39

14:52, 4 September 2025

Santa တစ်ယောက် သားကိုပိုးလျက်ဖြင့် အလုပ်ရှုပ်နေသည် ။ ရှေ့ပိုးသဘက်ဖြစ်တာမို့ သားက Santa ရင်ဘတ်အားမှီကာ Santa လုပ်သမျှကို မျက်လုံးအဝိုင်းသားဖြင့် လိုက်ကြည့်၏ ။ တစ်ခါတစ်ခါ Santa လက်ထဲမှ ပစ္စည်းများကိုပါ လိုက်လုနေသည့်အပြင် စကားတွေပါ ပြောတတ်သေးသည်မို့ သားကိုစကားပြန်ပြောရင်း လုပ်စရာဆက်လုပ်ရင်းဖြင့် နောက်ဆုံး သပ်ရပ်စွာထည့်ထားသော ထမင်းချိုင်းလေးဟာ ပြီးစီးသွားတော့သည် ။

" ပါ ... ပါး ! "

" ဗျာ ... Do လေးပြော "

" ဒယ့် .... ပို့ "

၁၀ လထဲဝင်နေသည့် သားက စကားပြောသွက်တဲ့ထဲပါတာမို့ တစ်လုံးစနှစ်လုံးစကို စိတ်ပါရင်ပါသလို ပီသအောင်ပြောတတ်ပြီး စိတ်မပါလျှင်တော့ ရောချကာ ပြောချင်ရာကို ဘာသာစကားသစ်ကဲ့သို့ လျှောက်ပြော၏ ။

" ဟုတ်တယ် ပါပါးတို့ ဒယ်ဒီ့ဆီ ထမင်းချိုင့်သွားပို့ကြမယ်နော် Do လိုက်မယ်မလား "

ထိုအခါ ခေါင်းငြိမ့်ပြလျက် ထမင်းချိုင့်အားဆွဲဖို့လုပ်နေတာမို့ သားလက်ကလေးကို ဆွဲထိန်းလိုက်ပြီး နောက်တစ်ဖက်ကလည်း ထမင်းချိုင့်အိတ်ကလေးကို စားပွဲအလယ်တို့တိုးကပ်လိုက်သည် ။ ပြီးကာမှ သစ်တော်သီး အားရေဆေးရန် ရေခဲသေတ္တာမှ ထုတ်လိုက်ပြီး ရေစင်သွားကာရေဆေးလိုက်သည် ။ ထိုအခါ ရေကြိုက်တဲ့သားက အငြိမ်မနေဘဲ ရေကိုသားလက်ကလေးဖြင့် ထိရန်အတင်းကြိုးစားတာမို့ ပိုးထားသည်မှရုန်းသလိုဖြစ်သွား၏ ။ ထို့ကြောင့် Santa ကပဲ ရေးကျနေသည့်အနားတိုးပေးလိုက်တော့ လက်ကိုရေစိုသွားသည်ကြောင့် သားက သဘောတကျ တခစ်ခစ်ရယ်တော့သည် ။

" ရေကြိုက်တယ်ပေါ့ သားသားက "

" ရေ ..... ! "

" ဟုတ်တယ် ရေ ... သားကတော်လိုက်တာကွာ ထပ်ပြောကြည့်ပါအုံး "

" အင့် ! .... "

ဒီတစ်ခါတော့ စိတ်မပါလို့ထင် လိုက်မပြောတော့ပဲ လက်ကိုရေစိုရန်သာ ကြိုစားနေ၏ ။ သားလက်ကလေးကို အသာဆွဲယူလိုက်ပြီး လက်တစ်ဖက်ကလည်း ရေဆေးပြီးသား သစ်တော်သီးတို့အား ယူကာ အခွဲနွှာရန် ပြင်လိုက်တော့ သားက ငြိမ်ပြီး စိတ်ဝင်တစားကြည့်နေပြန်သည် ။ ထို့ကြောင့် အခွံနွှာပြီးချိန် သားစားလို့သင့်မယ့် အရွယ်လောက်အား စိတ်ကာ သားလက်ထဲထည့်ပေးလိုက်သည် ။

" ဒယ်ဒီ့အတွက် အသီးတွေခွဲပြီးရင် ပါပါးကို ရေချိုးကြမယ်နော် သားသား "

" .... "

အစားထဲ အာရုံရောက်သွားပြီမို့ သားက မျက်လုံးဝိုင်းလေးဖြင့်သာ မော့ကြည့်ပြီး ငြိမ်သွား၏ ။ Santa ပြုံးလိုက်ကာ သစ်တော်သီးတို့အား သေချာစိတ်ပြီး ဗူးထဲလှလှလေးစီးထည့်လိုက်သည် ။ ပြီးနောက် ထမင်းချိုင့်ထည့်ထားသည့် အိတ်ထဲသေချာထည့်ပြီး ဇစ်ပိတ်လိုက်သည် ။ ပြီးနောက် kitchen ထဲမှ ထွက်လာလိုက်ကာ အပေါ်ထပ်အခန်းသို့တက်လာလိုက်သည် ။ အခန်းထဲရောက်မှ သားကိုပိုးသဘက်ထဲမှ ထုတ်ပြီး ကုတင်ပေါ်တင်ပေးလိုက်၏ ။

" ရေချိုးရအောင်နော် သား "

ထိုင်လျက်ချလိုက်ပေမယ့် မတ်တပ်ရပ်တတ်နေပြီဖြစ်သည့်သားက Santa ကို ကိုင်ကာချက်ချင်းပြန်ထသည် ။ ပြီးနောက် ရေချိုးမယ်ဆိုသောကြောင့် မျက်နှာလေးက သိသိသာသာ ရွှင်ပြနေပြန်၏ ။ ပြီးနောက် Santa ကို ကိုင်လျက် မွေ့ရာပေါ်တွင် ဟိုဘက်လျှောက် ဒီဘက်လျှောက်လုပ်နေပြန်သည် ။ ကိုင်စရာရှိရင် သားခြေလမ်းတွေက အတော်လေးသွက်သွက်လှမ်းတတ်နေပြီ ။ အလွတ်ဆိုလျှင်တော့ အားယူရတာမို့ ထိုင်လျက်ပြန်ပြန်လှဲကျတတ်၏ ။

Santa အငြမ်မနေသည့်သားကို ဆွဲဖမ်းလိုက်ကာ အင်္ကျီချွတ်ပေးလိုက်ပြီး ရေချိုးရန် ပွေ့ချီလာလိုက်သည် ။ ပြီးနောက် ကိုယ်တိုင်လည်း သားနဲ့အတူ ရေချိုးလိုက်သည် ။ ရေချိုးပြီးချိန်တွင်တော့ သားကို မိုးပြာရောင် တီရှပ်ဘေးနှင့် ဒူးအထက်ဘောင်းဘီအတိုအဖြူလေးအား တွဲဝတ်ပေးလိုက်တော့ အသားအရည်ကောင်းသည့်သားနှင့်လိုက်ဖက်စွာ ချစ်ဖို့ကောင်းလွန်းနေ၏ ။ သူကိုယ်တိုင်လည်း သားနှင့်ဆင်တူ မိုးပြာရောင် တီရှပ်အား စတိုင်ပန်ဘောင်းဘီအဖြူအရှည်နှင့်တွဲဝတ်လိုက်ပြီး အင်္ကျီအားခါးထဲထည့်ဝတ်ထားသည်မို့ ပုံမှန်ထက် ပိုပြီးနုနှယ်သွားသယောင်ဖြစ်သွားသည် ။ အားလုံးပြင်ဆင်ပြီးချိန်တွက် ၁၁ နာရီထိုးပေမို့ phi Perth ဆီကိုအရောက်နှင့်ကွက်တိဖြစ်ပေလိမ့်မည် ။ သားအတွက် ဖြည့်စွတ်စာဗူးပါ တစ်ခါတည်းထည့်လာတာမို့ အတူတူထမင်းစားကြရုံသာ ။ သားအတွက် လိုအပ်သည်များကိုလည်း အိတ်အဖြူလေးထဲသေချာထည့်ကာ ပုခုံးတွင်ချိတ်လွယ်လိုက်ပြီး သားကိုပါပွေ့လိုက်သည် ။ ထို့နောက် မှန်ရှေ့ရပ်လိုက်ချိန်တွင်

အင်း တော်တော်လေးကြည့်ကောင်းတဲ့ သားအဖပဲ ။

" ပါပါးတို့ ဒီလိုချစ်ဖို့ကောင်းနေမှဖြစ်မှာ သိလား သား "

ထိုအခါ သားက နားလည်သယောင်ခေါင်းငြိမ့်တာမို့ Santa အသံထွက်တဲ့အထိ သဘောတကျရယ်မောမိသည် ။

" အင်း ချစ်ဖို့ကောင်းအောင်လုပ်ပြီး ဒယ်ဒီ့ဆီနေ့တိုင်းသွားကြမယ် ဒါမှ ဘယ်သူမှ သားဒယ်ဒီနား မကပ်ရဲမှာ ဟုတ်တယ်မလား "

ဒီတော့လည်း သားကခေါင်းငြိမ့်ပြန်တာမို့ Santa အသည်းယားစွာဖြင့် ပါးအိအိလေးကို နစ်နေအောင်နမ်းပစ်လိုက်သည် ။ ထိုအခါ မွှေးအီလှသော ဘေဘီရနံ့သင်းသင်းလေးကြောင့် စိတ်ပိုကြည်သွား၏ ။ ထို့နောက်တွင်တော့ အချိန်ဆွဲမနေတော့ဘဲ ထမင်းချိုင့်အိတ်အားယူကာ phi Perth Company ဆီသို့ ထွက်လာခဲ့ကြတော့သည် ။ လမ်းတစ်လျှောက်တွင်လည်း ဘေးခုံရှိသားကို စကားလှည့်လှည့်ပြောရတာအမော ။ ပြန်ထောက်ခံသလိုဖြင့် ပါးစပ်ထဲရှိရာ ပြန်ပြန်ပြောတတ်သည့် သားကြောင့်လည်း သဘောမကျဘဲ မနေနိုင်ပေ ။

Company သို့ရောက်ချိန်တွင်တော့ သားကိုချီလျက် ၊ ပုခုံးပေါ်မှာလည်း အိတ်အဖြူလွယ်လျက် ၊ လက်တွင်လည်း ထမင်းချိုင့်အိတ်ဆွဲလျက်ဖြင့် Santa Company ထဲသို့ဝင်လာခဲ့လိုက်သည် ။ phi Perth က အခု CEO ရာထူးဖြစ်နေပြီဖြစ်သည် ။ အဖေက အနားယူလိုက်တာတော့ မဟုတ်ပေမယ့် phi Perth ကို ရာထူးလွှဲပြောင်းကာ ဒါရိုက်တာ တစ်ယောက်အနေနဲ့ဆက်ပြီး အလုပ်လုပ်နေ၏ ။ ဒီတော့ ဒီရာထူးမှာ ပိုပြီးအန္တရာယ်များပြီး လိုချင်သူတွေ ဝိုင်းဝိုင်းလည်နေတော့ Santa စိတ်မချနိုင်ပေ ။ အလုပ်တူတူလာဝင်လုပ်ဖို့ကလည်း သားနဲ့မို့ မဖြစ်နိုင်သေးပေ ။ သားကိုလည်း နွေးထွေးတဲ့မေတ္တာအပြည့်ပေးချင်သေး၏ ။ ထို့ကြောင့် အခုလိုလာပြီး ကိုယ်ထင်လာလာပြတာက အကောင်းဆုံးဖြစ်လောက်မည်ဟုထင်သည် ။

" Domiia လေး ! "

Santa လမ်းလျှောက်လာစဉ် ဝန်ထမ်းအချို့က သားကိုမြင်တော့ ပြေးလာကြ၏ ။ နေ့တိုင်းနီးပါးလာတတ်တော့ သားကိုအတော်လေး ရင်းနှီးနေကြခြင်းဖြစ်သည် ။ ချစ်စရာကောင်းသည့်သားကို ကြည့်ရုံပဲမနေနိုင်ဘူးဟု ဆိုကာ လာမြူတတ်ကြသည်ကို Santa လည်း ထူးပြီးဘာမှမဖြစ်တာမို့ ခွင့်ပြုပေးထားလိုက်သည် ။ သားကလည်း ဝန်းထမ်းတွေမြူသည်ကို သဘောတကျ ပြုံးပြတတ်သည်မို့ အားလုံးကသဲသဲလှုပ်ဖြစ်နေကြ၏ ။

" အီးယားးးး ချစ်ဖို့ကောင်းလိုက်တာ "

ထိုအခါ သားက ပြုံးပြပြန်တာမို့ ဝန်ထမ်းတွေက အတော်လေး သဘောတကျရှိပြီး တစ်ယောက်တစ်လှည့်စနေကြသည် ။ Santa ကတော့ ငြိမ်လျက်သာပြုံးနေလိုက်တော့သည် ။ ထိုအချိန်

" Tata .... "

အသံလာရာကို လှမ်းကြည့်တော့ နှစ်ယောက်မရှိတဲ့ ခင်ပွန်းဖြစ်သူမို့ Santa ပြုံးပြလိုက်၏ ။ ဝန်ထမ်းတွေကတော့ CEO ဆိုတော့ ရှိန်ပုံရသည့်အပြင် အရင်ကတည်းက ကြောက်စရာကောင်းကြောင်းနာမည်ကြီးခဲ့သူမို့ တော်ရုံ phi Perth အနားမကပ်ရဲကြတာ မဆန်းလှပေ ။ ယခုလည်း phi Perth ကို မြင်သည်နှင့် သားနဲ့Santa ကို နှုတ်ဆက်ကာ ထွက်သွားကြ၏ ။ Santa လည်း ပြန်နှုတ်ဆက်လိုက်ပြီးမှ သူတို့ဆီလျှောက်လာနေသည့် phi Perth ဆီသို့ လျှောက်သွားလိုက်သည် ။

" ဒယ့် ! "

" ဒီနေ့စောတာပဲ မွှေးလိုက်တာကွာ ! "

အနားရောက်သည်နှင့် သားကို လက်ပြောင်းယူကာ ပါးကိုနမ်းလိုက်ရင်းဆိုလိုက်သူကြောင့် သားက တခစ်ခစ်ရယ်ပြန်၏ ။ တကယ်ပါ သူ့ဒယ်ဒီဘာလုပ်လုပ်ကို သားက ဘဘောကျတာ ။

" ရေချိုးခဲ့တာလား သားက "

" ပါး ...... ချိုး "

" ပါပါးချိုးပေးတာလား ၊ ဒီလိုဆို ပါပါးလည်း မွှေးမှာပဲ ... မွ! "

" phi !! "

သားကို ပြောနေရင်း Santa ပါးအား လာနမ်းသူသည် ရုတ်တရက်မို့ ဘာမှတားဆီးချိန်မရလိုက် ။ ပြီးမှ ပတ်ဝန်းကျင်ကို အရှက်သည်းစွာ လိုက်ကြည့်မိတော့ တစ်ချို့ဝန်ထမ်းလေးတွေက ပြုံးစိစိရယ် ။ ရှေ့ကလူကို ပြန်ကြည့်တော့ သိသိသာသာ ကွေးညွှတ်နေသည့် နှုတ်ခမ်းများကြောင့် Santa မျက်စောင်းပါပါးလေး ထိုးပေးလိုက်သည် ။

ကျေနပ်တာက သပ်သပ် ။ ရှက်တာက သပ်သပ် ။

ပြီးနောက်တွင်တော့ Santa လက်ထဲမှ ထမင်းချိုင့်အိတ်ကိုပါ ဆွဲယူလာ၏ ။ ထိုအခါ Santa တွင် ပုခုံးတွင်လွယ်ထားသော အိတ်အဖြူလေးသာရှိတော့ပြီး phi Perth ကတော့ သားကိုတစ်ဖက်ကချီ၍ နောက်တစ်ဖက်ကတော့ ထမင်းချိုင့်အိတ်ဖြင့် ။ မြင်ရသူအဖို့ တကယ့်ကို ချစ်စရာမိသားစုလေးဖြစ်နေမှာသေချာ၏ ။

" ဟဲ့ phi Ta က ကလေးတစ်ယောက်မွေးထားတာတောင် တကယ်လှတာနော် "

" ဟုတ်ပါ့ ငါတို့CEO ကြီးသဲသဲလှုပ်တာလည်း မပြောနဲ့ ဟိုက တကယ့်လှလှလေး "

" အမလေး တစ်ယောက်နဲ့တစ်ယောက်ချစ်လိုက်ကြတာလဲ အားကျစရာနော် phi Ta က ယောက်ျားလေးဖြစ်နေတာတောင် Domiia လေးကို ရအောင်မွေးပေးတယ် ၊ CEO ကလည်း ကျောက်ကပ်တစ်ခြမ်းထုတ်ပေးထားတယ်ဆိုပဲ "

" အေးနော် အားကျဖို့ကောင်းလိုက်တာ ၊ ဒါနဲ့ ဟိုးအရင်ကတည်းက ငယ်ချစ်တွေလို့လည်း ကြားဖူးတယ် "

" စကားမစပ် phi Ta ဒီမှာအလုပ်လုပ်တုန်းက CEO ကိုပါးရိုက်လိုက်တာ မြင်ဖူးတယ်သိလား "

" ဟုတ်လား ဟိုးးတစ်ခါကလည်း ထိုးလိုက်သေးတာလားလို့ "

" ဟဲ့ နင်တို့ကလည်း ငါတို့ CEO ကြီးက ယကက နေမှာပေါ့ ဟိဟိ "

" ဘာတုန်း ယကက "

" ယောက်ျားကြောက်လေ ဟားဟား "

" ဟယ် နင်တို့ကလည်း ယကက မဟုတ်ပါဘူး ငါတို့ CEO ကြီးက ချစ်တတ်တာ ဟားဟား "

တစ်ယောက်တစ်ပေါက် ပြောဆိုသံသဲ့သဲ့သည် အတင်းအဖျင်းရယ်တော့ မဟုတ် ။ CEO ရဲ့မိသားစုလေးကို အားကျ၍သာ ဖြစ်လေသည် ။

ဒါနဲ့ တကယ် ယကက လား ။

-----

CEO ရုံးခန်းတွင် ။

" ချစ်စရာကောင်းလို့ ဘယ်လိုလုပ်ရတော့မလဲ "

ဆင်တူဝတ်ထားသော ပါးပါးပေါက်စလေးနဲ့ သားကိုကြည့်ပြီး Perth တကယ်အူယားနေတာဖြစ်သည် ။ သူ့ယောက်ျားသေးသေးလေးက တကယ့်ကိုနုနှယ်လွန်းနေတာ မဟုတ်ဘူးလား ။ လှတယ်လို့ပြောရင် သိပ်မကြိုက်ချင်တာ သိပေမယ့် Tata က တစ်နေ့တစ်ခြား ပိုပိုလှလာတာ ဘယ်လိုမှငြင်းမရ ။ အခုလိုအရောင်နုနုလေးတွေ ဝတ်ချိန်ဆိုလျှင်ပိုပြီး သိသာလှ၏ ။ နေ့တိုင်းထမင်းချိုင့်လာပို့ပေးခြင်းကို ကျေနပ်မိသော်လည်း မကျေနပ်သည်က လာတိုင်းဟိုလူငေး ဒီလူငေးဖြစ်နေတာကိုပဲ ။ တစ်ချို့တစ်လေဆို သားကိုမြူသလိုလိုနဲ့ Tata နား ကပ်တတ်ကြတာကို သိပ်လက်မခံနိုင် ။ ထို့ကြောင့် Tata မရောက်ခင် အောက်စောဆင်းကာ စောင့်နေဖို့ကြံလိုက်ပေမယ့် အရင်ရောက်သင့်သည့် သားအဖနား ဝန်ထမ်းတွေကဝိုင်းဝိုင်းလည်နေကြပြီ ။

" နောက်ရက်ကျရင် ကားပါကင်ရောက်တာနဲ့ ကိုယ့်ကိုဖုန်းဆက် "

" ဘာလို့လဲ "

ချိုင့်ထဲမှ ထမင်းဟင်းများအား ထုတ်၍စားပွဲတွင်သေချာနေရာချကာ မေးလာသူက မျက်လုံးတွေက အဝိုင်းသား ။

" Tata အနား လူရှုပ်နေတာ မကြိုက်ပါဘူး ၊ ကိုယ်က ကားအထိဆင်းကြိုမယ် "

ထိုအခါ ရယ်သံလွင်လွင်လေးက သိသိသာသာထွက်လာတာကြောင့် Perth ကြည့်လိုက်တော့ သဘောတကျဖြစ်နေသည့် ကောင်ငယ်လေးက

" သဝန်တိုနေတာပဲ "

" သဝန်တိုတာ မဟုတ်ပါဘူး ၊ သားစိတ်ရှုပ်မှာလည်း စိုးလို့ နော်သား "

ထိုအခါ ပေါင်ပေါ်ကသားကပါ မျက်လုံးဝိုင်းများဖြင့် မော့ကြည့်လာ၏ ။ သူ့ကိုခေါ်မှန်းသိပေမယ့် ဘာပြောသည်ကိုတော့ သိပ်နားလည်ပုံမရ ။ ခဏအကြာမှ ဘာမသိညာမသိ လိုက်ခေါင်းငြိမ့်သည် ။

" phi ရဲ့သားကတော့ စိတ်ရှုပ်တဲ့ပုံ မပေါက်ပါဘူး ၊ ပြုံးပျော်နေတာပဲ နော်သားသား "

ဒီတစ်ခါလည်း လိုက်ခေါင်းငြိမ့်ပြန်၏ ။ ဒီကောင် ဘာနေနေ ထောက်ခံမယ့် သဘောရှိသည် ။

" မရဘူး ၊ ကိုယ်လာကြိုမယ် ဒါပဲ "

Santa ခပ်ပြုံးပြုံးဖြင့်သာ ခေါင်းအသာရမ်းမိသည် ။ အတည်ပေါက်ကြီး သဝန်တိုနေတာကို ။ ပြီးနောက် ထမင်းစားဖို့ရန်ကိုသာ ပြင်ဆင်နေလိုက်သည် ။ ရှေ့ကသားအဖကတော့ အရုပ်နှစ်ရုပ်ဖြင့် အလုပ်ရှုပ်နေပြီး ရယ်သံတွေက လွှမ်းလို့ ။ သားအရုပ်တွေက phi Perth ရဲ့ ရုံးခန်းထဲမှာပါ ရှိတာမို့ အဆင်ပြေသည် ။ phi Perth သူ့သားအတွက် တမင်ဝယ်ထည့်ထားခြင်းလည်း ဖြစ်သည် ။

" လာသား ပါပါးဆီ "

စားလို့ရသည့် အချိန်တွင်တော့ phi Perth လွတ်လွတ်လပ်လပ်စားရစေရန် သားကိုခေါ်ဖို့ ပြင်လိုက်သည် ။ သို့သော်

" ကိုယ်ကျွေးလိုက်မယ် ၊ Tata က အေးအေးဆေးဆေးစား "

" phi ပဲ စားပါ ၊ တစ်မနက်လုံး အလုပ်ပင်ပန်းထားတယ် မဟုတ်ဘူးလား "

" Tata နဲ့ သားကို မြင်တော့ မပင်ပန်းတော့ဘူးလေ ၊ သားကို ကိုယ်ကျွေးပါ့မယ် "

Santa ဆက်မပြောတော့ပဲ သားရဲ့ဖြည့်စွတ်စာဗူးလေးကို phi Perth ရှေ့ချပေးလိုက်ပြီး နို့ဗူးကိုပါ သားလက်ထဲထည့်ပေးလိုက်သည် ။ ဖြည့်စွတ်စာဆိုပေမယ့် Santa ကိုယ်တိုင် သေချာချက်ထားခြင်းဖြစ်သည် ။ Santa က အမျိုးသမီးများကဲ့သို့တော့ နို့မတိုက်နိုင်ပေ ။ ထို့ကြောင့် phi Perth က သားအတွက်အကောင်းဆုံးထောက်ခံချက်ရထားသည့် နို့မုန့်ကိုသာ သားအတွက် ဝယ်ပေးသည် ။ သားကလည်း မိခင်နို့မသောက်သုံးရပေမယ့် ဖွံဖြိုးမှုနောက်နှေးခြင်းမရှိသည်မို့ တော်သေးသည် ပြောရမည် ။

" စားလေ အချစ် "

သားကို ခွံပေးရင် ပြောလာသည့် phi Perth အသံကြားမှ Santa အတွေးတို့ကို ရပ်လိုက်သည် ။

" အာ ... လေယာဉ်ပျံကြီးလာပြီး "

" အာ "

" ဟားဟား ငါ့သားက အတတ်ကလေးပဲ "

" ဟ ! "

သားကို စနှောက်ကာခွံကျွေးရင်း သဘောတကျဖြစ်နေသူ၏ နှုတ်အနား ဇွန်းဖြင့်ခပ်ထားသော ထမင်းကိုတိုးပေးကာ ပြောလိုက်တော့ သူ့အားကြည့်လာသည် ။

" ဟပါဆို ! "

ထိုအခါမှ ပါးစပ်ဟပေးတာမို့ Santa ထမင်းကို သေချာခွံပေးလိုက်သည် ။ အခြေအနေသည် သားကို phi Perth က ခွံကျွေးနေပြီး Santa ကတော့ သူတစ်ဇွန်းစားလိုက် phi Perth ကို တစ်ဇွန်းခွံကျွေးလိုက်နဲ့ စားနေသည့်ထမင်းများကပင် တမူထူးပြီး အရသာပြည့်နေသလိုခံစားရသည် ။

" ဒီတစ်သက်တော့ ခင်ပွန်းလေးရဲ့လက်ရာပဲ ထိုင်စားချင်တော့တယ် "

ထမင်းအား မြိန်ရှက်စွာဝါးနေရင်းဆိုလာပြီး Santa ပါးကိုပါ လာဆွဲပြန်သည်ကြောင့် ပိုတယ်ဆိုသည့်အကြည့်ဖြင့် Santa လှမ်းကြည့်လိုက်သည် ။ ထိုအခါ အသံထွက်တဲ့အထိ ရယ်ပြန်တာမို့ သားကပါ နောက်ကလိုက်ရယ်သည် ။ တကယ်လိုက်လည်း လိုက်တဲ့သားအဖ ။

အချိုတိုအတွင်းပါပဲ ချိုမြိန်လှသည့် ထမင်းဝိုင်းလေးဟာ ပြီးဆုံးသွားတော့သည် ။ Perth က သားကိုသန့်ရှင်းရေးလုပ်ပေးနေတာမို့ သိမ်းစရာရှိတာကို Santa ကပဲသိမ်းပြီး အိတ်ထဲပြန်ထည့်လိုက်သည် ။ ပြီးကာမှ ခွဲလာခဲ့သော သစ်သော်သီးဗူးလေးအား ထုတ်လိုက်တော့ သားက Perth ဆီက ရုန်းထွက်ကာ အသီးဗူးကို ဆွဲတော့သည် ။

ခုဏကမှ ထမင်းစားပြီးတာတောင် ဒီကလေး အစားအသောက်ဆိုရင် ဘယ်တော့မှငြင်းသည်မရှိ ။

" နေအုံး ဒယ်ဒီယူပေးမယ် "

ထိုအခါ ပြန်ငြိမ်သွားတာမို့ Perth သားလက်ထဲကို အသီးတစ်စိတ် ယူကာ ထည့်ပေးလိုက်သည် ။

" ကောင်းလား သားက အသီးကြိုက်တယ်ပေါ့ "

ခေါင်းကို တဆစ်ဆစ်ငြိမ့်ပြရင်း သွားလေးတွေပေါ်သည်အထိ ရယ်ပြလာတဲ့သားက မျက်နှာချိုသွေးနေခြင်းဖြစ်သည် ။

" phi သားက တကယ့်ငလည် "

" ဟုတ်လား ငလည်လေးလား ဒယ်ဒီ့သားက "

" ဟီး ... "

မြင်လား ။ သူ့ဒယ်ဒီပြောသည်ကို ဟီးခနဲရယ်ပြလာပြန်သည် ။ ထိုအခါလည်း သဘောတကျလိုက်ရယ်ရသူတွေက Perth နဲ့ Santa သာ ဖြစ်၏ ။

" phi .... "

နာမည်ခေါ်သံနှင့်အတူ နှုတ်ခမ်းနားထပ်ရောက်လာသည့် အသီးစိတ်ကြောင့် Perth နှုတ်ခမ်းဟပေးလိုက်သည် ။ ဒီလိုနဲ့ တစ်စိတ်ပြီးတစ်စိတ် ခွံကျွေးနေခြင်းကို သားက အောက်ကနေ မော့ကြည့်နေ၏ ။ ပြီးနောက် သူ့လက်ထဲက အသီးကိုလွင့်ပစ်ကာ ထိုင်နေရာမှ အတင်းထသည် ။

" အင်း .... ပါး ! "

ပြီးနောက် phi Perth အားခွံကျွေးနေသည့် အသီးစိတ်ကို လိုက်လုတာမို့ Santa လျှာထုတ်ပြကာ လုလို့မရအောင်လုပ်ပြီး phi Perth ကိုခွံကျွေးလိုက်သည် ။ ထိုအခါ သားက အလိုမကျသည့်ပုံဖြင့် သူ့ဒယ်ဒီကို သေချာကြည့်၏ ။ phi Perth ကလည်း သူ့သားမျက်နှာအားကြည့်ကာ တမင်တကာကို သေချာဝါးပြနေတာ ။

" ခွံကျွေးတာ စားချင်တာလား "

phi Perth ကမေးတော့ ချက်ချင်းခေါင်းငြိမ့်တဲ့ သားက တကယ့်ကို Santa ခွံပေးတာ စားချင်ပုံပေါ်သည် ။

" Do ကို မကျွေးပါဘူး ရော့ ယောက်ျား ! "

Santa တမင်စချင်တာကြောင့် phi Perth ကိုသာ ခွံကျွေးလိုက်ပြီး လိုက်ကြည့်နေသည့်သားကို လျှာထပ်ထုတ်ပြလိုက်သည် ။

" ပါး! ... Do ! "

သားက မျက်နှာလေးမဲ့လာကာ သူ့ကိုယ်သူ ပြန်ပုတ်ပြ၏ ။ ပြောချင်တာက သူ့ကိုလည်းကျွေးပါပေါ့ ။ Santa နဲ့ Perth ရယ်ချင်နေပေမယ့် ဆက်စချင်သေးတာကြောင့် မသိချင်ယောင်ဆောင်ကာ နောက်တစ်စိတ်ကို ထပ်ခွံပေးလိုက်သည် ။ Perth က ထိုသစ်တော်သီးစိတ်အား တမင်တကာ သိသိသာသာဖြစ်အောင် ဝါးပြကာ

" စားလို့ကောင်းလိုက်တာကွာ အချစ်လေး ခွံကျွေးလို့ထင်တယ် "

" ဒယ် ... ဒီ! ဟင့် ... Do Do ! "

သားက မျက်နှာလေးပါ ငိုမဲ့မဲ့ဖြစ်လာပြီး သူ့ဒယ်ဒီရဲ့ ရင်ဘတ်ကို ရိုက်ကာ အော်တော့သည် ။ ထိုအခါ အနေနိုင်စွာ အကျယ်ကြီးရယ်လိုက်မိသူက Santa ။

ရား တကယ်ချစ်စရာကောင်းလို့ သေတော့မယ် ။

" ဟုတ်ပြီ ဟုတ်ပြီ Do ဘာရချင်တာလဲ ဒယ်ဒီ့ကိုပြော "

ထိုအခါမှ ရိုက်နေသည်ကိုရပ်ကာ ငိုမဲ့မဲ့ဖြင့် သစ်တော်သီးစိတ်ဗူးကို လက်ညှိုးထိုးပြ၏ ။ ပြီးနောက် သူ့ရင်ဘတ်သူပုတ်ကာ

" Do ! .... "

Perth ကလည်း သားပုံစံလေးကို အူယားလွန်းတာရော သနားတာရောမို့ ဆက်မစတော့ပဲ သစ်တော်သီးစိတ်ကို ယူကာ ခွံကျွေးဖို့ ပြင်လိုက်သည် ။ သို့သော်

" မပေးပါဘူး ပါပါးယောက်ျားအတွက် "

Santa က မရင် ထိုဗူးလေးအားယူလိုက်ကာ သားကိုကြည့်ပြီးပြောလိုက်တာမို့ Perth ခေါင်းခါရင်းသာ ပြုံးလိုက်သည် ။ သားကို မငို ငိုအောင်စမှာ သေချာလေသည် ။

" အင့် ! ဒယ့် .... Do "

သားက တကယ့်ကို ငိုချတော့မည့်ပုံဖြင့် Perth ကိုကြည့်ကာ ပြောလာသည် ။

" ယောက်ျား ... Do ကို မကျွေးနဲ့နော် "

" အင်းအင်း မကျွေးဘူး "

" အင့်! အီး! "

သားက ချက်ချင်းငိုချပစ်တော့၏ ။ ထိုအခါမှ ပါပါးပေါက်စလေးက အသီးဗူးကိုချကာ သူ့သားကို လှမ်းပွေ့တော့သည် ။ မျက်နှာလေးကလည်း ပြုံးလို့ ။ ငိုအောင်စ ပြီးရင် ပြန်ချော့ တကယ့်လည်း လိုက်တဲ့သားအဖ ။

" ပါး ! .... "

" ဟော ငိုပါနဲ့ကွာ ... ပါပါးက ချစ်လို့စတာလေနော် "

" အင့် .... ! "

" ဟုတ်ပြီဟုတ်ပြီ ပါပါး ခွံကျွေးမယ်နော် Do ကို "

တော်တော် ဝမ်းနည်းသွားပုံရတဲ့ သားက Santa လည်ပင်းကို ဖက်ပြီးကို ငိုတော့သည် ။ Perth ကတော့ ထိုသားအဖအား ပြုံးလျက်ကြည့်နေရုံသာ ။ သူလည်း ဝင်စခဲ့တဲ့လူဆိုပေမယ့် သားက ငိုနေတဲ့အချိန်ဆို သူ့ပါပါးအနားကို ပိုကပ်၏ ။

" ဒီကိုကြည့်ပါအုံး ပါပါးအချစ်လေး "

အတင်းဆွဲခေါ်ကာ ပေါင်ပေါ်ထိုင်ခိုင်းတဲ့အထိ ရှိုက်ငိုနေတုန်းမို့ သားမျက်ရည်လေးတွေကို သုတ်ပေးလိုက်သည် ။

" ဟုတ်တယ်ကွာ ပါပါးသားလေးကို ဘယ်သူစတာလဲ ဒယ်ဒီလား ဟုတ်လား "

" ဒယ့် ! "

" ဟုတ်တယ် ဒယ်ဒီကို ပါပါး ရိုက်လိုက်မယ်နော် "

ဆိုတော့ ခေါင်းငြိမ့်ပြတဲ့သားကြောင့် တရားခံက Perth ဖြစ်သွားရော ။ တကယ့်ကို သဘောကျပြီးချစ်စရာကောင်းလွန်းလို့ Perth မျက်ခုံးနှစ်ဖက်ကြား လက်ထောက်၍ နက်နက်ခြိုက်ခြိုက် ရယ်လိုက်မိသည်အထိ ။

" အာ ... ဟပါအုံး ပါပါးခွံကျွေးမယ်နော် "

သားကို အသီးစိတ်လေးတွေ ခွံကျွေးကာ ထပ်ချော့တော့ မငိုတော့ဘဲ ရှိုက်သာရှိုက်၏ ။ ပြီးနောက် မဲ့နေတဲ့ရုပ်ကလေးနဲ့ အသီးတွေကို တမြှုပ်မြှုပ်ဝါးနေပုံပါ အသဲယားဖို့ကောင်းလွန်းလို့ Perth ဖုန်းထုတ်ကာ video အတိုလေးရိုက်နေမိသည် ။

" ဒယ်ဒီက အကျင့်ပုတ်တယ်နော် "

" ပုတ် ! "

" ဟုတ်တယ် အသီးတွေကို ဒယ်ဒီ့ကို မကျွေးတော့ဘူး ပါပါးတို့ပဲ စားကြမယ်နော် "

-----

Domiia လေး တစ်နှစ်ပြည့်ပြီးနောက် ။

ယခု၌ သားအဖသုံးယောက်လုံး မရောက်တာကြာပြီဖြစ်သော ပင်လယ်နားရှိအဖြူရောင် အိမ်လေးသို့ရောက်နေကြခြင်းဖြစ်သည် ။ ညနေရေဆော့ရန် နေ့ခင်းဘက် တစ်ရေးတစ်မော အိပ်နေကြခြင်းပင် ။ Domiia လေးက Santa၏ရင်ခွင်ထဲတွင် အိပ်နေပြီး ထိုနှစ်ယောက်လုံးကို နောက်မှသိုင်းဖက်ထားသူကတော့ Perth ဖြစ်သည် ။

အရင်ဦးစွာ နိုးလာသူကတော့ Perth ဖြစ်ပြီး ရင်ခွင်ထဲမှာ အိပ်စက်နေသူလေး၏ ဆံပင်လုံးလုံးလေးကို နမ်းရှိုက်လိုက်ပြီး ထချင်စိတ်မရှိတာကြောင့် ပို၍တင်းကျပ်အောင်ဖက်ထားလိုက်ကာ ငြိမ်နေလိုက်သည် ။ ထိုအခါ ခပ်တင်းတင်းဖက်လိုက်ခြင်းကြောင့် ရင်ခွင်ထဲက ချစ်ရသူက အနည်းငယ်လွန့်လူးလာသည် ။

" နိုးသွားပြီလား ... "

" အင်း ... "

ပြောပြီးနောက် တစ်ဖက်လှည့်နေရာမှ Perth ဖက်လှည့်လာသည်မို့ ရင်ခွင်ထဲ လုံးလုံးလျားလျားရောက်ရှိသွား၏ ။ သားကတော့ ဘေးတစ်ဖက်တွင် ငြိမ်လိက်အိပ်ပျော်နေဆဲ ။ သူ့ပါပါးဖက်မထားတော့ ခြင်းကိုတောင် သိပုံမပေါ် ။

" ပြန်အိပ်ချင်သေးလား "

ထိုအခါ ရင်ခွင်ထဲပိုတိုးဝင်ကာ ခေါင်းယမ်းပြတာမို့ ဆံပင်လေးတွေကို ပွတ်သတ်ရင်း လက်တစ်ဖက်ကလည်း ကျောငယ်လေးအား သိမ်းကျုံးဖက်လိုက်သည် ။ ပြီးနောက် နဖူးလေးအား ငုံ့နမ်းလိုက်တော့ ရင်ခွင်ထဲမှ မော့ကြည့်လာ၏ ။

" ဘယ်နှ နာရီရှိပြီလဲဟင် "

" ၄ နာရီခွဲတော့မှာ "

" သားနိုးလာရင် ရေသွားဆော့မယ်နော် "

" အင်း အခုတော့ ကိုယ်နဲ့ခဏဆော့ "

ထိုအခါ မျက်စောင်းဝံ့ဝံ့လေးက ဒိုင်းခနဲရောက်လာတာမို့ Perth ပြုံးလိုက်သည် ။

" မဆော့ချင်ဘူးလား ... သားမနိုးခင်လေ "

ခပ်တိုးတိုးလေးပြောလိုက်တော့ မျက်နှာလေးက သိသိသာသာရဲတက်လာသည် ။ ကလေးတစ်ယောက်သာ ရပြီးတာ ဒီကောင်လေးက အမြဲတမ်းရှက်တတ်တုန်း။

" ခဏပဲလေ နမ်းရုံပဲ "

" .... "

" နော် Tata "

" မရ ... အွန့် "

ငြင်းမယ်ပြင်လိုက်သော်လည်း နှုတ်ခမ်းသားတို့သည် သိမ်းပိုက်ခံလိုက်ရသည်မို့ ခဏငြိမ်လိုက်မိသည် ။ ပြီးကာမှ မျက်လုံးတွေကို မှိတ်ချပြီး ထိုအနမ်းတို့သား အလိုက်သင့် တုံ့ပြန်နေလိုက်သည် ။ အနမ်းတို့သည် အကြမ်းတမ်းပါ ။ နူးညံ့ညှင်သာလွန်းသည်မို့ ခံစားချက်က တသိမ့်သိမ့်ရယ် ။ လျှာဖျားရဲ့အထိအတွေ့ကအစ နွေးထွေးနူးညံ့လွန်းတာမို့ အချိန်အတော်ကြာတဲ့အထိ အလွှတ်မပေးမိကြပေ ။ Santa မောသလို ခံစားလာရသည့်အခါမှ ရင်ဘတ်အားအသာပုတ်လိုက်တော့ လွှတ်ပေးလာသည် ။ သို့သော် မျက်နှာကိုခွါမသွားပဲ နဖူးချင်းထိစပ်ထားကာ ပြုံးလျက်ကြည့်နေသည့် မျက်ဝန်းများက နွေးထွေးမှုအပြည့် ။

" ချစ်တယ် ... "

" ကျွန်တော်လည်း ချစ်တယ် "

ထိုအခါ ပို၍ သိသိသာသာကွေးတက်သွားသည့် နှုတ်ခမ်းများက ရင်ခုန်ဖွယ်အတိ ။ ပြီးနောက် ဆက်နမ်းလာဖို့ လုပ်နေတာမို့ Santa ရင်ဘတ်ကိုတွန်းကာ တားထားလိုက်ရသည် ။

" သားနိုးတော့မှာ "

" အင်း ဒါဆို ညမှဆက်မယ် "

" .... "

" နမ်းရုံနဲ့ မရဘူး "

ပြောပြီးသည်နှင့် ရင်ခွင်ထဲအတင်းထည့်ချုပ်ကာ ဖက်လိုက်သူကြောင့် Santa ဘာမှမပြောတော့ဘဲ ငြိမ်နေလိုက်တော့သည် ။

သိပ်မကြာလိုက် သားက နိုးလာတာမို့ ရေသွားဆော့ရန် ပြင်လိုက်ကြတော့သည် ။ ပင်လယ်သို့ရောက်ချိန်တွင် ပထမဆုံးပင်လယ်ကို မြင်ဖူးတဲ့သားက တအံ့တဩဖြစ်နေပုံပေါ်သည် ။ သို့သော် ရေကြိုက်တတ်တာမို့ ကြောက်နေတာမျိုးတော့ မရှိပေ ။

" ပါး Ta ... ပင်ရယ် ခစ်ခစ် "

ရေစပ်နားတွင် ရပ်နေသည့်သားအား phi Perth က ရေထဲအရင်ဆင်းကာ ရေဖြင့်ပက်လိုက်သည်မို့ သားက သဘောတကျရယ်၏ ။

" လာ ဒယ်ဒီ့ဆီ "

Phi Perth က သားကို ရေထဲကိုလာရန်ခေါ်သည် ။ အခုထိ Santa နဲ့သားက ကမ်းစပ်တွင်ရပ်နေတုန်းရှိသေး၏ ။ သားက သူ့ဒယ်ဒီခေါ်တော့ Santa လက်ကိုလွှတ်ကာ သူ့ဒယ်ဒီဆီသွားရန်ပြင်သည် ။ သို့သော် ပင်လယ်ရေအေးအေးက သားခြေထောက်ကို လာထိလိုက် ပြန်ထွက်သွားလိုက်လုပ်နေသည့်အပေါ် သားကငြိမ်လျက် စိတ်ဝင်စားနေ၏ ။ Santa နဲ့ Perth ကတော့ သားကို ပြုံးလျက်သာ ကြည့်နေကြသည် ။

သားက ရေတွေ သူ့ခြေထောက်နားရောက်လာလျှင် ထွက်ပြေးပြီး ရေပြန်ကျသွားလျှင် နောက်က လိုက်သွားသည် ။ ဒီလိုဖြင့် ဒီရေနောက်လိုက်ကာ ဆော့နေသည့်သားက သဘောတကျဖြင့် ရယ်မောလျက် ။

" ဒယ်ဒီ ရေ ထိဝူး "

ထူးဆန်းနေသည့်သားက သူ့ဒယ်ဒီကိုပါ ပြောပြနေသေး၏ ။

" ဒယ်ဒီ! "

အသဲယားလှလွန်းနေပြီဖြစ်သည်ကြောင့် Perth သားကို ပွေ့ချီလိုက်ရာ ရေထဲသို့ခေါ်လာလိုက်သည် ။ ပြီးတော့ ရေထဲသို့ချပေးလိုက်တော့ သားက Perth လက်ကိုဆွဲကာ အနည်းငယ်တော့ ကြောက်နေပုံရသေးသည် ။ လိုင်းကလည်း တစ်ချက်တစ်ချက် ပုတ်တတ်သည်မို့ သားကိုလှဲမသွားစေရန် သေချာထိန်းထားပေးလိုက်သည် ။ ခဏအကြာတွင်တော့ သားကမကြောက်တော့ဘဲ ရေထဲတွင် ပျော်ပျော်ကြီးဆော့နေတော့သည် ။

Santa ကတော့ ရေထဲသို့မဆင်းသေးဘဲ ကမ်းစပ်မှနေ၍သာ ထိုသားအဖနှစ်ယောက်ကို ကြည့်နေလိုက်သည် ။ ပြီးနောက် ဓာတ်ပုံရိုက်ရန် ယူလာသော ကင်မရာလေးဖြင့် သားနဲ့ phi Perth အား တစ်ပုံပြီးတစ်ပုံရိုက်ပေးနေမိ၏ ။ ပြီးကာမှ ကင်မရာလေးကို ခပ်လှမ်းလှမ်းက သဲပြင်ပေါ်ချထားလိုက်ကာ ကမ်းစပ်နားပြန်လျှောက်လာခဲ့လိုက်သည် ။ ထိုအခါ phi Perth နဲ့ သား၏ ရယ်သံတို့သည် နေရာတခွင်ပျံ့နှံ့စွာ ကြားလာရ၏ ။ ထိုမြင်ကွင်းနဲ့ရယ်သံလေးသည် Santa ရင်ကို နွေးထွေးစေ၏ ။

တစ်သက်လုံး နောင်တမရသောအရာတို့သည် phi Perth နဲ့ သားသာ ဖြစ်ပေလိမ့်မည် ။ မိသားစုငယ်လေးတစ်ခု ဖြစ်လာခဲ့ခြင်းအပေါ်လည်း များသွာကျေနပ်မိသည် ။

" ပါပါး ... ဆော့မယ် ရာခဲ့ "

သား၏ ခေါ်သံလေးကြောင့် Santa ပါ ရေထဲဆင်းလိုက်ကာ သုံးယောက်လုံး ပျော်ရွှင်စွာဖြင့် ရေကစားကြတော့သည် ။ ရေဆော့ပြီးကြချိန်တွင်တော့ ကမ်းစပ်တစ်လျှောက်တွင် သားလက်ကလေးအား တစ်ဖက်တစ်ချက်စီတွဲလျက် လမ်းလျှောက်ဖြစ်ကြသည် ။

ညနေခင်းပေမို့ ပင်လယ်၏အလှသည် လိမ္မော်ရောင်သန်းချင်နေပြီး လှိုင်းလုံးများကလည်း သေသပ်လှပလွန်း၏ ။ ထိုသည်ထက် လှပသော မြင်ကွင်းလေးသည် ကလေးငယ်လေးနှင့်အတူ လမ်းလျှောက်နေကြသူများဖြစ်သည် ။ မြင်ကွင်းသည် လုံးဝပြီးပြည့်စုံနေပြီး မေတ္တာတရားတို့ ပြည့်လျှံလျက်ရှိ၏ ။

" ဒယ်ဒီ .. "

" ဗျာ "

" ပါပါး "

" ဗျာ "

" ချစ်ရယ် "

ထိုစကားသံငယ်လေးကြောင့် Perth ရော Santa ရော နှလုံးအိမ်အထိ နွေးထွေးမှုများ စီးဆင်းသွား၏ ။ သူတို့ရဲ့ အနာဂတ်ကလေးသည် ဘယ်လောက်တောင် ချစ်ဖို့ကောင်းနေလိုက်ပါသလဲ ။

-----

( * ကလေးတွေနဲ့ ပတ်သက်ပြီး ဘယ်အရွယ်မှာဘာတတ်လောက်ပြီလဲကို သိပ်မသိပါဘူးမေမေ့ကို မေးတော့ ကျွန်မ ၁ နှစ်သမီးကတည်းက စကားကို စွာတေးလံနေအောင် ပြောတတ်ပြီလို့ ပြောပါတယ် အဲ့တာကြောင့် ၁၀ လသားအရွယ်မှာ စကားနည်းနည်းပြောတတ်လောက်ပြီလို့ ယူဆပြီး နာမည်ခေါ်တတ်တဲ့ပုံစံလေး ထည့်ရေးလိုက်တာပါ

အမှားပါသွားရင် ခွင့်လွှတ်ပါရှင့် 🤍 )

5К2840

Previous chapter Next chapter

There are no comments yet. Log in to be the first to leave a review!

39

Similar stories