခံစားချက်များသည် ပြေးထွက်သွားချင်စရာကောင်းနေလွန်းပါသည် ။ ကားမောင်းသူနှင့်မောင်းသူဘေးရှိ အမျိုးသမီးသည် မှန်မှတစ်ဆင့် သူ့ဆီသို့ တစ်လှည့်စီလှည့်ကြည့်နေကြခြင်းကို သိနေပါသော်လည်း သူ မသိကျိုးနွံပြုလိုက်ပါတော့သည် ။ တစ်ယောက်သောလူ၏ မျက်ဝန်းနက်နက်တို့သည် အဓိပ္ပာယ်များစွာပါဝင်နေပြီး ဖြေရှင်းချက်မျိုးစုံ ပြေးလွှားနေပါသည် ။ ထို့အတူ တစ်ဖက်ရှိအမျိုးသမီး၏ မျက်ဝန်းများသည် စူရဲနေကာ သူ့အားအလိုမရှိကြောင်း ကွက်ကွက်ကွင်းကွင်းဖော်ပြနေသည် ။ အမှန်ဆိုပါလျှင် သူသည် ဒီနေရာတွင်မရှိသင့်သည့်လူဟု ပြောလို့ရသည့်အပြင် သူကိုယ်တိုင်လည်း ရှိမနေချင်ခဲ့ပါ ။ သို့သော် " ကိုယ့်ကားနဲ့ဘဲ ပြန်ရမယ် " ဟူသည့် အမိန့်သံတစ်ခုအောက် သူမငြင်းသာခဲ့ပါချေ ။

ခရီးတစ်ခုအရောက်တွင်တော့ ကားလေးသည် ဆိုင်တစ်ခုတွင် နားရလေသည် ။ ကားပေါ်မှ လူသုံးယောက်သည် တစ်စထက်တစ်စတိုးကာ အနီးဆုံးရှိနေကြလျက် ဝေးကွာနေကြသလို ကားရပ်ပြီးသည့်တိုင် အသက်မဲ့နေဆဲပင်ဖြစ်သည် ။ လေထုသည် တင်းမာနေဆဲဖြစ်သည်မို့ သူကိုယ်တိုင်သာ ကားပေါ်မှ အရင်ဆင်းလိုက်သည် ။ ထိုအခါ တံခါးဖွင့်ကာ လိုက်ဆင်းလာသည့် အမျိုးသားသည် သူ့အား တစ်ခုခုအားပြောချင်နေသည့် မျက်နှာဖြင့်လှမ်းကြည့်လာလေသည် ။ သူကိုယ်တိုင်လည်း အချိန်ကြာကြာကြည့်နေမိပြီး ထိုအမျိုးသား၏ လက်အားတွဲချိတ်လာသည့် မိန်းကလေးကို မြင်လိုက်မှ သူ့အသိစိတ်ပြန်ဝင်လာတော့သည် ။ ထို့ကြောင့် အကြည့်လွဲကာ နေလိုက်သည် ။ ပြီးသည့်နောက် အနားမှထွက်သွားကြသည့် နှစ်ယောက်၏ ကျောပြင်ကိုမြင်မိမှ နောက်ကနေလိုက်လာခဲ့လိုက်သည် ။

သေချာပေါက် ရှောင်ရမည်ကို သူကောင်းကောင်းသိပါသည် ။

ဆိုင်ထဲဝင်လိုက်ပြီးနောက် ဝိုင်းအလွတ်တစ်ခုတွင်သာ တစ်ယောက်ထဲထိုင်ရန် ဆုံးဖြတ်လိုက်ပါသည် ။ အကြည့်လေးပဲဖြစ်ဖြစ် စကားသံလေးပဲဖြစ်ဖြစ် ဘာမှမမြင်လို မကြားလိုပါ ။ ပြီးနောက် သူသည် အဲ့ဒီလောက်ထိ ကပ်တွယ်ဖို့မလိုဘူးဆိုတာ သိနှင့်ပြီးသားဖြစ်သည် ။ ကပ်တွယ်ဖို့လည်း စိတ်ကူးမရှိပါ ။ ဒီတစ်လျှောက်လုံး ခပ်ဝေးဝေးမှာသာ သူနေဖို့ကြိုးစားခဲ့သည် ။ တစ်ခါတစ်လေ အနားတိုးကပ်လာသည့် လူကိုတော့ ငြင်းဆန်ဖို့ခက်ခဲခဲ့ပါသည် ။ ခပ်လှမ်းလှမ်းကဝိုင်းကို တစ်ချက်သာ လှမ်းကြည့်လိုက်တော့ သူ့အားကြည့်နေသည့်လူသည် မျက်ခုံးတွေတွန့်ချိုးထားသည် ။ တစ်ယောက်ထဲထိုင်ခြင်းကို သဘောမကျသည့်ဟန်ရှိလေသည် ။ မတတ်နိုင်ပါ ။ သူသည် ကြားလူအဖြစ်မခံနိုင်တော့ပေ ။ ပြီးနောက် အထင်သေးသည့်မျက်ဝန်းတစ်စုံအားလည်း ရင်ဆိုင်ရန်ခွန်အားမရှိပါချေ ။ ထို့ကြောင့် အကြည့်လွှဲလိုက်ပြီး waiter ကောင်လေးရောက်လာတာမို့ စားဖို့တစ်ခုခုမှာလိုက်ပါသည် ။ အမှန်ဆိုလျှင် စားချင်စိတ်တောင် ရှိမနေပါချေ ။

ပြီးသည့်နောက် ဆိုင်ပြင်သို့ ငေးကြည့်ရင်း အတွေးလွန်နေမိပါသည် ။ သူလုပ်နေသမျှသည် မှန်သလား မှားသလားဆိုတာထက် ပိုပြီးဝေဖန်ပိုင်းခြားတတ်ခဲ့လျှင် ပိုကောင်းလိမ့်မည် ။ အခုတော့ ကိုယ့်ကိုကိုယ် အတန်တန်သတိပေးနေတဲ့ကြားက သူ့ခြေလမ်းတွေသည် တိတိကျကျကို မှားယွင်းခဲ့လေသည် ။ အဲ့ဒီနေ့ အဲ့ဒီအချိန်မှာသာ ထိုအမျိုးသမီးမရောက်လာခဲ့ပါလျှင် သူတို့အခြေအနေသည် မည်သို့ဖြစ်မည်နည်း ။ သူကရော ပြီးတော့ phi Perth ကရော .... ။

" Tata ... ! "

အတွေးလွန်နေချိန် အသံကြားလိုက်ရမှ အနားရောက်နေသူကို သတိထားမိသည် ။ ထိုလူအားမြင်လိုက်ပြီမို့ ခပ်လှမ်းလှမ်းကဝိုင်းကို ချက်ချင်းဆိုသလိုကြည့်မိသည် ။ ထိုအခါ မရယ်မပြုံးမျက်နှာဖြင့် စူးရဲစွာကြည့်နေသော အမျိုးသမီး၏မျက်နှာသည် တင်းမာလွန်းသည်ထက်ပိုပါသည် ။

" ဘာလို့ တစ်ဝိုင်းသပ်သပ်ထိုင်မှာလဲ ကိုယ်နဲ့လိုက်ခဲ့ !! "

ပြောပြီးသည်နှင့် လက်ကိုလာဆွဲသူကြောင့် Santa ချက်ချင်းရုန်းလိုက်ပါသည် ။

" ကျွန်တော် ဒီမှာထိုင်မှာ "

" ဘာလို့လဲ "

ဘာလို့လဲ .... ဘာလို့လဲဆိုတဲ့ မေးခွန်းကို ဘာကြောင့်မေးနိုင်တာတဲ့လဲ ။ သူကရော ဖြေဖို့လိုသေးရဲ့လား ။ အခြေအနေကို ကြည့်ရုံနဲ့ နားလည်သင့်တယ်မဟုတ်ပါလား ။

" Wan ကြောင့်လား အဲ့တာဆိုရင် စိတ်မပူနဲ့ မင်းနဲ့ကိုယ့်ရဲ့ ပတ်သက်မှုကို ငယ်ငယ်ကတည်းက သူသိတယ် "

" ..... "

" မင်းစိုးရိမ်နေတာကို ကိုယ်သိတယ် ဒါပေမယ့် ငယ်ငယ်ကတည်းက မင်းကိုပဲ ပိုဂရုစိုက်ခဲ့တာမို့ Wanကို အားမနာလည်းရတယ် ကိုယ်ပြောပြီးပြီလေ ကိုယ်မင်းနဲ့ အဆင်ပြေပြေပဲနေချင်တယ် "

ဒီကိစ္စတွေသည် phi Perth အတွက် ဒီလောက်လွယ်နေသည်တဲ့လား ။ မဖြစ်နိုင်ပေ ။ မဖြစ်နိုင်တာကို phi Perth လည်း သိသင့်ပါသည် ။ တစ်ဖက်မိန်းကလေးကိုလည်း အားနာရမည်ဖြစ်သလို ဒီထက်ပိုပြီးလည်း သူမျက်နှာပြောင်မတိုက်လိုပါ ။ ပြီးနောက် ငယ်ငယ်ကလို အဆင်ပြေပြေဖြစ်နိုင်ဖို့ဆိုတာ မဖြစ်နိုင်တော့သည့် ကိစ္စတစ်ခုဖြစ်သည် ။

" ဟင့်အင်း ကျွန်တော်ဒီမှာပဲ ထိုင်မယ် "

ထိုအခါ သက်ပြင်းချလိုက်သူ၏ အသံအားကြားလိုက်ရခြင်းနှင့်အတူ ခေါင်းမာမိတာမှားကြောင်း သူအတတ်သိလိုက်တော့သည် ။ phi Perth သည် လွယ်လွယ်နဲ့အလျှော့ပေးတတ်သူ မဟုတ်ပါ ။ အကြောင်းအရင်းသည် Santa ထိုင်နေသော ဝိုင်းမှာပင် မျက်နှာချင်းဆိုင် ထိုင်ချလိုက်သူကြောင့် ဖြစ်သည် ။

" မင်းမလိုက်ရင် ကိုယ်ဒီမှာပဲ ထိုင်လိုက်မယ် "

" phi Perth !! "

" အင်း ပြောလေ "

" ဘာလို့ အဲ့လောက်ခေါင်းမာနေတာလဲ phi Wan ကို အားမနာဘူးလား သူက phi လက်ထပ်မယ့် မိန်းကလေးနော် "

သူပြောသမျှကို ငြိမ်ကာ နားထောင်နေသူက သူ့မျက်နှာကိုလည်း စေ့စေ့ကြည့်နေသည် ။ ပြီးနောက် ခပ်ယေးယေးပြုံးလိုက်သည်ကိုပါ မြင်လိုက်ရသည်မို့ Santa အံ့အားသင့်မိသည် ။

" ကိုယ်လက်ထပ်ရမယ့် မိန်းကလေးမှန်းကိုယ်သိပါတယ် ဒါပေမယ့် Tata ကလည်း ကိုယ်နဲ့အဆင်ပြေတာမကြာသေးတဲ့ ကိုယ့်ညီလေးလေ Wan နဲ့က အဆင်မပြေတာ မရှိဘူး ကိုယ်ပြောတာ နားလည်လား "

စကားအဆုံး၌ သူ့နားထဲ ဆွဲကျန်ခဲ့သော စကားတစ်ခုသည် ညီလေးဟူသည့် စကားသာ ဖြစ်လိမ့်မည် ။ ညီလေး .... ညီလေးလို့ပဲ တွေးနေခဲ့ပြန်တာလား ။ သေချာပေါက် ညီလေးဆိုတဲ့ စကားလုံးထက် ပိုမယ်ထင်ခဲ့တာ ။ ဒါပေမယ့် အခုအချိန်မှာ သူကသာ အတွေးလွန်ပြီး .... သူကသာလေ ။ စူးနစ်ဝင်လာပြန်သည့် ခံစားချက်သည် ရှေ့ကလူအပေါ် နားမလည်နိုင်ခြင်းသည်သာ ပိုပိုတိုးလာခဲ့ရသည် ။

" အများကြီးမတွေးနဲ့ Wan ကိုလည်း စိတ်မပူနဲ့ သူကမင်းလို အတွေးမများဘူး "

ပြီးသည့်နောက် waiter ကောင်လေး ရောက်လာကာ စားစရာတွေ လာချပေးလေသည် ။ ရှေ့ကလူကိုကြည့်လေတော့ ဘာမှမထူးခြားသလို ပုံမှန်သာဖြစ်သည် ။ စိတ်အလုံးစုံ၌ မည်သည့်အကြောင်းအရာကို စပြီး အပြစ်တင်ရမည်မသိ ။ အားနာရမည်မသိတော့ပေ ။

" ခေါင်းသေးသေးက အမြဲတွေးနေလို့ လူကသေးနေတာဖြစ်မယ် များများစား "

ထမင်းပန်းကန်ထဲရောက်လာသော ဟင်းအချို့ကိုရောက်လာခြင်းနှင့်အတူ အသံကြားလိုက်ရမှ သူအသိဝင်လာသည် ။ ပြီးသည့်နောက် ချက်ချင်းဆိုသလို တစ်ဖက်ဝိုင်းက အမျိုးသမီးဆီ လှမ်းကြည့်မိသည် ။ ထိုအခါ သူတို့ဝိုင်းဆီအကြည့်ရောက်နေသော အမျိုးသမီးသည် တင်းမာနေသော မျက်နှာထားရှိမနေသလို အကြည့်စူးစူးတို့လည်း ရှိမနေတော့ပါ ။ အဲ့ဒီအစားမှိုင်းကျနေသော မျက်နှာနှင့် ရစ်ဝိုင်းနေသော မျက်ရည်အချို့ကို Santa မြင်လိုက်ရသလို ခံစားလိုက်ရသည် ။ သို့သော် သူကြည့်နေတာမြင်တော့ အကြည့်လွှဲချသွားသူ အမျိုးသမီးကြောင့် သူကိုယ်တိုင်ပင် မွန်းကျပ်ခြင်းကို ခံစားလာရသည် ။

phi Perth ပြောသလို phi Wan က အတွေးမများတတ်တဲ့လူ ဟုတ်နိုင်ပါ့မလား ။

-----

တစ်ရက်လုံးနီးပါး မောင်းလာသော ကားလေးသည် ညနေစောင်းအချိန်တွင် ဘန်ကောက်မြို့ထဲ ဝင်လာခဲ့သည် ။

" ဖေဖေက ကိုနဲ့ စကားပြောချင်တယ်တဲ့ ကိုယ်အခု ဖေဖေနဲ့ ဝင်တွေ့သွားပါလား နောက်ရက်တွေကျ ကိုက အလုပ်နဲ့ဆိုတော့ မအားမှာစိုးတာ "

" အခု ဝင်လိုက်မယ် ပြီးမှ ကိုယ်တို့ပြန်လိုက်မယ် "

ကိုယ်တို့ဆိုသည့်စကားကြောင့် သူပါ ပါနေသည်ကို သိလိုက်သည် ။ ဖြစ်နိုင်လျှင် အိမ်ကိုသာပြန်ချင်ပါသည် ။ သို့သော်လည်း ကားသည် သူ့ကားမဟုတ်ပါချေ ။ ထို့ကြောင့် ကားပေါ်တွင်နေခဲ့ရန်သာ ဆုံးဖြတ်လိုက်တော့သည် ။ မြို့၏ လမ်းအသွယ်သွယ်ကို ဖြတ်ပြီးသည့်နောက် Wan ဆိုသော အမျိုးသမီး၏အိမ်ကိုရောက်လာလေသည် ။ အစကတည်းက ထိုအမျိုးသမီး၏ အခြေအနေကိုသိပြီးသားမို့ ကြီးကျယ်သည့် အိမ်အပြင်အဆင်များကို တွေ့ရသည်မှာ သိပ်မအံ့ဩမိပေ ။

ကားရပ်သွားပြီးသည့်နောက် သူနေရာတွင်သာ ထိုင်နေလျက် ကျန်နေခဲ့သည် ။ လိုက်သွားဖို့အထိ သူနဲ့မသက်ဆိုင်သလို လိုက်လည်းမလိုက်ချင်ပါ ။ သို့သော် ကားမှန်အား လာခေါက်သူကြောင့် မှန်ချပေးလိုက်သည် ။

" မဆင်းဘူးလား "

" အင်း "

" လိုက်ခဲ့ နည်းနည်းကြာမယ်ထင်တယ် မင်းပျင်းနေလိမ့်မယ် "

" ဟုတ်သားပဲ လိုက်ခဲ့လေ Ta "

ပြုံးရွှင်လျက်ဆိုလာသူမိန်းကလေးကြောင့် သူဆက်ငြင်း၍ မကောင်းမှန်းသိလိုက်တာမို့ လိုက်သွားဖို့သာ ဆုံးဖြတ်လိုက်တော့သည် ။ အိမ်ထဲရောက်တော့ ခဏအကြာထိုင်စောင့်အပြီး phi Wan ၏ မိဘတွေ ရောက်လာကြသည် ။ ပြီးနောက် သူတို့၏ မိတ်ဆက်စကားဝိုင်းထဲဝင်မပါပဲ phi Perth ၏ ဘေးခုံတွင်သာ ငြိမ်လျက်ထိုင်နေလိုက်ပါသည် ။

" ပါး မား .... ဒါက ကို့ရဲ့ ညီလေးလေ Santa တဲ့ "

မထင်မှတ်ဘဲ သူ့အား မိတ်ဆက်ပေးလာသည်မို့ ကြောက်အသွားကာ ခေါင်းငြိမ့်ပြုံးပြလိုက်သည် ။

" ချစ်စရာလေးပဲကွယ် ဖြူဖြူချောချောလေး "

" ကျေးဇူးပါဗျ "

phi Wan ရဲ့ အမေစကားကြောင့် ကျေးဇူးတင်ကြောင်းပြောတော့ phi Perth က သူ့ကိုတစ်ချက်ငှဲ့ကြည့်လာပြီး အကြည့်ပြန်လွှဲသွားသည်မို့ နည်းနည်းအနေရခက်သွားသည် ။ ဘာအမှားများလုပ်မိလို့လဲ ။

" မင်းတို့လည်း ခရီးပန်းလာတာဆိုတော့ ဦးလေး လိုရင်းပဲ ပြောတော့မယ် "

" ဟုတ်ကဲ့ ဦးလေး "

" ဦးလေးတို့က Wan လေးကို မင်းလက်ထဲအပ်ပြီးတာနဲ့ တရုတ်မှာပဲ ပြန်အခြေချဖို့ စိတ်ကူးထားတယ် "

" ...... "

" Wan လေးရဲ့ အဖွားကနေမကောင်းဘူး ဦးလေးတို့ မြန်မြန်သွားချင်တယ် ဒီတော့ မင်္ဂလာပွဲရက်ကို မြန်မြန်စီစဉ်ကြရအောင် "

ဦးလေး၏ စကားကြောင့် Perth အကြည့်သည် အနည်းငယ် တုန်ယင်သွားသယောင်ဖြစ်သွားသည် ။ ဒါဆို ပြောစရာရှိတယ်ဆိုတာက မင်္ဂလာပွဲ ကိစ္စလား ။ Wan ကို လှမ်းကြည့်တော့ ခပ်ယေးယေးလေးပြုံးကာ ခေါင်းငုံ့ထားသည် ။ မဟုတ်သေး ခပ်ယေးယေးပြုံးနေသည်မှ မဟုတ်ဘဲ ။ ထိုအချိန် စိတ်ထဲတန်းဝင်လာသည်က ဘေးက ကောင်လေး ။ Perth စောင်းငှဲ့ကြည့်လိုက်ချိန် သူ့အား မော့ကြည့်လာသည့် မျက်လုံးဝိုင်းလေးသည် တခဏသာဖြစ်သည် ။ ချက်ချင်း မျက်လွှာချသွားပြီးနောက် သူ့နှုတ်ခမ်းသူ ကိုက်လိုက်တာကို သတိထားမိလိုက်သည် ။ ဒါဖြင့် Wan က Tata ကို အိမ်ထဲဝင်ဖို့ ကြည်ကြည်ဖြူဖြူခေါ်ခဲ့တာ ဒါအတွက်လား ။

" ဟုတ်ကဲ့ဦးလေး ကျွန်တော် မြန်မြန်စီစဉ်ပါ့မယ် "

" အေးကွာ မင်းနဲ့ဆိုရင် Wan လေးကို စိတ်မချစရာမရှိဘူးပေါ့ကွာ "

Santa စကားတို့အား ကြားပါလျက် မသိချင်ယောင်ဆောင်ချင်နေသည် ။ အဘယ်ကြောင့် ဒီစကားတွေသည် ယခုအချိန်အထိ သူ့ကို နာကျင်စေပါသနည်း ။ ဒီလူသည် တစ်နေ့လက်ထပ်ရမည့်လူဆိုတာ သိနှင့်ပြီးသားမဟုတ်လား ။ သူသည် ထိုလူ၏ ညီလေးအဆင့်မှာသာရှိသည် ။ ဒါကို သိသင့်ကြောင်းကိုပါ Wan ဆိုတဲ့အမျိုးသမီးက အကွက်ကျကျပြောပြလိုက်တာ ။ သူ့ကို သေသေချာချာ ပညာပြလိုက်တာ ဖြစ်မည် ။ သူမအပိုင်ဆိုတဲ့အကြောင်း သူမနှင့်လက်ထပ်ရမည်ဆိုတဲ့အကြောင်းကို ကိုယ်တိုင်မပြောဘဲ စည်းတားပြလိုက်တာ ဖြစ်သည် ။ ဒါကြောင့် အိမ်ထဲဝင်ဖို့ခေါ်တဲ့အချိန် အောင်နိုင်သူတစ်ယောက်လို ပြုံးနေခဲ့တာ ။ သူသည် ပြိုင်ဖို့စိတ်ကူးမရှိခဲ့ပါသော်လည်း ဒီပွဲမှာ ပြိုင်ပွဲဝင်တစ်ယောက်ဖြစ်နေခဲ့ပုံ ပေါ်ပါသည် ။

အပြန်လမ်းတစ်လျှောက်လုံး ဘာစကားမှ မပြောမိဘဲ ဘေးကိုသာ ငေးလျက်လိုက်ပါလာခဲ့သည် ။ ဘန်ကောက်မြို့၏ ညအလှသည် မီးရောင်စုံဖြင့် စည်ကားနေပါသော်လည်း သူ့အတွက်မည်သည့်အရာက လိုအပ်နေသည် မသိပါ ။ ဦးနှောက်နှင့်နှလုံးသား၌ ကြားလူ အပြင်လူ ဘေးလူ ဆိုသည့်စကားများနှင့် ညီလေး ဟူသော နာမအောက်၌သာ ဆိုးဆိုးဝါးဝါးထိုးနက်နေသည် ။

ရှေ့ရှိကားမောင်နေသူသည်လည်း မည်သည်ကို အလိုမကျသည်မသိ ။ ကားဟွန်းကို တတီတီတီးကာ ပုံမှန်ဟုတ်မနေပါချေ ။ တစ်ချက်တစ်ချက် ဆောင့်ကွေ့ချလိုက်သည့် အကွေ့များသည် ပုံမှန်ထက်အရှိန်များနေသည့်ကားကြောင့် သိသိသာသာဖြစ်လို့နေပါသည် ။သို့ပါသော်လည်း သူမသိချင်ယောင်ဆောင်လိုက်ကာ လှည့်မကြည့်ဘဲထားလိုက်သည် ။ ဒီအခြေအနေသည် သူ့အတွက် တုံ့ပြန်ရန်ခက်ခဲလွန်းသည်မဟုတ်လား ။ တစ်နေ့တစ်ချိန်ဆိုတာမျိုးကို ကြိုတွေးခဲ့တာတောင် နားဖြင့်ဆက်ဆက်ကြားခဲ့ခြင်းကို သူလက်မခံနိုင်ဖြစ်ရပါသည် ။

သူအတွေးတို့ ပျံ့နှံ့နေစဉ် ကားကိုအရှိန်ဖြင့်လမ်းချိုးတစ်ခုထဲသို့ ချိုးချလိုက်ကာ ကားကိုဘရိတ်အုပ်ချလိုက်သည်ကြောင့် ကားမောင်းနေသူအား အလန့်တကြားကြည့်မိသည် ။ သူသည် အနောက်အခန်းမှာမို့ မှန်မှတစ်ဆင့် ကားမောင်းသူ၏မျက်နှာကို သေချာမြင်နေရပါသည် ။ တွန့်ချိုးထားသော မျက်ခုံးတွေနှင့်အတူ အံကိုတင်းတင်းကြိတ်ထားသည်မှာ ထောင်လွှားနေသော မေးကြောများက သက်သေဖြစ်ပါလိမ့်မည် ။ ဘာကြောင့် အဲ့ဒီလောက် ဒေါသထွက်နေရသလဲဆိုတာတော့ သူမသိပါချေ ။

" တောက်စ် !! "

တောက်စ်ခေါက်သံကျယ်ကျယ်သည် ကားအတွင်းပျံ့လွှင့်သွားသည် ။ ပြီးသည့်နောက် သူ့အားမှန်မှတစ်ဆင့် လှမ်းကြည့်လာသော မျက်ဝန်းနက်နက်သည် အဘယ်ကြောင့်နည်း ။ ထို့ကြောင့် ခပ်စူးစူးထပ်စိုက်ကြည့်ပေးလိုက်တော့ သူ့နဖူးသူ လက်ဖြင့်အုပ်ကာ သက်ပြင်းချလေသည် ။ သက်ပြင်းချလိုက်သံကိုလည်း နောက်ခန်းထဲအထိ ကွဲကွဲပြားပြားကြားရပါသည် ။

သူနားမလည်နိုင်စွာ ကြည့်နေဆဲမှာပဲ ကားပေါ်မှ ဆင်းသွားသူကြောင့် ထိုလူလုပ်သမျှကြည့်နေမိသည် ။ ကားပေါ်မှ ဆင်းသွားသူသည် ကားနောက်ခန်းတံခါးကို ဖွင့်ကာ သူ့ဘေးတွင်ဝင်ထိုင်လာသည် ။ အဲ့ဒီအထိ သူကြောင်အစွာ လိုက်ကြည့်နေမိဆဲဖြစ်သည် ။

" Tata .... "

" ..... "

" ကိုယ်တောင်းပန်တယ် "

" ဘာအတွက်လဲ "

" အရင်အိမ်ပြန်ပို့ပေးလိုက်သင့်တာ Wan တမင်လုပ်တာ သူ့အစား ကိုယ်ကတောင်းပန်တယ် "

ဟုတ်တယ် Wan တမင်လုပ်လိုက်မှန်း Perth သေချာသိသည် ။ သူနဲ့ Tata ကိုမကျေနပ်လို့ တမင်လုပ်ပြလိုက်တာ ။ အထူးသဖြင့် Tata ကို ရည်ရွယ်ပြီး အခုလိုဖြစ်အောင် လုပ်လိုက်တယ်ဆိုတာ သိသိသာသာဖြစ်လွန်းနေသည် မဟုတ်လား ။ ပြီးတော့ Tata ကိူ ညီလေးဆိုပြီး သေချာမိတ်ဆက်ပေးတာရော ။ အကုန်လုံး သေချာကို စီစဉ်ထားခဲ့တာဖြစ်လောက်မည် ။ ဒီကောင်လေး မျက်နှာပျက်သွားတာကိုလည်း သူသေချာပေါက်တွေ့လိုက်တယ် ။ အဲ့ဒီတော့ ဒီကောင်လေးကလည်း တမင်လုပ်မှန်းသေချာပေါက်သိမှာပဲ ။ နဂိုကတည်းက သူ့ကိုယ်သူအပြစ်လုပ်မိတယ်လို့ ထင်နေတော့ ဒီကောင်လေးပိုဝမ်းနည်းသွားမှာမျိုးသူမလိုလားပေ ။ အခုတော့ သူကြောင့် ထပ်ဝမ်းနည်းရပြန်ပြီ ။ Wan ကိုလည်း သူစိတ်တိုသည် ။

" တောင်းပန်စရာမလိုပါဘူး ကျွန်တော်ဘာမှဖြစ်သွားတာမှ မဟုတ်တာ ပြီးတော့ ဒီကိစ္စက ကျွန်တော် သိထားပြီးသားပါ "

သူ့မျက်လုံးအား တည့်တည့်စိုက်ကြည့်ကာ ပြောလာသူကောင်လေးက တကယ်ပဲ ဘာမှမဖြစ်တာသေချာရဲ့လား ။ မဟုတ်သေး ပျက်ကျသွားတဲ့ မျက်နှာလှလှလေးကို သူသေချာပေါက်တွေ့ခဲ့တာပါ ။ ပြီးတော့ ဒီကောင်လေး သန်မာချင်ယောင်ဆောင်တတ်တာကိုလည်း သူသိနေတယ်လေ ။

" သေချာရဲ့လား မင်းမကျေနပ်ဘူးဆိုရင် ... ကိုယ် "

" ကျွန်တော်က ဘာမကျေနပ်စရာရှိလို့လဲ phi Perth က ကျွန်တော့်ရဲ့အစ်ကိုပါ အစ်ကိုတစ်ယောက်အိမ်ထောင်ပြုမှာကို ကျွန်တော် စိတ်ရင်းနဲ့ပျော်ပါတယ် "

မဟုတ်သေး .... ။ အဆင်ပြေတယ်ပြောနေသော ကောင်လေး၏ မျက်နှာသည် အဆင်ပြေနေပုံမှ မပေါ်ဘဲ ။ ပြီးတော့ ပြောနေရင်း ပြုံးပြလာသည့် အပြုံးယေးယေးသည် သူ့ရင်အား စုတ်ပြတ်သတ်သွားစေသည် ။ အဲ့ဒီအပြုံးက ဘာကြောင့် မသာယာနေနိုင်တာလဲ ။

" Tata ! "

" ကျွန်တော် အဆင်ပြေတယ် "

သူ့အား စိုးရိမ်စိတ်လွှမ်းမိုးနေသော မျက်ဝန်းများဖြင့် ကြည့်နေသူ phi Perth သည် သူ့ကိုတကယ်ပဲ ဘယ်လိုဖြေစေချင်တာတဲ့လဲ ။ အဆင်မပြေဘူးလို့ဖြေရင်ရော အဆင်ပြေလာနိုင်မှာလား ။ ဒီအခြေအနေမှာ သူဘာဖြစ်နေသလဲဆိုတာကို ပြောဖို့ရော အခွင့်အရေးရှိပါရဲ့လား ။ မဟုတ်ဘူး သူ့မှာအခွင့်အရေးရှိမနေပါ ။ ရှိခဲ့လျှင်တောင် သူဖြစ်နေသည့်အကြောင်းအရာ စိတ်ခံစားချက်အလုံးစုံကို ထုတ်မပြချင်တော့ပါချေ ။ ထို့အပြင် မွန်းကျပ်ခြင်းသည် ရင်ဘတ်တစ်ခုလုံးစို့တက်လာသည် ။ သူ့အားကြည့်နေသော မျက်ဝန်းနက်အား ဆက်ကြည့်နေရင်းပင် လိုက်တက်လာသည့် ဝမ်းနည်းမှုနှင့်နာကျင်မှုသည် သူ့ကို လမ်းပျောက်စေသည် ။

မဖြစ်နိုင်ဘူး ။မဟုတ်ဘူး မဖြစ်သင့်တော့ဘူး ။ဖြစ်နိုင်ဖို့ကို ဆက်မကြိုးစားသင့်တော့ဘူး ။

နက်ရှိုင်းလွန်းသည့် နာကျင်မှုသည် phi Perth ၏ မျက်နှာကိုပင် ဆက်မကြည့်နိုင်တော့ပေ ။ မျက်နှာကို အောက်သို့ ငုံ့ချလိုက်ကာ ဝေဝါးနေသော မြင်ကွင်းများကြောင့် မျက်ရည်တို့အား စီးမကျလာစေရန် တားရသည် ။ သူသည် phi Perth နှင့်ပတ်သတ်လျှင် အထိအခိုက်မရှအလွယ်များလွန်းလှပါသည် ။ ထိန်းမနိုင် သိမ်းမနိုင် ထိန်းမရ သိမ်းမရ အချစ်စိတ်ကလေးပဲဖြစ်ဖြစ် မျှော်လင့်ချက်ကလေးပဲဖြစ်ဖြစ် မျက်ရည်တွေပဲဖြစ်ဖြစ်လေ ။

" ကိုယ့်ကိုကြည့် "

" ...... "

ခေါင်းငုံ့ချသွားသည့် ကောင်လေးကြောင့် သူ့ရင်ထဲပြာဝေသွားသည်မို့ ထိုကောင်လေး၏မျက်နှာအား ဆွဲယူမော့လိုက်ကာ မျက်နှာချင်းဆိုင်စေသည် ။ ထိုအခါ မျက်ရည်စတွေဝေနေသော မျက်ဝန်းငယ်လေးကို မြင်လိုက်ရပြန်တာကြောင့် သူ့ဦးနှောက်နှင့်ရင်ဘတ်တစ်ခုလုံး အောင့်သက်လာသည် ။

သူမကြိုက်ဘူးဒီကောင်လေးရဲ့ မျက်ရည်တွေကိုသူလုံးဝ မကြိုက်ပါ ။

ထို့ကြောင့် ဘာစကားမျှ မဆိုနိုင်တော့ဘဲ ကောင်ငယ်လေးအား ရင်ခွင်ထဲ ဆွဲသွင်းလိုက်သည် ။ ထိုအခါ သူ့ရင်ခွင်ထဲ ရှိုက်ကြီးတငင်ငိုလာသူ ကောင်လေးကြောင့် သူပို၍ တိုးဖက်ထားမိသည် ။ အကြောင်းအရင်း၏ အဖျားခံသည် ဘာမှန်းသူမသိပါ ။ ပြီးတော့ သူနားမလည်ဘူး ။ ဒီလောကကြီးရဲ့ အချစ်အကြောင်း ။ လောကနိယာမတွေ ။ သူဘာတွေမှားခဲ့ဖူးသလဲ ။ ဘာတွေမှားနေခဲ့သလဲ ။ ဘာကြောင့် ဒီကောင်လေးကို ခဏခဏငိုစေမိသလဲ ။

သူချစ်သည် ။သူသည် Santa Pongsapak ကို သိပ်ချစ်ပါသည် ။အခုရော အရင်ကရောရင်ထဲက နင့်နေအောင် သူသိပ်ကိုချစ်သည် ။သို့သော် ဘယ်လိုအချစ်မျိုးလဲသူကိုယ်တိုင်ပင် ကွဲကွဲပြားပြားမသိပါ ။

ငိုရင်လည်း ကိုယ့်ရင်ခွင်ထဲပဲ အဝငိုပါ ။ကိုယ်က ငိုအောင်လုပ်မိတယ်ဆိုရင် အဲ့ဒီမျက်ရည်တွေကို ကိုယ်သုတ်ပေးမယ် ။ ကိုယ်မှားနေခဲ့ရင် ကိုယ်အမှန်သိအောင် ကြိုးစားပေးမယ် ။ ဒါပေမယ့် ကိုယ့်ဆက်မှားနေခဲ့တယ်ရင်ရောမင်းက ခွင့်လွှတ်နိုင်ပါ့မလားခွင့်လွှတ်ပါ့အုံးမလား ။

ငိုသံလေး တိတ်ကျသွားမှ ရင်ခွင်ထဲက ထုတ်ကာ မျက်နှာလေးကို ကြည့်မိသည် ။ ငိုထားလို့ ခပ်ရဲရဲဖြစ်ချင်နေသည့် မျက်နှာလေးသည် သူ့ရင်ကို ပူလောင်လာစေသည် ။

" ကိုယ်အဆင်ပြေအောင် ကြိုးစားပေးပါ့မယ်ကွာ အဲ့တာမို့ ထပ်မငိုပါနဲ့တော့ "

သူ့အား မျက်ရည်စတို့ပြည့်နေသော မျက်ဝန်းလေးဖြင့်ကြည့်ကာ ခေါင်းကို တသွင်သွင်ခါပြသည် ။ ပြီးနောက် ထပ်မှန် ဝဲတက်လာသည် မျက်ရည်ဥဥတို့အား မြင်နေရပြန်သည် ။ ထို့ကြောင့် ထိုမျက်ဝန်းလေးအား ဖိကပ်နမ်းရှိုက်လိုက်ကာ အချိန်အတော်ကြာမှ လွတ်ပေးလိုက်သည် ။ ထိုအခါ ဝမ်းနည်းရိပ်သန်းနေသော မျက်နှာလေးက သူ့အား ငြိမ်လျက်ကြည့်နေပြန်သည်မို့ သူ့မှာ သည်းခံနိုင်စွမ်းမဲရချေပြီ ။ အငိုသန်လေးကို အလွတ်မပေးချင်တော့ပါချေ ။

ထို့ကြောင့်ရဲနေသော နှုတ်ခမ်းဖူးဖူးလေးအား ဖိကပ်လိုက်သည် ။

တစ်စက္ကန့်လားနှစ်စက္ကန့်လားသုံးစက္ကန့်လား

မဟုတ်သေး သူအလွတ်ပေးချင်စိတ်ရှိမနေတော့ပါ ။ ထို့ကြောင့် နှုတ်ခမ်းနုနုအား စုတ်ယူနမ်းရှိုက်လိုက်တော့ သူ့ရင်ဘတ်အား တွန်းကန်လာသည့် လက်ကလေး ။ သို့သော် သူ့မှာအလွတ်ပေးချင်စိတ်ရှိမနေ ။ ထို့ကြောင့်ပိုတိုးကာ နမ်းရှိုက်လိုက်ပြီး ခေါင်းလေးကိုပါ ထိန်းကိုင်လိုက်သည် ။ အချိန်တစ်ခုအထိ တွန်းကန်နေပေမယ့် ရုန်းမရမှန်းသိတော့ ငြိမ်သွားတဲ့ကောင်လေးက အချိန်ခဏအကြာတော့ သူ့လည်ပင်းအား ဖက်တွယ်လာကာ တုံ့ပြန်လာလေသည် ။ ထို့ကြောင့်ပိုတိုးကာ ဖက်ယူရင်း တော်တော်ကြာတဲ့အထိ သိမ်းပိုက်ထားလိုက်သည် ။ ထိုကောင်လေး မောဟိုက်နေသည်ဟု ထင်သည့်အချိန်မှသာ လွတ်ပေးလိုက်သည် ။

လွတ်ပေးလိုက်ပြီးနောက် နီးကပ်နေသော မျက်နှာနှစ်ခုကြောင့် ကောင်လေး၏ မျက်နှာအစိတ်အပိုင်းတိုင်းကို သေချာမြင်နေရခြင်းနှင့်အတူ သူကြည့်နေမှန်းသိတော့ မှိတ်ကျသွားသည့် မျက်တောင်ဆင်းဆင်းလေးတွေကအစ လှလွန်းပါသည် ။ တစိမ့်စိမ့်ကြည့်နေရင်း အခုန်မြန်လာသည့်ရင်ကြောင့် ဆက်မကြည့်နိုင်တော့ပဲ ဖယ်ခွါလိုက်တော့သည် ။ မဟုတ်လျှင် နောက်တစ်ကြိမ်ပဲဖြစ်ဖြစ် .....ထိုအခါ သူသည် အခွင့်ရေးသမားဖြစ်သွားပေလိမ့်မည် ။

" ခဏခဏမငိုနဲ့ "

" ...... "

" ငိုရင်လည်း ကိုယ့်အရှေ့မှာပဲ ငို "

ညီလေး ..... ညီလေး ။သူတကယ်ပဲ ဒီကောင်လေးအပေါ်ညီလေးလို့ သတ်မှတ်နိုင်ပါ့အုံးမလား ။

-----

🤍

5.1К3220

Previous chapter Next chapter

There are no comments yet. Log in to be the first to leave a review!

14

Similar stories