10

15:01, 14 May 2025

Camp ထဲသို့ တိုးကာဝင်ရောက်လာသည့် အလင်းရောင် နွေးနွေးကြောင့် Santa ဆက်အိပ်၍ မရတော့ပါ ။ ထို့ကြောင့် မျက်လုံးတို့အား ခပ်ဖွဖွ ဖွင့်လိုက်သည် ။ သူ၏စိတ်အလုံးစုံသည် နိုးတစ်ဝက်ကဲ့သို့ မရေမရာရှိနေသေးသည် ။ ပြီးကာမှ အတွေးထဲသို့ တရိပ်ရိပ်ဝင်ရောက်လာသည့် ညကအခြေအနေများ ။ ထိုအခါမှ မျက်လုံးတို့အား သေချာဖွင့်လိုက်ကာ အိပ်နေရာမှ ထထိုင်လိုက်သည် ။ ဘေးတွင် အရာယွင်းနေသော ခေါင်းအုံသာရှိပြီး ပုံမပျက်ခေါက်လျက်သားစောင်တစ်ခု ။ ညက .... ညက နှစ်ယောက်လုံး စောင်တစ်ခုထဲကိုဘဲ အတူတူသုံးခဲ့ကြတာ ။

phi Perth က ဘယ်အချိန်ထသွားတာလဲ ။

အိပ်ရာထက် ငူငိုင်ငိုင်ထိုင်လိုက်ကာ စောင်ထဲမှလည်း မထွက်မိသေးပါ ။ ဘေးပတ်ပတ်လည်အား လိုက်ကြည့်တော့ တိတ်ဆိတ်နေခြင်းမှလွဲရင် မည်သည့်အရိပ်ရောင်မှရှိမနေတော့ပါ ။ အိပ်မက်ကနေ နိုးလာရသလို တကယ်ရော ဟုတ်ရဲ့လားဟုပင် မေးလောက်စရာကောင်းလွန်းသည် ။ တကယ်ဟုတ်ခဲ့ပါသည်ဆိုလျှင် မည်သို့မျက်နှာချင်းဆိုင်ရမည်နည်း ။ ရှောင်နိုင်ပါတယ် ကင်းနိုင်ပါတယ်ဟူ၍ ချပြခဲ့သမျှသည် သဲထဲရေသွန်သလို ပျောက်ကွယ်သွားချေပြီ ။ ယခု၌ သူသည် အရင်အတိုင်းမပြောင်းလဲရှိနေသေးကြောင်း တစ်ဖက်လူက တိတိကျကျသိသွားပြီမဟုတ်လား ။

အတွေးများစွာဖြင့် သက်ပြင်းတိုးဖွဖွအား စိတ်လိုလက်ရ ချလိုက်မိတော့သည် ။ တစ်ညလုံး ထိုရင်ခွင်၌ ဝင်အိပ်ခဲ့ခြင်းသည်လည်း တကယ့်ကိုအရှက်မဲ့စွာ ။ ထိုအခြေအနေသည် အရင်အချိန်များကဲ့သို့ဆိုလျှင်တော့ သူတို့အတွက် မထူးခြားပါ ။ သို့ယခုအခြေအနေအရဆိုလျှင်တော့ မရိုးရှင်းနိုင်ဘူးမဟုတ်လား ။

" နိုးနေပြီလား ! "

ကြားလိုက်ရသည့် အသံကြောင့်မော့ကြည့်လိုက်တော့ ကိုယ့်မျက်လုံးကိုယ်ပင် မယုံနိုင်ဖြစ်သွားသည် ။ အနည်းငယ် ကြောင်အမ်းအမ်းကြည့်မိပြီးကာမှ အသိဝင်လာကာ ချက်ချင်းမျက်နှာကို ငုံ့ချပစ်လိုက်သည် ။

သဘက်တစ်ထည်ကိုသာ ခါးမှာပတ်ထားလျက် ရေချိုးခန်းထဲမှထွက်လာသူသည် ပုံမှန်အခြေအနေတစ်ခုဟု ထင်နေပုံရသည် ။ တောင့်တင်းသောခန္ဓာကိုယ်ပေါ်ရှိရေစက်များသည်လည်း ဟိုတစ်စဒီတစ်စ ကျန်ရှိလျက်ရှိနေသေးသည် ။ ဆံပင်များတွင်လည်း ရေစက်တွေတွဲလှဲခိုလာပုံအရ ခေါင်းလည်းလျှော်လာပုံရပါသည် ။ အချိန်ခဏလေး ငေးကြည့်မိလိုက်တာဆိုပေမယ့် ခေါင်းငုံ့လိုက်ချိန်မှာတောင် တစ်ကွက်ချင်းထင်ထင်ပေါ်ပေါ်ဖြစ်လာသည့် မြင်ကွင်းကြောင့် စိတ်ရှုပ်လာရသည် ။

ဘာကိစ္စနဲ့ ဒီတိုင်းကြီးထွက်လာရတာတဲ့လဲ ။

" ဘာလို့လဲ စိတ်ဆိုးနေတာလား "

Perth ရေချိုးပြီးထွက်လာသော အိပ်ရာပေါ်ထိုင်လျက်ငြိမ်နေတဲ့ကောင်လေးကို တွေ့ရသည် ။ သို့သော် သူမေးသည်ကို ကြောင်အမ်းအမ်းမော့ကြည့်ကာ ခေါင်းငုံ့ချသွားသူက လုံးဝမော့ကြည့်မလာတော့တဲ့အပြင် မျက်ခုံးတွေပါ တွန့်ချိုးလို့ ။ ထို့ကြောင့် အနားသို့တိုးကပ်သွားလိုက်ကာ ညတုန်းကနမ်းမိတာကို စိတ်ဆိုးနေတုန်းထင်၍ မေးလိုက်မိသည် ။ သို့သော် ပို၍ခေါင်းငုံ့သွားသူက သေးသေးလေးမှ မော့ကြည့်မလာတော့ပါ ။ Perth ထိုကောင်လေး၏ ဘေးတွင်ဝင်ထိုင်လိုက်ကာ

" တစ်ခုခုဖြစ်လို့လား ညက ကိစ္စကိုစိတ်ဆိုးတာလား "

" မဆိုးဘူး ! "

မဆိုးဘူးဟုပြောပေမယ့် မျက်နှာကိုပါ တစ်ဖက်သို့ ပိုပြီးလွှဲချလိုက်သူကြောင့် Perth တကယ် ဘာဖြစ်လို့ဖြစ်မှန်းမသိတော့ပေ ။ အတွေးများနေတုန်းမှာပင် ရဲတက်နေတဲ့ နားရွက်ဖျားလေးတွေဆီ အကြည့်ရောက်သွားသည် ။ ထို့ကြောင့် Perth မျက်ခုံးတွေပင် ပင့်သက်သွားမိသေးသည် ။

ဒီကောင်လေး ရှက်နေတာ ။

ထိုအခါမှ ကိုယ့်ကိုကိုယ်သတိရသွားသည် ။ သူအင်္ကျီမဝတ်ရသေးဘူးမဟုတ်လား ။ တကယ်တော့ ရည်ရွယ်ချက်ရှိရှိ ဒီပုံစံထွက်လာတာ မဟုတ်ပါ ။ ဒီကောင်လေး အိပ်နေသေးသည်ထင်လို့ ထွက်ခဲ့မိလိုက်တာ ။ ထွက်လာတဲ့အချိန် အိပ်ရာပေါ်ထိုင်နေတဲ့ကောင်လေးကိုမြင်တော့ သူမေ့သွားတော့တာဖြစ်သည် ။ ရှက်နေသည့်ပေါက်စကို ပြန်ကြည့်လိုက်တော့ စချင်စိတ်ဟာ ပိုပြီးတဖွားဖွား ။ ထို့ကြောင့် အနားသို့ပိုတိုးကပ်သွားလိုက်ကာ ရှက်နေသည့်မျက်နှာလေးအား လက်ဖြင့်ဆွဲယူလိုက်သည် ။ ထိုအခါ မျက်နှာလေးပါရဲတက်သွားသည်မို့ Perth ရယ်ချင်စိတ်ကို မနည်းထိန်းထားရသည် ။

" ဘာဖြစ်တာလဲဆိုတာ ပြောပြမှသိမှာပေါ့ "

" ..... "

" နမ်းလိုက်လို့လား ! "

Perth စကားအဆုံး ပါးတွေကအစ ရဲတက်ကုန်ကာ မျက်လုံးလေးကလည်း ပြူးကျယ်သွားသည် ။ ပြီးမှ မျက်လွှာလေးချသွားကာ ဘေးသို့အကြည့်လွှဲသွားသည် ။ မျက်ခုံးတွေကအစ တွန့်ချိုးလာပုံအရ သူစိတ်မကြည်တော့မှန်း Perth သိလိုက်သည် ။ ဆက်စမယ်ဆိုရင် Pongsapak ၏ စိတ်ကောက်နိုင်ချေက အမြင့်ဆုံးမှာရှိသည် ။ စိတ်ကောက်ရင် စကားကိုအကန်တွေပြောပြီး ကန့်လန့်တွေလုပ်တော့မှာ ။ ထို့ကြောင့် စိတ်ကောက်လို့မဖြစ်ပါ ။

" ဒီလိုပုံစံငယ်ငယ်ကလည်း မြင်ဖူးတယ်မဟုတ်လား "

" ကလေးမဟုတ်တော့ဘူးလို့ ခဏခဏပြောပြီးပြီ "

ပြန်ဖြေလိုက်သည့်စကားကြောင့် Perth သဘောမကျဘဲမနေနိုင်တော့ပါ ။ ရယ်ချင်စိတ်ကိုလည်း ထိန်းမရတော့ပေ ။ ထို့ကြောင့် လက်ဖြင့်မျက်ခုံးနှစ်ခုကြားထိကိုင်ရင် မျက်နှာကိုအုပ်လျက် ရယ်မိလိုက်သည် ။ တကယ့်ကို အူယားစရာကောင်းလွန်းလို့ ဘယ်လိုလုပ်ရမလဲ ။ ( အဲ့လို ရယ်တဲ့ပုံစံလေး သိကြရဲ့လားတကယ်ဆွဲဆောင်မှုအပြည့် ကျွန်မသိပ်သဘောကျတာ )

Santa ရယ်သံဖွဖွကြောင့် လှည့်ကြည့်လိုက်တော့ လက်ဖြင့်မထိတထိအုပ်ကိုင်ရင်းဖြင့် အသံလွင်လွင်ထွက်ကျတဲ့အထိ ရယ်မောနေသူကြောင့် မှင်သက်မိသွားသည် ။ ခဏအကြာမှ ရယ်တာရပ်ကာ သူ့အားပြန်ကြည့်လာသူက မျက်နှာကလည်း အပြုံးမပျက် ။ အင်းလေ သူကရှက်တဲ့လူမှ မဟုတ်ဘဲ ။ ရယ်နိုင်မှာပေါ့ ။

" မရယ်နဲ့ ! "

" Pongsapak က ချစ်စရာကောင်းနေလို့ "

ပြောပြီးသည်နှင့် အနားသို့ပိုပြီးတိုးကပ်လာပြန်သည့်လူကြောင့် Santa နောက်သို့ဆုတ်မိလိုက်သည် ။ သို့သော် နှုတ်ခမ်းထောင့်နားသို့ကျရောက်လာသည့် အထိအတွေ့ကြောင့် Santa မျက်လုံးတို့ ဝိုင်းစက်သွားရပြန်သည် ။ ရုတ်တရက်ဆန်လွန်းတာမို့ ပြုံးလျက်ကြည့်လာသူကို မြင်မှ အသိပြန်ဝင်လာသည် ။

" phi Perth ..... "

တိုးဖွဖွခေါ်မိတော့ ဆံပင်အားထိုးဖွလာသူက သူ့အားငယ်ငယ်ကအတိုင်း ကလေးလေးတစ်ယောက်လို ဆက်ဆံနေပြန်သည် ။

" ဒီနေ့ကစပြီး .... "

" .... "

" ကိုယ်တို့ အဆင်ပြေပြေ နေကြရအောင် "

ယခုအခြေအနေသည် နှစ်ယောက်ကြား၌ မည်သည့်ကိစ္စမျှ မရှိခဲ့ပါသလို သက်တောင့်သက်သာဖြစ်နေလွန်းသည် ။ သို့သော် တကယ်အဆင်ပြေနေတာလား ခဏတစ်ဖြုတ်ဘဲလားဆိုတာတော့ သူတို့ကိုယ်တိုင်လည်း မသိပါ ။ ပြီးတော့ နှစ်ယောက်လုံးရဲ့စိတ်ထဲမှာရော ဘာတွေရှိနေကြတာတဲ့လဲ ။

------

အခြား Company ၏ တာဝန်ခံရောက်ပြီဟူ၍ လာပြောခြင်းကြောင့် သွားတွေ့ရန်ထွက်လာခဲ့ကြသည် ။ ဆောက်လုပ်ရေးပိုင်းမှာ သွားတွေ့ရမှာဖြစ်သည့်အပြင် နေ၏အပူဒဏ်ဟာလည်း ခပ်ပြင်းပြင်းရှိလှသည် ။ ထို့ကြောင့်် Camp ထဲနေခဲ့ပါဟုပြောသော်လည်း ပြောမရသူကြောင့် လက်ထဲ၌ ထီးတစ်လက်သည် တာဝန်တစ်ခုကဲ့သို့ ပါလာတော့သည် ။ အဝေးကနေ လှမ်းကြည့်မည်ဆိုပါလျှင် ထီးတစ်လက်အားကိုင်ကာ အရိပ်ငယ်လေး နေမထိစေဖို့ ကြိုးစားနေသူအား ကွက်ကွက်ကွင်းကွင်းမြင်ရမှာသေချာသည် ။ ဘေးရှိ ဝန်ထမ်းကောင်လေးက ထီးလိုက်ကိုင်ပေးပါ့မယ်ဆိုတာတောင် သူငြင်းခဲ့တာ ။ ဒီနေ့မှ သူ့စိတ်တွေဘာကြောင့် ပိုပြီးကြည်လင်သာယာနေရပါသနည်း ။ နှစ်ချီပြီးဟာတာတာဖြစ်နေခဲ့သည့် ကွက်လပ်တစ်ခု ပြည့်သွားသလို ခံစားချက်မျိုးနှင့်အလားတူသည် ။

ရုံးခန်းထဲသို့ရောက်ချိန်တွင် ထိုင်စောင့်နေသည့် တာဝန်ခံက မတ်တပ်ရပ်ကာ ချက်ချင်းနှုတ်ဆက်လာသည် ။ ပြန်နှုတ်ဆက်ရန်ကြည့်လိုက်ချိန်တွင်တော့ Perth မျက်ခုံးတွေ တွန့်ချိုးသွားတာ မည်သည်ကို ဒေါသထွက်လို့ ထွက်သွားမှန်းမသိတော့ပေ ။ အဲ့ဒီကောင်က ...

" Santa ... Santa မလား "

" phi Eyan .... "

" Santa phi ကိုမှတ်မိနေတာ ဝမ်းသာလိုက်တာ "

ထိုသို့ပြောကာ ထိုင်နေရာမှ အနားသို့ချက်ချင်းရောက်လာသူသည် အရမ်းဝမ်းသာနေသည့်ပုံဖြင့် မျက်နှာကြီးကအစ ပြုံးရွှင်လို့ ။

" Santa ကိုတွေ့ချင်လို့ phi လိုက်ရှာသေးတယ် UK ကိုသွားတယ်ဆိုတဲ့ သတင်းဘဲကြားလိုက်ရတာ .... ပြီးတော့ လွမ်းနေတာ "

ပိုင်စိုးပိုင်နင်းပြောနေသူသည် Perth ကိုလည်း မြင်ပုံမပေါ်ပါ ။ ဖြစ်နိုင်လျှင် ဆွဲထိုးပစ်ချင်စိတ်က တဖွားဖွား ။ ငယ်ငယ်ကတည်းက Santa အနားမှာ တောက်တဲ့လို လိုက်လိုက်ကပ်တတ်တဲ့ကောင်မို့ ဒီကောင့်ကြောင့် Perth စိတ်ရှူပ်ရပေါင်းလည်း မနည်းခဲ့ပါ ။ အခုလည်း တိုက်တိုက်ဆိုင်ဆိုင်ပေါ်လာပြန်ပြီ ။ တကယ့်အာရုံဘဲ ။

" Ta လည်း ပြန်တွေ့ရတာ ဝမ်းသာပါတယ် "

" phi က အများကြီးပိုဝမ်းသာတယ်သိလား အခုကရော Santa က ဒီမှာအလုပ်နဲ့ဘဲလား "

" ဟုတ်တယ် ငါ့ Secretary ဘာလုပ်ချင်လို့လဲ ! "

ခပ်မာမာထွက်လာတဲ့လေသံကြားမှ သူ့အားကြည့်လာတဲ့ကောင်သည် အခုမှသူ့ကိုမြင်တဲ့ရုပ် ။ ပြီးနောက် စိတ်ပျက်လက်ပျက်ဖြစ်သွားသည့်ရုပ်ဖြင့် Santa ကိုတစ်လှည့် Perth ကိုတစ်လှည့်ကြည့်ကာ

" အခုထိ မင်းဘဲလား "

" အမြဲတမ်းငါဘဲ !! "

Perth ၏ အဖြေအဆုံးတင်းမာသွားတဲ့ အခြေအနေတစ်ခုသည် အလုပ်ကိစ္စကိုပင် မေ့သွားကြသည့်ပုံ ။ အဲ့တာထက်ကို ငယ်ငယ်ကလို ရန်ထပ်ဖြစ်ကြပါလျှင် ကြားမကောင်းပေ ။ Santa ကြောင့်ဖြစ်တယ်ဆိုရင် ပိုလို့တောင်ဆိုးအုံးမည် ။ ငယ်တော့သည့် အချိန်မှဟုတ်မနေဘဲနဲ့။

" Ta တို့ အလုပ်အကြောင်း အရင်ပြောကြရင်ရော "

Santa ဝင်တားလိုက်တော့မှ အလုပ်အကြောင်းသို့ ခြေဦးပြန်လှည့်ကြသည် ။ ဒါတောင် တစ်ချက်တစ်ချက်ထထဖောက်ကြလို့ ကြားကနေ ဝင်ဝင်တားရသေးသည် ။ phi Eyan က Santa ကို သဘောကျကြောင်းဝန်ခံထားတဲ့လူ ။ ဒါကိုသိတဲ့ phi Perth ကလည်း phi Eyan ကို Santa အနားလုံးဝအကပ်မခံ။ ထို့ကြောင့် phi Perth နဲ့ phi Eyan က ငယ်ငယ်ကတည်းက လုံးဝမတည့်ကြတဲ့လူတွေ ။ အခုအထိလည်း အခြေအနေတွေက ဟန်မနေသေးတာကြောင့် နောက်ရက်တွေ ဘယ်လိုအလုပ်လုပ်ကြမလဲ တော်တော်လေး စဉ်းစားရခက်သည် ။ ပြီးရင် Santa ကဘဲ ကြားကနေရခက်အုံးမှာ ။

" Santa .... phi ကို ဖုန်းနံပါတ်လေးဖြစ်ဖြစ်ပေးပါလား အလုပ်ကိစ္စရှိရင် ပြောလို့ရအောင် "

Camp သို့ ပြန်ခါနီးပြောလာသည့် phi Eyan ကြောင့် Santa ဖုန်းနံပါတ်ပေးဖို့လုပ်လိုက်စဉ် လက်ကိုလာဆွဲသည့်လူကြောင့် တန့်သွားရသည် ။ ထို့ကြောင့် မော့ကြည့်လိုက်တော့လည်း တင်းမာနေသည့်မျက်နှာထားဖြင့်လူက မပေးနဲ့ဆိုသည့်သဘော ။ သို့သော် ရှေ့က phi Eyan ကို ကြည့်ပြန်တော့လည်း မျှော်လင့်တကြီး စောင့်စားနေသည့်ပုံ ။ ထို့ကြောင့် Santa သက်ပြင်းကို ဖွဖွချလိုက်ကာ

" phi Perth .... "

တိုးဖွဖွရေရွက်လိုက်တော့ သူ့အားငုံ့ကြည့်လာပေမယ့် မျက်နှာကသေးသေးလေးမှ မာန်မလျော့သွားပါ ။ အဲ့ဒီအစား ပိုပြီးတွန့်ချိုးသွားတဲ့မျက်ခုံးတန်းနှင့်အကြည့်က ပေးရဲရင် ပေးကြည့်လိုက်လို့ ပြောနေသည့်ပုံ ။ ထို့ကြောင့် Santa တော်တော်လေး အခက်တွေ့သွားသည် ။

" အလုပ်ကိစ္စပြောချင်ရင် ငါ့ဖုန်းကိုဆက်လိုက် "

" ဟ ! မင်းပြောတော့ Santa က Secretary ဆို "

" အင်း မင်းဖြစ်နေလို့ ... Santa သွားမယ် ! "

ပြောပြီးသည်နက် Santa လက်ကိုဆွဲကာ ရုံးခန်းထဲမှထွက်လိုက်သူကြောင့် နောက်ကနေ အမှီလိုက်ရသည် ။ phi Perth က ဒီလိုကလေးဆန်နေလိမ့်မယ်လို့ မတွေးထားခဲ့တာ အမှန်ပါ ။ အခုတော့ တစ်ဖက်ကလူကို အားနာလို့ ဘာလုပ်လို့လုပ်ရမည်မသိတော့ပေ ။ ခပ်လှမ်းလှမ်းသို့ ရောက်ချိန်တွင်တော့ Santa အတင်းရုန်းလိုက်သည် ။ ထိုအခါ သူ့အားလှည့်ကြည့်လာသည့် မျက်ဝန်းက ဘာဖြစ်လို့လဲဆိုသည့် အမေးဖြင့် ။

" ဘာလို့ အဲ့လိုလုပ်တာလဲ "

" ဘာကိုလဲ "

" ကျွန်တော့် ဖုန်းနံပါတ် phi Eyan ကို ပေးလိုက်လို့ရတယ် "

" မင်းက ရပေမယ့် ငါကမရဘူး အဲ့ကောင်ဖုန်းနံပါတ်တောင်းတာ တကယ်အလုပ်ကိစ္စလို့ ထင်နေလို့လား ဘာဖြစ်လာမလဲကို ကြိုသိနေလို့ပြောနေတာ ! "

အခုထိ လေသံမာနေသေးသည့်လူက အခုထိစိတ်မကြည်သေးသည့်သဘော ။ မနက်ကအထိတောင် တစ်ကိုယ်ထဲကိုယ်နေတဲ့လူက အခုကျ ငါလို့ပြောင်းပြောနေပြန်သည် ။ တကယ့်ကို ဒီလူက သူ့စိတ်သူ့ဆန္ဒကြီးဘဲ ။

" phi ထင်သလို ဟုတ်မနေရင်ရော Camp ကို အရင်ပြန်လိုက် ကျွန်တော် ဖုန်းနံပါတ်ပြန်သွားပေးလိုက်မယ် "

ပြောလိုက်ပြီးသည်နှင့် နောက်သို့လှည့်လိုက်ကာ ရုံးခန်းရှိရာသို့ ပြန်သွားရန်လုပ်လိုက်သည် ။ သို့သော် ချက်ချင်းပြန်အဆွဲခံလိုက်ရသည့်လက်ကြောင့် နာသွားရသည့်အပြင် စူးရဲနေသည့်မျက်ဝန်းတွေဖြင့် ရင်ဆိုင်ရပြန်သည် ။

" မင်းကပါ အဲ့ကောင်နဲ့ရောချင်နေတာလား ဟမ်! ဟိုကောင်မင်းကို ဒီလောက်အသေရရ အရှင်ရရလိုချင်နေတာကို မသိဘူးလား !! ဘာလဲ အဲ့ကောင်ကို သဘောကျသွားပြီလား "

ကြားလိုက်ရသည့် စကားသည် ရင်ဝသို့တည့်တည့်ဆောင့်ကန်ခံလိုက်ရသလို ခံစားလိုက်ရသည် ။ ဘာကြောင့် အခုအချိန်ထိ ဒီလိုစကားတွေကို စွပ်စွဲမပြီးဖြစ်နေရတာလဲဆိုတာ Santa လုံးဝ နားမလည်နိုင်ဖြစ်မိသည် ။ ဒီလူသည် သူ့ကို ဘယ်တော့မှ ယုံကြည်မည့်လူမဟုတ်ပေ ။ မနက်ကအထိ အဆင်ပြေပြေရှိနိုင်မည်ထင်ခဲ့ပေမယ့် အခုလိုစွပ်စွဲခံလိုက်ရတော့ အားလုံးဟာ ကြက်ပျောက်ငှက်ပျောက်ဆိုသလို ဘာမှမရှိတော့သည့်အတိုင်းပင် ။ အံကိုတင်းတင်းကြိတ်လိုက်ကာ ထိုလူ့မျက်နှာအား စူးစိုက်ကြည့်လိုက်တော့ ဒေါသရိပ်သန်းနေသော မျက်လုံးနက်နက်တို့သည် သူမှန်သည် ဆိုသည့်သဘောဖြင့် နည်းနည်းလေးမှ မာန်မလျော့ပါ ။

ဟုတ်ပြီ သူ့အမှားဘဲထားလိုက်ပါတော့ ။စကားတွေထပ်မများချင်ဘူးဒီလူနဲ့ထပ်ပြီး စကားနိုင်မလုချင်တော့ဘူးသူ့သိက္ခာကို ထိပါးလာမည့်စကားတို့အား ခံနိုင်ရည်မရှိတော့ဘူး ။

ထိုလူ့လက်ထဲမှ ရုန်းထွက်လိုက်ကာ နေရာမှချက်ချင်းထွက်လာခဲ့လိုက်သည် ။ အဲ့ဒီနေရာမှာ သေးသေးလေးတောင် ရပ်နေချင်စိတ်မရှိတော့ပါ ။ နောက်မှ ကျန်ခဲ့သူသည်တော့ ဘယ်လိုဘယ်ပုံဖြစ်နေမည်မသိ ။ စိတ်လည်း စိတ်မဝင်စားနိုင်တော့ပေ ။

-----

ညအထိ စကားတစ်လုံးမှမပြောတော့သလို အနားကပ်သွားရင်တောင် ရှောင်ဖယ်သွားသည့်တစ်ယောက်ကြောင့် Perth ဘာလုပ်လို့လုပ်ရမှန်းမသိ ။ နေ့လည်က စိတ်တိုပြီးပြောလိုက်တာမို့ သူ့စကားလွန်သွားမှန်းသိပါသည် ။ သို့သော် သူပြောခဲ့သည့် စကားများထဲမှာ တစ်ချို့တစ်ဝက်ကတော့ မှန်နေသည်မဟုတ်လား ။ ဟိုကောင်က တကယ် Santa ကို အသေရရ အရှင်ရရလိုချင်နေတဲ့လူလေ ။ ဖုန်းနံပါတ်သွားပေးရင် လမ်းစချပေးသလို ဖြစ်သွားလိမ့်မည် ။ ဒါကိုတော့ သူ့အနေနဲ့လုံးဝလက်မခံနိုင်ပါ ။

" Tata .... "

ဆိုဖာပေါ်ထိုင်နေသည့် ကောင်လေးအနားကပ်ထိုင်ကာ ခေါ်လိုက်တော့ ချက်ချင်းထထွက်သွားသူသည် သူ့အားသေးသေးပင် လှည့်မကြည့်ပါ ။ အဲ့ဒီအစား အိပ်ရာပေါ်သို့ ရောက်သွားပြန်သည်မို့ လိုက်ရပြန်သည် ။ ထိုအခါလည်း ထထွက်သွားပြန်သည်ကြောင့် လက်ကိုဆွဲလိုက်သည် ။

" စကားခဏပြောမယ် ! "

သို့သော် ဘာမှပြောမလာဘဲ အတင်းရုန်းနေသူသည် မျက်နှာကလည်း တင်းမာလွန်းနေသည် ။ ပြီးနောက် ဘာမှမကြားချင်ဘူးဆိုတဲ့ မျက်နှာထား ။

" ကိုယ်ပြောတာဘဲ ခဏနားထောင်ပေး ဟုတ်ပြီလား "

ဘယ်လိုဘဲပြောပြော ဘာမှပြန်မပြောတဲ့အပြင် ဆွဲထားသည့်လက်ကိုသာ မရမကရုန်းနေတာကြောင့် ကြံရာမရသည့်အဆုံး ခါးမှဆွဲဖက်ကာ ရင်ဘတ်နားသို့ဆွဲကပ်လိုက်သည် ။ ထိုအခါ နီးကပ်သွားသည့် မျက်နှာကြောင့် ဝိုင်းစက်သွားသည့် မျက်ဝန်းတွေက ထိတ်ထိတ်ပျာပျာရယ် ။ သို့သော် ခဏတာ ရင်ဘတ်တွေကိုပါ အတင်းတွန်းကာ ရုန်းလာပြန်သည် ။ Perth ပိုပြီးတင်းကျပ်အောင် ဖက်လိုက်တော့မှ သူ့အားစူးကနဲမော့ကြည့်လာသည့် မျက်လုံးတွေက ဒေါသရိပ်ကလေးတွေပါ မြင်နေရသည် ။ ခဏအကြာမှ ရုန်းနေလည်းမထူးမှန်းသွားပုံရကာ ငြိမ်ကျသွားသည် ။ အကြည့်စူးစူးလေးတွေတော့ ရုတ်သိမ်းမသွားသေးပါ ။

" ဘာလို့ အရမ်းစိတ်ဆိုးလွယ်နေတာလဲ "

" .... "

" အဆင်ပြေပြေ နေကြရအောင်လို့ ကိုယ်ပြောထားတယ်မလား "

" ဟင့်အင်း ဖယ် ... အရင်လွှတ်ပေး !! "

" ကိုယ့်စကားလွန်သွားတာသိတယ် အဲ့အတွက် တောင်းပန်တယ် "

မျက်ဝန်းလေးတွေဆီသို့ ကြည့်ကာ သေချာပြောလိုက်တော့ ပိုပြီးငြိမ်ကျသွားကာ အကြည့်ပါလွှဲသွားပြန်သည် ။ မျက်နှာလေးကတော့ ဆူပုတ်နေတာ မလျော့သွားသေးပေ ။ တကယ့်ကို အများကြီး စိတ်ဆိုးနေတဲ့သဘော ။

" ကိုယ်စိတ်မချရုံပါ ပြီးတော့ Tata စိတ်အနှောက်အယှက်ဖြစ်မှာစိုးရိမ်တာ "

" .... "

" တစ်ခုခု ပြန်မပြောဘူးလား "

ထိုအခါမှ တစ်ခါပြန်စိုက်ကြည့်လာသူက ခုဏကလောက် ဒေါသကြီးနေတာမျိုးတော့ မဟုတ်တော့ပါ ။ သို့သော် စိတ်ဆိုးပြေသွားတာလည်း မဟုတ်သေးပေ ။

" ဘာလို့ အဲ့လိုလူထင်ရတာဘဲ ! "

" ..... "

Perth နားမလည်သလို ကြည့်လိုက်တော့ သက်ပြင်းဖွဖွချလာသူက နှုတ်ကထုတ်ပြောဖို့ ခဲယဉ်းနေသလို ။

" ယောက်ျားတိုင်းနဲ့ ပတ်သက်ချင်နေတဲ့လူလို့ ဘာလို့ထင်နေရတာလဲ "

စကားအဆုံးတိမ်ဝင်သွားသည့် အသံလေးကြောင့် Perth စိတ်မကောင်းဖြစ်မိသည် ။ သူပြောလိုက်သည့် စကားသည် အဲ့ဒီလောက်တောင် ဒီကောင်လေးအပေါ် သက်ရောက်ပါသလား ။ တမင်ရည်ရွယ်ပြီးပြောလိုက်တာ မဟုတ်တာတော့ သေချာပါသည် ။ သို့သော် ဒီကောင်လေး နားလည်အောင် ဘယ်လိုရှင်းပြရမည် မသိတော့ပါ ။

" ကျွန်တော်က phi အမြင်မှာ အဲ့ဒီလောက်တောင် .... "

" ရှူး! ... မပြောနဲ့တော့ "

မျက်ရည်စလေးတွေပါ မြင်နေရပြီမို့ နှုတ်ခမ်းနုနုလေးအား ဆက်မပြောတော့ရန်လက်ဖြင့် အသာဖိကာ တားလိုက်သည် ။ ထိုအခါ ဝိုင်းစက်သွားသည့် မျက်ဝန်းများက မေးခွန်းများစွာ ပြည့်လို့နေသည် ။

" ကိုယ့်စကားတိုင်းကို လိုက်မခံစားနဲ့ မင်းဘဲနာကျင်ရလိမ့်မယ် "

" ..... "

" ကိုယ် စကားပြောမတတ်တာ မင်းအသိဆုံးဘဲ Tata "

phi Perth ရဲ့စကားအဆုံး Santa စိတ်ရော ကိုယ်ပါ ငြိမ်ကျသွားမိသည် ။ ဒီလောက်နဲ့ခံပြင်းလာသည့် ဒေါသက ပြေရောတဲ့လား ။ သူ့စိတ်က အမြဲတမ်း phi Perth ဆိုရင် အနိုင်ပေးနေကျမဟုတ်လား ။ ပြီးနောက် ဘာစကားမျှမဆိုမိကြတော့သလို ဖက်ထားသည်ကိုလည်း လွှတ်မပေးပါ ။ Santaလည်း ဘာမှပြန်ပြောချင်စိတ်မရှိသေးတာကြောင့် မျက်နှာလွှဲလျက်သာ ငြိမ်နေတာဖြစ်သည် ။ ထို့နောက်တွင်တော့ phi Perth ဆီက သက်ပြင်းချသံတိုးတိုးကို ကြားလိုက်ရသည် ။

" Tata .... "

နာမည်ခေါ်သံကြောင့် Santa လှည့်လိုက်ချိန်မှာပင် ဖိပိတ်ခံလိုက်ရသည့် နှုတ်ခမ်းကြောင့် ရှောင်ချိန်ပင်မရလိုက်ပါ ။ မဟုတ်ဘူး ရှောင်ဖို့ကို စိတ်ကူးမရှိတာလည်း ဖြစ်နိုင်သည် ။ ထို့နောက် ဖြေးဖြေးချင်းစုပ်ယူနမ်းရှိုက်ခြင်းကို ခံလိုက်ရပြီမို့ လုံးဝရုန်းထွက်ချင်စိတ်ဟာ မရှိတော့ပါ ။ ထို့ကြောင့် မျက်လုံးတို့အား မှိတ်ချလျက်သာ အလိုက်သင့်ငြိမ်နေပေးလိုက်သည် ။

မှားနေလျှင်လည်း မှားပါစေတော့ ။

အချိန်ခဏကြာသည်အထိ နမ်းရှိုက်ပြီးမှ နှုတ်ခမ်းတို့အား လွှတ်ပေးလာသည် ။ Santa မှိတ်ချထားသည့် မျက်လုံးတိုးအား ဖွင့်လိုက်ချိန်တွင်တော့ သူ့အား အဓိပ္ပာယ်ဖော်မရသော မျက်ဝန်းများဖြင့်ကြည့်သူကြောင့် ရင်ခုန်လာရသည် ။ Santa သည် တကယ့်ကိုအမှတ်မရှိတဲ့လူပါ ။

-----

( ကိုယ်ရဲ့အချစ်ကလေးလာတာတောင် သွားမတွေ့နိုင်လို့ တော်တော်လေး စိတ်ဓာတ်ကျနေပါတယ်သွားတွေ့မယ့် အသဲလေးတွေလည်းဖောင်အောင်ပါစေရှင့် 🥺💕

ဒါနဲ့လေ ဒီအပိုင်းက ချိုရဲ့လားမသိဘူးနောက်တစ်ပိုင်းတော့ ချိုခါးလေးဖြစ်မယ်ထင်တယ်ကျွန်မကလေ ဇာတ်လမ်းစကတည်းကplots ချပြီးသားမို့ အချိုအရမ်းမကျွေးနိုင်တာ တောင်းပန်ပါတယ်ရှင့် 😭 )

5.6К3210

Previous chapter Next chapter

There are no comments yet. Log in to be the first to leave a review!

10

Similar stories