27 . 2

14:33, 31 July 2025

" Ta လေး ! သား Perth သတိရလာပြီ "

တစ်ဖက်ဖုန်းမှ ကြားလိုက်ရသော မေမေ့စကားကြောင့် Santa ဘာမှပင်ပြန်မပြောနိုင်တော့ဘဲ ဖုန်းကိုအိတ်ကပ်ထဲထည့်လိုက်ကာ ကားသော့ဆွဲယူပြီး အိမ်မှချက်ချင်းထွက်လာခဲ့သည် ။

သုံးရက် ။သုံးရက် တိတိ သတိမေ့နေခဲ့တဲ့လူကို Santa တစ်ချိန်လုံး ဆေးရုံမှာသာ စောင့်နေခဲ့သည် ။ ယခုမှ မေမေနဲ့ မေ Ning က အိမ်ခဏပြန်ပြီး နားပါအုံးဆိုလို့ ပြန်ရောက်ရောက်ချင်း ရေချိုးပြီးရုံသားရှိသေး မေမေက phi Perth သတိရနေကြောင်း ဖုန်းဆက်သည်မို့ ကားကို အမြန်မောင်း၍ စိတ်လောနေပြီး ဆေးရုံသို့သာ မြန်မြန်ရောက်ချင်နေမိတော့သည် ။ သတိရလာမယ်မှန်းသိရင် သူအိမ်မပြန်ဘဲ နေလိုက်မိမှာ ။

ဆေးရုံသို့ရောက်ချိန်တွင် သူခြေလှမ်းများသည် ပုံမှန်ထက် သွက်လက်စွာဖြင့် phi Perth ရှိရာဆီသို့ လှမ်းခဲ့မိပြန်သည် ။ သတိရလာပြီပြောတာတောင် သူ့ရင်တွေ ပူနေဆဲပါ ။ ထို့ကြောင့် ဆေးရုံခန်းထဲသို့ ဝင်လိုက်ချိန် ဆရာဝန်ရောက်နေတာမို့ အနောက်မှသာ ငြိမ်လျက်ရပ်နေလိုက်၏ ။ ပြီးကာမှ ကုတင်ထက်ကလူကို ကြည့်တော့ ဆရာဝန်မေးသည်များကို ပြန်ဖြေနေလေသည် ။ အရင်လို ကြည်ကြည်လင်လင်မဟုတ်ဘဲ ဖြူလျော့နေသည့် မျက်နှာသည် သုံးရက်လုံးလုံး သတိမေ့နေခဲ့ခြင်းကြောင့် ဖြစ်ပါလိမ့်မည် ။ အောက်ဆီဂျင်ပိုက်လည်း ဖြုတ်ထားလိုက်ပြီမို့ အခြေအနေသည် စိုးရိမ်စရာရှိဟန် မတူတော့ပါ ။ ပြီးနောက် စမ်းသပ်ပြီး၍ထွက်သွားသော ဆရာဝန်နောက် မေမေတို့လိုက်သွားကြတာမို့ Santa ကုတင်ဖြူဖြူအနားသို့ ဖြေးဖြေးချင်း လျှောက်လာခဲ့သည် ။ ထိုအခါမှ သူ့ကိုမြင်သွားဟန်တူသည့်လူ၏မျက်ဝန်းတို့သည် ဖြူလျော့နေသော မျက်နှာနှင့်တခြားစီဖြစ်သွားကာ လင်းလက်ကြည်လင်လာခဲ့သလို ။

" Tata ... "

" သက်သာရဲ့လား တစ်နေရာရာက နာနေတာမျိုးရှိလားဟင် ၊ ခေါင်းမူးတာတွေရော "

စိတ်ပူစွာမေးမိတော့ ခပ်ယေးယေးပြုံးလာသူသည် တကယ့်ကို အားမရှိစွာရယ် ။ လက်နဲ့ခြေထောက်တွင် ရှိနေသော ပတ်တီးဖြူဖြူတွေကို မြင်ရချိန် ပို၍ပင် မွန်းကျပ်လာသည့် အသိစိတ်တွေ ။ လက်တစ်ဖက်က လှဲကျချိန် ထောက်လိုက်တာရော ပစ္စည်းတွေကျလာတဲ့အရှိန်ရော နှစ်ခုပေါင်းကာ ကျိုးသွားခဲ့သည် ။ ခြေထောက်ကတော့ အရိုးအစ်သွားရုံသာ ။ သတိလစ်နေခဲ့သည့် အကြောင်းအရင်းသည် ဦးခေါင်းအားထိခိုက်မိ၍ ဖြစ်ပြီး အတွင်းဒဏ်ရာဖြစ်သည့်အတွက် ဆရာဝန်ကပင် စိုးရိမ်ရလွန်းသည်ဟုပြောခဲ့သေးသည် ။ ဒါကြောင့် Santa ရဲ့ အသိစိတ်တွေ ဒီလူသတိလစ်နေချိန်မှာ လုံးလုံးကြီးပျက်ဆီးသွားသလို ဖြစ်နေခဲ့တာ ။

" ကိုယ် သက်သာပါတယ် ၊ Tata ရော ကိုယ်တွန်းလိုက်တဲ့အချိန် နာသွားတာမျိုးရှိလား "

Santa ခေါင်းခါယမ်းပြလိုက်ကာ ဘာရယ်ကြောင့်မှန်းမသိ လှိုက်တက်လာသည့် ဝမ်းနည်းမှုများ ။

" Tata ... တစ်ခုခုဖြစ်လို့လားဟင် "

အခုမှ သတိရကာစလူသည် သူ့ကိုပင်ပြန်၍ စိုးရိမ်တကြီးဖြစ်နေပုံမှာ မျက်ဝန်းများမှတစ်ဆင့် အတတ်သိနိုင်လေသည် ။ ထိုသို့ စိုးရိမ်နေတာကိုမြင်ရလေ သူ့ရင်ထဲ ပြောမပြတတ်အောင် စို့နစ်ဝမ်းနည်းလာခဲ့ရပြီး လှိုက်တက်လာသည့် တင်းကျပ်မှုတွေ ။ တကယ်တစ်ခုခုဖြစ်သွားနိုင်တဲ့လူသည် Santa မဟုတ်ပါ ။ အတွန်းခံလိုက်ရရုံလေးနဲ့ Santa က ဘာဖြစ်မှာတဲ့လဲ ။

" Tata ... "

Perth သူ့အားကြည့်လျက် မျက်ရည်အဝိုင်းသားနှင့် ချစ်ရသူကြောင့် စိုးရိမ်စိတ်က ထိတ်ကနဲ ။

" ဘာဖြစ်လို့လဲ Tata ရဲ့ မငိုနဲ့လေ "

ချက်ချင်းဆိုသလို မျက်ရည်များ တလိမ့်လိမ့်ကျဆင်းလာသည့် မျက်နှာနုနုလေးကြောင့် Perth ပြာပြာသလဲ ဖြစ်သွားသည် ။ ထပြီးဖက်ကာ ချော့လိုက်ဖို့ရာလည်း သူ့အခြေအနေသည် အဆင်မပြေ ။

" ခင်ဗျားအရူးလား ! ကိုယ့်ကိုကိုယ်သာ ဂရုစိုက်စမ်းပါ ၊ သေသွားနိုင်တာကိုရော သိရဲ့လား ၊ ဘာလို့ အဲ့လိုဟီးရိုးဝင်လုပ်ချင်ရတာလဲ ၊ အန္တရာယ်များတာကို မသိဘူးလား ! "

မျက်စိရှေ့က ကောင်ငယ်လေးသည် ကလေးတစ်ယောက်လို အားရပါးရ ငိုနေပြီး ပါးစပ်ကပါ တတွတ်တွတ်ရေရွက်နေသည်မို့ Perth ဘာလုပ်လို့ ဘာကိုင်ရမှန်း မသိတော့ပါ ။ အခုက ဒီကောင်လေး Perth ကို စိုးရိမ်လို့ပြောနေမှန်းသိရတော့ နှုတ်ခမ်းက ပြုံးချင်သယောင်ယောင်ဖြစ်လာပေမယ့် ငိုနေသူ၏ မျက်စောင်းတို့ ရောက်လာမှကြောက်၍ မပြုံးရဲပြန် ။

" ကိုယ် ဘာမှမဖြစ်တော့ဘူးလေ ကလေးရဲ့ ၊ တစ်နေရာမှ မနာတော့ဘူး အဲ့တာမို့ မငိုနဲ့တော့နော် "

ပတ်တီးမစည်းထားသော လက်တစ်ဖက်ဖြင့် မျက်ရည်တို့အား သုတ်ကာချော့ပြောတော့ ကောင်ငယ်လေးသည် သူ့ကိုလည်း မကြည့်ပါဘဲ ဆူပုတ်နေပြီး ငိုချင်တာကို မနည်းထိန်းနေရတဲ့ ကလေးလေးလို ။

" တကယ် ကိုယ်အဆင်ပြေတယ် ၊ တကယ် တစ်နေရာမှ မနာတော့တာ "

ထိုသို့ပြောတော့ မျက်ရည်များဝင့်နေသည့် မျက်ဝန်းလေးသည် Perth ထံသို့ ဒိုင်းကနဲဝင်ရောက်လာသည် ။ တကယ်ပါ တကယ့်ကို ဒီဒဏ်ရာတွေကိုပဲ ကျေးဇူးတင်ရတော့မလို အဆင်ပြေလာသည်ဟု ဘာကြောင့် ထင်နေမိမှန်း မသိတော့ပါ ။ ကောင်ငယ်လေးသည် သူ့ကို စိတ်ပူ၍ ငိုပါသည်တဲ့ ။ ဘယ်လောက်တောင် ပျော်စရာကောင်းလိုက်သလဲ ။

" Tata ... "

" ခင်ဗျားသုံးရက်တောင် သတိမေ့နေတာ "

" စိတ်ပူအောင်လုပ်မိတာ ကိုယ်ကတောင်းပန်တယ်နော် "

ထိုအခါ တွန့်ချိုးသွားသည့် မျက်ခုံးများနှင့် တည်တင်းတင်းဖြစ်သွားသည့် မျက်နှာလေးကြောင့် စကားများမှားသလားဟူ၍ စဉ်းစားလိုက်ပြီးမှ တောင်းပန်တယ် ဆိုတာကို ပြောမိလိုက်မှန်းသိလိုက်၏ ။ ထို့ကြောင့် တောင်းပန်တယ် ဆိုတဲ့စကားကို ခဏခဏမပြောနဲ့ ဟူသည့် ချစ်ရသူ၏ စကားကို ပြန်ကြားလာမိ၍

" ဟို ကိုယ်က ... "

" နောက်တစ်ခါ အဲ့လိုမလုပ်ပါနဲ့ ၊ ကျွန်တော်ဘာဖြစ်ဖြစ်ကိစ္စမရှိဘူးမို့ ခင်ဗျားက ဘာမှမဖြစ်ပါနဲ့ "

Perth ပင်ဘာမှထပ်မပြောနိုင်တော့အောင် ကောင်ငယ်လေး၏ စကားအောက် တိတ်ဆိတ်ငြိမ်သက်သွားပြီး Perth၏ နှလုံးအိမ်တစ်ခုလုံး နွေးသွားသယောင် ။

အခြေအနေတွင် Perth သည် ကုတင်ထက်မှနေ၍ ကောင်ငယ်လေး၏ပါးပြင်ထက်အား ခပ်ဖွဖွအုပ်ကိုင်ထား၏ ။ Perth ၏ လက်ဖဝါးအောက်တွင် ငိုထားသည်ကြောင့် ခပ်ရဲရဲဖြစ်နေသည့် မျက်နှာလေးနှင့် မျက်ရည်များရစ်သီနေဆဲဖြစ်သော မျက်ဝန်းဝိုင်းလေးများသည် ငေးမဝနိုင်ဖွယ်အတိ ။ ဒီမျက်ဝန်းဝိုင်းလေးများကို ဘယ်လောက်တောင် လွမ်းနေခဲ့ရသလဲ ။

" ကိုယ့်ကို စိတ်ပူနေခဲ့တာဆိုတော့ "

" ... "

" ကိုယ့်ကို ခွင့်လွှတ်ပေးဖို့ရော မတွေးမိဘူးလား "

မျက်ဝန်းဝိုင်းလေးတွေအား လေးလေးနက်နက်စိုက်ကြည့်ကာ ဆိုလိုက်တော့ ပို၍ဝိုင်းသွားသော မျက်ဝန်းလေးများနှင့် ဖိကိုက်ခြင်းခံလိုက်ရသည့် အောက်နှုတ်ခမ်းပါးလေး ။ ပြီးနောက် အတွေးတွေများနေဟန်ဖြင့် မျက်ဝန်းငယ်လေးတွေက လှုပ်ခတ်နေကြသယောင် ။ ခဏအကြာတွင် မျက်တောင်တို့ပုတ်ခတ်လာကာ Perth ၏ လက်ဖဝါးအတွင်းမှ ရုန်းဖယ်သွားပြီး အကြည့်လွှဲသွားလေသည် ။

ထိုအခါမှ Perth လည်း အသိစိတ်ဝင်လာခဲ့ကာ မျှော်လင့်ချက်ကြီးမိသွားပြီဟု ကိုယ့်ကိုကိုယ် သတိပေးမိရင်း အခွင့်အရေးယူရာကျသွားသည်လားဟုပင် တွေးမိလိုက်၏ ။ တစ်ပြိုင်နက် အနည်းငယ်စိတ်ပြေစချစ်ရသူကိုများ စိတ်ရှုပ်စေမိပြန်ပြီလားဟူ၍ စိတ်ပူလာခဲ့ရပြန်သေးသည် ။

" Perth ... "

" ... "

" ကျွန်တော်ခင်ဗျားကို မမုန်းခဲ့ဖူးဘူး "

သူမေးသော မေးခွန်းနှင့် မသက်ဆိုင်သော အဖြေတစ်ခုဆိုပေမယ့် Perth နက်နက်ခြိုက်ခြိုက်ပြုံးမိသည်အထိ ကောင်လေး၏စကားသည် သူ့အတွက် အဓိပ္ပာယ်ပြည့်လွန်းနေသည် ။

ကိုယ်မလောပါဘူးကိုယ်စောင့်နေပါ့မယ် အချစ်ရယ် ။

----

ဒီနေ့ Perth ဆေးရုံကဆင်းရလေသည် ။

" ကျွန်တော့်ကို အားယူပြီး ဖြေးဖြေးချင်းတက်ကြည့်နော် "

အိမ်ပေါ်ထပ်သို့တက်ရန် လှေကားတွင်ဖြစ်လေသည် ။ Perth သည် Santa ပုခုံးအားဖက်ထားလျက် အားယူနေရသည် ။ သူ့ခြေထောက်ထိခိုက်မှုကြောင့် မတ်တပ်ပင်ကောင်းကောင်းမရပ်နိုင်သေးပါ ။ ပုံမှန်အတိုင်းဆို ဂျိုးထောက်ကို အားပြု၍သွားလာရန်ဖြစ်သော်လည်း လှေကားတက်ဖို့ရန်ကျ ခက်ခဲလေသည် ။ သို့ပေမယ့် Santa ရှိချိန်တိုင်းတွင်တော့ ထိုဂျိုင်းထောက်သည် မလိုအပ်ပေ ။

လှေကားတစ်ထစ်ချင်းစီတိုင်းကို ဖြေးဖြေးချင်းတက်ခဲ့ပြီး ဘေးရှိချစ်ရသူသည် အားဆေးပမာ အားယူပြီးခက်ခက်ခဲခဲတက်နေရခြင်းမှာတောင် ပင်ပန်းမှုရှိမနေပါချေ ။ နောက်ဆုံးတွင် အိမ်ပေါ်ထပ်သို့ရောက်ပြီမို့ ခဏအနားယူရန် ရပ်လိုက်၏ ။

" အဆင်ပြေရဲ့လား တက်ရတာ အရမ်းခက်ခဲရင် ကျွန်တော် အောက်ထပ်ကအခန်းမှာခဏနေဖို့ ပြင်ပေးရမလား "

" ကိုယ်အဆင်ပြေပါတယ် ၊ Tata တွဲကူရတာ ပင်ပန်းမှာပဲစိုးတာ "

ထိုအခါ ကောင်ငယ်လေးက သူ့အားမော့ကြည့်လာငည်မို့ အကြည့်ချင်းဆုံမိသွား၏ ။ သူ့အားမျက်လုံးဝိုင်းလေးများဖြင့် ကြည့်နေသော ကောင်လေးသည် ဟိုးမတိုင်မီက Perth ရဲ့ Tata လေးအတိုင်း ။

" ဒီလောက်လေးနဲ့ ကျွန်တော် မပင်ပန်းပါဘူး "

စကားဆုံးသည်နှင့် အကြည့်လွှဲသွားသူကောင်လေးကြောင့် Perth စိတ်လိုလက်ရ ပြုံးလိုက်မိသည် ။ ပြီးနောက် အခန်းထဲထိ ဆက်၍တွဲပို့ပေးတာမို့ Perth အလိုက်သင့်လျှောက်ကာ လိုက်လာခဲ့လိုက်သည် ။ အခန်းထဲရောက်တော့လည်း ကုတင်နားအထိ သေချာတွဲကာ ထိုင်စေပြန်သည် ။ ပြီးကာမှ အခန်းပြတင်းပေါက်တို့အား သေချာဖွင့်ကာ အလုပ်ရှုပ်နေပြန်သည့် ကောင်လေး ။ ကောင်လေးကို လိုက်ကြည့်နေရင်းနှင့် ကုတင်၏ရှေ့တည့်တည့်နံရံတွင် ချိတ်ထားသော ပုံလေးကိုမြင်ချိန် ရင်အတွင်း၌ ကြည်နူးမှုသည် ဘာနှင့်မျှ လဲမရတော့ပါချေ ။ ပြီးနောက် ပုံ၏အောက်ရှိ ဗီရိုအနိမ့်လေးပေါ်တွင် တင်ထားသော အရုပ်ကလေးနှစ်ခု ။

ကိုယ်တို့ ပြန်အဆင်ပြေကြဖို့ နီးလာပြီဟုတ်တယ်မလား Tata ။

" ဒါဆို ခဏနေခဲ့အုံးနော် ၊ အောက်မှာ မေမေတို့ဆီသွားအုံးမယ် လိုတာရှိရင် အော်ခေါ်လိုက် ကျွန်တော် လာခဲ့မယ် "

Perth ခေါင်းငြိမ့်ပြလိုက်တော့ ကောင်ငယ်လေးသည် သူ့အား စိတ်မချသလိုတစ်ချက်ကြည့်ကာ အခန်းထဲမှ ထွက်သွားလေသည် ။ ပြုံးလျက်ကျန်ခဲ့သူက Perth သာဖြစ်၏ ။ သူသတိရတဲ့နေ့ကတည်းကစ ပြုံးနေရလွန်းလို့ ပုရွက်ဆိတ်ပါတက်တော့မည် ။ ရှိနေတဲ့ပတ်တီးဖွေးဖွေးတွေကိုလည်း ကျေးဇူးပြေးပြီး တင်တင်နေရတာလည်း ခဏခဏ ။ နောက်ဆို ယောက်ဖ Joong ဆီသွားပြီး ငါ့ပေါ်ပိကျလာတဲ့ ပစ္စည်းတွေအတွက် ကျေးဇူးတင်ပါတယ်ဆိုပြီးတောင် သွားပြောလိုက်ရမလား ။ အကုန်ဝယ်ပြီးတော့ပဲ သိမ်းထားလိုက်ရင် ကောင်းမလား ဟူ၍ပင် ပေါက်ကရ တွေးမိသေးသည် ။

ဘာပဲဖြစ်ဖြစ် နာရသည်ထက်ပိုတဲ့ ချစ်ရသူရဲ့ ဂရုစိုက်မှုကို ရနေသည်မဟုတ်လား ။ စိတ်လုံးလုံးပြေတယ်လို့ မသတ်မှတ်နိုင်သေးပေမယ့် အရာရာအတွက် လမ်းစလေးတော့ ဖြစ်နိုင်ကောင်းပါရဲ့ ။

Santa မေမေတို့ ပြန်သွားပြီးနောက် အပေါ်ထပ်အခန်းသို့ ပြန်လာခဲ့သည် ။ အခန်းထဲဝင်ဝင်ချင်း phi Perth ကို မတွေ့တာမို့ စိတ်ပူမှုဟာ ချက်ချင်းတိုးလာသည် ။ အခန်းထဲ ဝှေ့ဝဲကြည့်နေစဉ် ရေချိုးတံခါးဖွင့်သံကြားတာမို့ ချက်ချင်းလှည့်ကြည့်လိုက်စဉ် ဂျိုင်းထောက်တစ်ဖက်ဖြင့် ခက်ခက်ခဲခဲ ထွက်လာနေသည့်လူ ။

Santa ကြည့်နေစဉ်မှုပင် ရေချိုးခန်းထဲက အထွက်မို့ ဂျိုင်းထောက် ထောက်လိုက်ခြင်းက အခန့်မသင့်သလိုဖြစ်သွားရကာ ယိုင်ကျသွားသူကြောင့် ချက်ချင်းပြေးကာ ထိန်းလိုက်ရ၏ ။ တော်သေးသည်ဟုပြောရမလား ။ ဘာမှဖြစ်မသွားမှသာ စိတ်ပူပန်မှုကို တစ်ထစ်လျော့ချနိုင်တော့သည် ။

" နာသွားသေးလား "

စိုးရိမ်တကြီးမော့ကာ မေးမိတော့ ခေါင်းယမ်းပြလာသူကြောင့် ထိန်းကာတွဲပေးရင်း ကုတင်သို့ ပြန်ခေါ်လာခဲ့လိုက်သည် ။ ပြီးကာမှ

" ကျွန်တော့်ကို ခေါ်ခဲ့လို့ မှာထားတာကို "

" မအားဘူးထင်လို့ "

" ကျွန်တော်ရောက်မလာရင် ဘယ်လိုလုပ်မလဲ ၊ လှဲကျသွားရင် ဘာဖြစ်သွားနိုင်လဲရော သိရဲ့လား နောက်တစ်ခါဘာလုပ်လုပ် ကျွန်တော့်ကိုခေါ် ပါ ၊ တစ်ယောက်ထဲ မလုပ်နဲ့ ဂျိုင်းထောက်ရှိတာမှန်ပေမယ့် ခင်ဗျားသေချာ မသုံးတတ်ဘူးမလား "

စကားကို မရပ်မနားပြောနေတဲ့ချစ်ရသူက လှဲကျမလိုဖြစ်သွားတော့ အတော်လေး စိတ်ပူသွားဟန်ရှိပါသည် ။ ကိစ္စသေးသေးလောက်ကိုတော့ ဒီကောင်လေးကို အလုပ်မများစေချင်တာပါ ။

" ကိုယ်နောက်တစ်ခါ မလုပ်တော့ဘူး "

" အင်း ဘာဖြစ်ဖြစ် ကျွန်တော့်ကိုပြော "

ပြီးနောက် ချစ်ရသူက ခုဏက ပြုတ်ကျကျန်ခဲ့သော ဂျိုင်းထောက်အား သွားကောက်ကာ အနားတွင်လာထားပေးသည် ။

" ဟို ... "

သူပြောဖို့ ဝန်လေးနေမှန်းသိတော့ သူ့မျက်နှာကို စေ့စေ့ကြည့်ကာ အာရုံစိုက်နေသည့် ကောင်လေး ။

" ဘာနေနေ ပြောရမှာလား "

" အင်းလေ ခင်ဗျားလမ်းလျှောက်ဖို့ ခက်ခဲနေသေးတာကို ၊ သွားချင်တဲ့နေရာကို ကျွန်တော်တွဲပို့ပေးမယ် မဟုတ်ရင် ခုဏကလို ဖြစ်လိမ့်မယ် "

" ရှူးပေါက်ချင်ရင်ရောလား "

သူ့အမေးအဆုံး ကောင်လေးက တိတ်ဆိတ်သွား၏ ။ တမင်မေးခြင်းမဟုတ် ။ သူတကယ်သိချင်၍သာ မေးမိခြင်းဖြစ်သည် ။ တကယ်တော့ ခုဏက မခေါ်ဘူးဆိုတာ အဲ့ဒီကိစ္စကြောင့်လည်း ပါသည်လေ ။

" အဲ့တာတော့ ကိုယ့်ဘာကိုယ် သွားလိုက်လို့ .. "

" အင်း အဲ့တာလည်းပြော ခုဏကလိုထပ်ဖြစ်လိမ့်မယ် အထဲထိလိုက်ပို့ပြီးမှ ကျွန်တော်အပြင်ကစောင့်မယ် ပြီးမှပြန်ခေါ်ခဲ့ ဟုတ်ပြီလား "

အတည်ပြောနေသော ကောင်လေး၏စကားကြောင့် သူတကယ် ပျော်မိပါသည် ။

ထိုသို့ပျော်မိခြင်းနဲ့အတူ နောက်ဆက်တွဲအရာတို့သည်

" Tata ... ကိုယ် ရေဆာတယ် "

" Tata ... ကိုယ် ရှူးပေါက်ချင်တယ် "

" Tata ... ကိုယ် ဝရန်တာဘက်ခဏ သွားချင်တယ် "

" Tata ... ကိုယ် ခြံထဲခဏဆင်းလို့ရလား "

" Tata ... ! "

တစ်ချို့အရာတို့တွင် ချစ်ရသူအနားကပ်ဖို့ လုပ်ကြံဖန်တီးမှုများလည်း ပါဝင်နေခဲ့၏ ။ သို့သော် မငြိုမငြင်လိုက်လုပ်ပေးနေရှာသော ကောင်လေးတစ်ယောက်လည်း ရှိခဲ့ပါသည် ။

----

ည၏လေသည် တဖြူးဖြူးတိုက်ခတ်နေပြီး ခြံထဲဆင်းထိုင်နေကြသူတို့အဖို့ အေးမြကြည်လင်စေ၏ ။ ခြံထဲရှိ ဒန်းပေါ်တွင်ထိုင်ကာ စကားလည်း မပြောမိဘဲ ငြိမ်လျက် ကောင်ကင်သို့သာ မော့ကြည့်နေမိကြသည် ။ ကောင်ကင်သည် ကြယ်များစုံလင်နေကာ လှပလွန်းပါသည် ။

" ကြယ်တွေကြွေရင် ဆုတောင်းပြည့်တယ်တဲ့ "

တိတ်ဆိတ်မှုအား ဖြိုခွင်းလိုက်သူသည် Perth ဖြစ်ပါသည် ။ ထိုအခါ ကြယ်တွေအားမော့ကြည့်နေသော ချစ်ရသူသည် သူ့ထံသို့ လှည့်ကြည့်လာပေမယ့် ဘာမှမပြောပါ ။

" ကြယ်တွေများတော့ ဘယ်ကြယ်ကြွေလာမလဲ ကိုယ်မသိဘူး Tata တွေ့လိုက်ရင် ကိုယ့်ကို ပြောပြပေးမလား "

" ... "

" အရင်နေ့တွေတုန်းက ကြယ်ကြွေတာ ထိုင်ကြည့်ရင်း ကိုယ်ဆုတောင်းတစ်ခုတည်းကိုပဲ အခါခါဆုတောင်းနေခဲ့တာ "

Santa ဘာမှမပြောမိဘဲ ကောင်းကင်ထက်သို့သာ ပြန်မော့ကြည့်လိုက်၏ ။ လေ၏ညှင်သာသာတိုက်ခိုက်မှုနှင့်အတူ သူ့နှလုံးသားသည်လည်း ညှင်းသဲ့စွာ သဲ့ယူခံနေရသလိုပင် ငြိမ့်ညောင်းစွာ လှုပ်ခတ်လျက်ရှိသည် ။ လေယူလေသိမ်း အေးအေးလေးဖြင့် စကားဆိုနေသူသည် ယခုရက်များတွင် တွန်းထုတ်ခြင်းပြုချင်စဖွယ်မရှိအောင်ကို သူ့စိတ်အစုံမှာ နေရာယူထားခဲ့သည် ။

" Tata ... ကိုယ်ဘာဆုတောင်းလဲ သိလား "

ဘေးရှိလူအား တစ်ခါပြန်လှည့်ကြည့်မိစဉ် ရွှန်းလဲ့နေသော မျက်ဝန်းများသည် သူ့အားညှို့ယူနေသယောင်ရှိပါသည် ။

" ဟင့်အင်း ဘာဆုတောင်းခဲ့တာလဲ "

" ကိုယ်သိပ်ချစ်ရတဲ့ကောင်လေးတစ်ယောက် ကိုယ့်ဆီမြန်မြန်ပြန်လာပါစေ "

အဖြေအဆုံး Santa နှုတ်ခမ်းတွေ ပြုံးယောင်သန်းသွားသည် ။ သို့သော် ခဏသာဖြစ်ပြီး မျက်နှာအမူအယာကို ချက်ချင်းပြန်ထိန်း၏ ။ ပျော်ဝင်ချင်နေတာမှန်ပေမယ့် ပျော်ဝင်လိုက်ဖို့ရာ သူဝန်လေးနေမိသေးတယ် ။ ဘာကြောင့်ရယ်မသိ လွှတ်လွှတ်လပ်လပ်ပြေးလာဖို့ အင်အားမရှိသေးသ၍ သူမလာချင်သေးဘူး ။ ထို့ကြောင့် ညှို့အားပြင်းလှသော မျက်ဝန်းအိမ်ထံသို့ လေးလေးနက်နက်ကြည့်ကာ

" ဘယ်အချိန်ထိ စောင့်နိုင်လဲ "

" မပြောတတ်ဘူး နှစ် ၁၀၀ လား နှစ် ၁၀၀၀ လား ၊ သေချာတာ တစ်ခုက အဲ့ဒီကောင်လေးသာ ပြန်လာမယ်ဆိုရင် သံသရာအဆုံးထိ စောင့်ရလည်း ဖြစ်ပါတယ် "

" ဆုတောင်းပြည့်ဖို့က ကြယ်တွေနဲ့မသက်ဆိုင်ဘူး ၊ ခင်ဗျားအပေါ်ပဲ မူတည်တာပါ "

ဒီတစ်ခါ ပြုံးရသူက Perth ဖြစ်လေသည် ။ သူမျှော်လင့်ချက်ထားနိုင်သည့် စကားမဟုတ်လား ။ ဒီလောက်ကလေးဆိုရင်တောင် သူကျေနပ်ပါသည် ။

" ကိုယ်အားလုံးကို ကြိုးစားပြီးပြုပြင်နေတာ မင်းအသိဆုံးပဲ Tata "

" အင်း ဒါဆိုရင်တော့ ခင်ဗျားစောင့်နေတဲ့ကောင်လေးက ပြန်လာဖို့ တွေးရင်တွေးနေမှာပေါ့ "

" phi Perth ! "

" ဟင် "

" ပြန်လာဖို့တွေးနေတယ်ဆိုရင် phi Perth လို့ ပြန်ခေါ်ပါလား "

ပတ်ဝန်းကျင်တခွင် လေတိုက်၍သစ်ရွက်ကလေးများ လှုပ်ခါသံသာရှိတော့ပြီး ကျန်သည့်အရာအားလုံး ငြိမ်ဝပ်သွားသည် ။ ထိုအထဲတွင် ရပ်တန့်သွားဟန်ရှိသော နှလုံးသားနှစ်စုံလည်း ပါကောင်းပါနိုင်ပါလိမ့်မည် ။ သေချာတာတစ်ခုသည် မျက်ဝန်းတို့ မလွှဲပစ်နိုင်လောက်အောင် တစ်ယောက်နဲ့တစ်ယောက် အဖြေရှာမိကြသည်ထင်ပါသည် ။ ထိုအခါမှာလည်း အဖြေဟာ ဗလာနတ္ထိအတိဖြစ်လို့နေပြန်သည် ။ နားလည်ဖို့ မလုံလောက်သော အကြည့်များသည် မည်သည်ကိုရည်ညွှန်းနေကြပြီး တစ်ယောက်ကိုတစ်ယောက် ဘယ်သို့သော အကြောင်းအရာကို ပြောပြချင်ခဲ့ကြသနည်း ။

" phi Perth .... "

လေအဝှေ့တွင် ယိမ်းနွဲ့ပါသွားသည့် လေသံလေးကဲ့သို့ မသဲမကွဲတိုးညှင်းလှသည် ။ သို့သော် နှစ်ယောက်လုံးကြားစေဖို့ လုံလောက်ပါသည် ။ပြီးနောက် ကောင်းကင်ထက်က ကြယ်တွေဆီအကြည့်ပို့လိုက်သော ကောင်လေးနှင့် ကြားလိုက်သော နာမည်ခေါ်သံအား ဟုတ်မဟုတ်စဉ်းစားရင်း အတွေးများနေခဲ့သည့် ကောင်လေးတစ်ယောက် ။

phi Perth .... ။

ဒါဆိုရင် Tata က သူ့ဆီပြန်လာဖို့ တွေးနေခဲ့သည်လား ။

ကိန်းဝပ်လာသည့် အတွေးအစုံကြောင့် Perth ရင်တွေ စည်းချက်ကျကျ အခုန်မြန်လာခဲ့သည် ။ ပြီးနောက် နှုတ်ခမ်းထက် တားဆီးမရအောင် ပြုံးနေခဲ့မိပြီး ကောင်ကင်က ကြွေခဲ့ဖူးသော ၊ သူဆုတောင်းခဲ့ဖူးသော ကြယ်လေးတွေအား ကျေးဇူးအပြေးတင်နေခဲ့သည် ။ လုံးလုံးကြီး ဆုတောင်းမပြည့်သေးပေမယ့် အနည်းငယ်တော့ဖြင့် အောင်မြင်ခဲ့သည်မလား ။

Perth အသိစိတ်တစ်ခုလုံး မြူးတူးနေခဲ့ပြီး ဦးနှောက်သည် ရုတ်ချည်းအလုပ်မလုပ်နိုင်တော့သလို ဘာဆိုဘာမှမတွေးတောချင်တော့ပါ ။ ထို့ကြောင့် ဘေးရှိကောင်လေးအနား ပို၍တိုးကပ်လိုက်ပြီး ပုခုံးငယ်လေးထက်သို့ ခေါင်းမှီတင်လိုက်သည် ။ ထိုအခါ သူ့ကို ငုံ့ကြည့်လာသည့်ကောင်လေးသည် ရုန်းဖယ်မသွားပါ ။

" ခေါင်းမူးလို့လား "

" အင်း နည်းနည်း "

စိုးရိမ်စွာမေးလာသော မျက်ဝန်းဝိုင်းလေးများသည် ချစ်သည့်စိတ်ကို ပို၍တိုးလာစေသည်မို့ ထိုမျက်ဝန်းဝိုင်းလေးများအား မော့ကြည့်ကာ ဖြေလိုက်၏ ။ ထိုအခါ အကြည့်ချင်းထပ်ဆုံမိကြပြန်သည် ။ သို့သော် ဒီတစ်ကြိမ်တွင် ရှောင်ဖယ်သွားခြင်းမဟုတ်ဘဲ မနေတတ်စွာဖြင့် ရှိလှသောမျက်ဝန်းလေးကြောင့် Perth ထပ်၍ပြုံးမိပြန်သည် ။

" ချစ်တယ် Tata "

ထိုသို့ဆိုလိုက်လျှင် လှုပ်ခတ်သွားသော နှုတ်ခမ်းပါးလေးနှင့် ထုံးစံအတိုင်း အောက်နှုတ်ခမ်းကို ဖိကိုက်ချင်နေပြန်သည် ။ သဘောကျရတဲ့ အမူအယာငယ်လေးအား အသဲတယားယားကြည့်ပြီးနောက် Perth မျက်လုံးတွေ မှိတ်လိုက်တော့သည် ။

ကိုယ်စောင့်နိုင်တာ မှန်ပေမယ့်အမြန်ဆုံးတော့ ပြန်လာစေချင်တယ်အချစ်ရဲ့ ။

-----

🤍

4.9К3470

Previous chapter Next chapter

There are no comments yet. Log in to be the first to leave a review!

27 . 2

Similar stories