12

23:16, 17 May 2025

" သား အရမ်းမဆော့ရဘူးနော် ဒေါ်လေးဗိုက်ထဲမှာ ကလေးလေးရှိတယ် "

" ကလေးလေး ... "

သူစပြီး သိတတ်တဲ့အချိန်မှာဘဲ ဒေါ်လေး Saung ဗိုက်ထဲမှာ ကလေးလေးရှိမှန်းသိခဲ့ရသည် ။ မေမေဟာ သူအရမ်းဆော့ပါလျှင် ဗိုက်ထဲက ကလေးလေးကိုထိခိုက်မည်ဟူ၍ အမြဲမှာကြားတတ်သည် ။ ဒေါ်လေး Saung နဲ့ အမြဲဆော့နေကျဖြစ်သည့် သူ့အတွက် ကလေးလေးကို ထိခိုက်မည် ဟူသည့် ကန့်တန့်ချက်သည် နည်းနည်းတော့ အခက်တွေ့ခဲ့ပေမယ့် ဘာမှန်းမသိတဲ့ ဗိုက်ထဲကပေါက်စလေးကိုတော့ သေးသေးလေးတောင် မထိခိုက်စေချင်ခဲ့ပါ ။ ကျောင်းပြန်သည်နှင့်လွယ်အိတ်ချပြီး ပြေးတတ်သည့်နေရာသည်လည်း တစ်ဖက်အိမ်ရှိ ဗိုက်ထဲကကလေးလေးရှိရာနေရာဖြစ်သည် ။ မမြင်ဖူးသေးတဲ့အချိန်မှာတောင် သူဒီကလေးလေးအတွက် များစွာရင်ခုန်နေခဲ့ပါသည် ။ ဒေါ်လေး Saung ဆီသွားတယ် ကလေးလေးနဲ့စကားပြောတယ် တစ်ခါတစ်ရံ ဒေါ်လေး Saung ပြောပြသည့်ပုံပြင်တွေ နားထောင်ရင်း ဗိုက်ထဲက ပေါက်စလေးနဲ့အတူတူအိပ်မောကျသွားတယ် ဒါတွေတင်မကပေ ကျောင်းမှာသင်ခဲ့သမျှ စာတွေကဗျာတွေကိုလည်း ကလေးလေးကိုသွားပြီးဆိုပြတတ်သေးသည် ။ ပေါက်စလေးရောက်လာရင် သား Perth ကို အချစ်ဆုံးဖြစ်နေတော့မှာဘဲတဲ့ ။ သူသိပ်ပျော်ခဲ့ပါသည် ။ တစ်ရက်ပြီးတစ်ရက် တစ်လပြီးတစ်လ သူဒီပေါက်စလေးကို မြင်ရဖို့ ရင်ခုန်စွာစောင့်ဆိုင်းခဲ့ပါသည် ။

" ဒေါ်လေး Saung .... ကလေးလေးကို မြင်ရဖို့ ဘယ်လောက်ထပ်စောင့်ရမှာလဲဟင် "

ဒေါ်လေး Saung က သူ့လက်ကိုဆွဲပြီး ပြက္ခဒိန်ရှိရာဆီသို့ ခေါ်သွားသည် ။ ပြီးနောက် Date လေးတစ်ခုမှာ မှင်နီအမှတ်အသားလေးဖြင့် ရေးခြစ်လိုက်ပြီး စာတစ်ခုရေးလိုက်သည် ။ သူသည် စာမဖတ်တတ်သေးသည့် အရွယ်ဖြစ်သော်လည်း ဒေါ်လေး Saung ပြောပြခဲ့သည်ကတော့ * ကလေးလေးနဲ့တွေ့ဖို့ * ဟူ၍ဖြစ်သည် ။ ပြီးနောက် သူ့လက်ကလေးအား ယူလိုက်ကာ နောက်ထပ် Date တစ်ခုကို ထောက်ပြသည် ။

" ဒီနေ့ကနေစပြီး နေ့တိုင်း ဒေါ်လေးနဲ့တူတူ ညီလေးရောက်လာမယ့်ရက်ကို စောင့်ရအောင် "

ပြီးနောက် ထို Date လေးအား မှင်နီဖြင့်ခြစ်ချလိုက်သည် ။

" ဒီထိပြည့်သွားရင် ညီလေးနဲ့တွေ့လို့ရပြီ "

သူသည် ထိုနေ့မှစ၍ ဒေါ်လေး Saung နဲ့အတူတူ ပေါက်စလေးအား ရက်ကလေးတွေခြစ်ချရင်း စောင့်နေခဲ့ပါသည် ။ တစ်ဖြည်းဖြည်းတွေ့ဖို့နီးလာလေလေ သူ၏ပျော်ရွှင်မှုသည် ဘာနှင့်မျှ မလဲနိုင်ဖြစ်ရသည် ။ သူစောင့်မျှော်နေသည့် ရက်တစ်ခုကိုရောက်လာသည့်အချိန်တွင်တော့

" သား Perth ညီလေးကို ကြည့်ချင်လား "

သူခေါင်းကိုတသွင်သွင်ငြိမ့်ပြမိသည် ။ တကယ်တမ်း တွေ့ရတော့မည့်အချိန်တွင် သူစိတ်တွေလှုပ်ရှားနေခဲ့ပါသည် ။ ညီလေးတဲ့ ။ သူ့မှာညီလေးတစ်ယောက်ရှိနေပြီ ။ ထိုညီလေးသည် မည်သို့ပုံစံဖြစ်မည်ကို တွေးကြည့်ဖို့ပင် မဝင့်မရဲဖြင့် သူ့တစ်ကိုယ်လုံးတုန်ယင်နေနဲ့အထိ စိတ်လှုပ်ရှားခဲ့ခြင်းဖြစ်လိမ့်မည် ။ ဒေါ်လေး Saung က အနှီးထုတ်လေးဖြင့် ကလေးငယ်လေးအား သူ့ရှေ့ကိုယူလာသည် ။ ပြီးနောက် သူ့ရှေ့တွင်ထိုင်ချလိုက်တော့ ကလေးငယ်လေးကို သူသေချာမြင်ရလေသည် ။

" အနီးကပ်လာကြည့်လေ "

အနားတိုးကပ်သွားတော့ သူ့ခြေလမ်းတွေ မဝံ့မရဲဖြစ်နေပါသည် ။ ပြီးနောက် အတိုင်းထက်အလွန်ပျော်ရွှင်မှုတစ်ခုသည် ထိုနေ့ အဲ့ဒီကလေးလေးကို မြင်တွေ့လိုက်ချိန်ဖြစ်လိမ့်မည် ။ အနှီးထုတ်ထဲရှိ နီတာရဲပေါက်စလေးသည် လှုပ်လီလှုပ်လဲ့ဖြင့် ငြိမ်ငြိမ်မနေပါ ။ သူ့မျက်ဝန်းတွေ ဝိုင်းစက်မိတဲ့အထိ ထိုကလေးလေးကိုကြည့်ရင်း သဘောတကျဖြစ်နေမိသည် ။

ထင်သားသည်ထက် များစွာချစ်ဖို့ကောင်းသည် ။

" ကိုင်ကြည့်ချင်လား သား "

" ကိုင်လို့ရလား "

" ရတာပေါ့ကွယ် "

ဒေါ်လေး Saung က ခပ်ဖွဖွရယ်ရင်း ပြန်ဖြေလာသည်မို့ သူပါ အလိုလို လိုက်ပြုံးမိသွားသည် ။ ပြီးနောက် လှုပ်လီလှုပ်လဲ့ဖြစ်နေတဲ့ ကလေးလေး၏ ပါးသေးသေးလေးအား သူ့လက်ဖြင့်အသာ တို့ကြည့်မိသည် ။ နူးညံ့လွန်းသည့် အထိအတွေ့ကြောင့် သူအံ့ဩခဲ့ရသေးသည် ။ ကလေးလေးတွေရဲ့အသားဟာ ဒီလောက်နူးညံ့သည်တဲ့လား ။ ပြီးနောက် ယက်ကန်ယက်ကန်လုပ်နေသည့် လက်ကလေးအား လက်ညှိုးဖြင့် တို့ထိလိုက်ချိန်တွင်တော့ သူရော ဒေါ်လေး Saung ရော တအံ့တဩရယ် ။

ကလေးလေးက သူ့လက်ညှိုးကို ဖမ်းဆုပ်လိုက်လေသည် ။ ပြီးနောက်

" အဲ့ ..... "

အသံသဲ့သဲ့ထွက်လာသော သူအလန့်တကြား ဒေါ်လေး Saung ကို မော့ကြည့်လိုက်သည် ။ သူထင်လိုက်သည်က ကလေးလေးက သူ့ကိုင်တာ မကြိုက်ဘူးပေါ့ ။ သို့သော်ငြား ဒေါ်လေး Saung ကတော့ သဘောတကျဖြင့် ရယ်ပြန်သည် ။

" ညီလေးက သားကိုသဘောကျတယ် ထင်တယ် "

ဒေါ်လေး Saung စကားကြောင့် ကလေးလေးကို ပြန်ကြည့်လိုက်ချိန် သူ့ရင်ထဲ နွေးထွေးမှုငယ်လေးသည် စတင်ပြီးနေရာယူခဲ့တော့သည် ။ ပေါက်စလေးက ပြုံးနေသည်တဲ့လေ ။

အဲ့ဒီနေ့ အဲ့ဒီအပြုံးလေးကစပြီးသူ့ရင်မှာနေရာစယူခဲ့သော နွေးထွေးမှုငယ်လေးသည်သူ့အတွက် အစစအရာရာဖြစ်ခဲ့ပုံပေါ်ပါသည် ။

" ညီလေးကို အမြဲတမ်းကာကွယ်စောင့်ရှောက်ပေးနိုင်မလား သား Perth "

" ဟုတ် "

ကိုယ့်ကိုကိုယ်တောင် မကာကွယ်နိုင်သေးသည့်အရွယ်မှာ ဒီကလေးလေးကို ကာကွယ်စောင့်ရှောက်ဖို့ အဆင်သင့်ဖြစ်နေခဲ့ပါသည် ။

ဒီကလေးလေးကို ကာကွယ်မည် ။ပြီးတော့ အမြဲတမ်းပြုံးနေစေရမည် ။သူက ကလေးလေးရဲ့အပြုံးကို သဘောကျသည် ။

" phi Perth .... Tata ကို ဒါလေးယူပေး "

" phi Perth ..... Tata ကို ချီ "

" phi Perth ..... Tata ကို ပုံဆွဲပေး "

ထိုကဲ့သို့သော ဆည်းလည်းသံများသည် မကြာခင်နှစ်တွေအတွင်း နှစ်အိမ်လုံးရဲ့ ဆူညံသံလေးဖြစ်ခဲ့သည် ။ သဲသဲလှုပ်ဖြစ်နေရသည့် သူကိုယ်တိုင်လည်း ထိုအသံလေးများကို မကြားရလျှင်ပင် မနေနိုင်တော့ပေ ။ မိုးလင်းကစပြီး မိုးချုပ်ထိ ဒီပေါက်စလေး အနားမှာရှိသည့်အချိန်ကသာ သူ့အတွက်အပျော်ဆုံးဖြစ်သည် ။ ဒီပေါက်စလေးဆီက အားကိုးတကြီးပြောတတ်သည့် စကားတွေကို သူပိုလို့တောင် သဘောကျသေးသည် ။ သူ့အပေါ် အားကိုးနေတာ သူ့ကိုခင်တွယ်နေတာ သူမှသူဖြစ်နေတာ ဒါတွေအားလုံးကို သူသိပ်သဘောကျသည် ။ အဲ့ဒီလို ဒီကောင်လေးရဲ့ အစစအရာရာမှာ သူ့နာမည်ပါဝင်နေခြင်းကို သူလေးလေးနက်နက်သဘောကျခဲ့ပါသည် ။ သူ့ဆီမှာရှိနေလျှင် မျက်နှာတစ်ချက်မညှိုးရစေအောင် ထားချင်သည် ။ ဒီကောင်လေးဘက်ကလည်း အားလုံးထက် သူ့ကိုသာ လေးလေးနက်နက်ရှိစေချင်သည် ။ သူ့ကြောင့်သာ ပြုံးရယ်နေစေချင်သည် ။ သူ့ကိုသာ ဂရုစိုက်နေစေချင်သည် ။ ထိုကဲ့သို့ စိတ်ဆန္ဒတို့အား ထိုကောင်လေးဘက်က လှိုက်လှိုက်လှဲလှဲသဘောတူနေခဲ့သလို သူမျက်နှာကိုသာ ကြည့်ပြီးနေခဲ့ခြင်းအတွက် ပိုပြီးအတ္တကြီးမိခဲ့သည်ထင်ပါသည် ။ တစ်ချိန်ချိန်မှာ ထိုအတ္တများသည် လှောင်ပိတ်ခြင်းတစ်ခု ဖြစ်ခဲ့မည်မှန်း သိခဲ့ရင် သူအဲ့ဒီအတ္တတွေအပေါ် သဘောတကျရှိခဲ့ပါ့မလား ။

----

အရွယ်ရောက်လာသည်နှင့်အမျှ ချောမောခြင်းထက် လှသည်ဟု တိတိကျကျပြောလို့ရမည့် အလှမျိုး Santa က ပိုင်ဆိုင်ခဲ့သည် ။ ထိုသို့ လှလာရခြင်းသည် သူ့အတွက် အိပ်မက်ဆိုးတစ်ခုလိုပါ ဖြစ်လာရသည် ။ ခေါင်းအစခြေအဆုံး သူများတကာ ငေးကြည့်မှာမကြိုက်ပါ ။ ထိတွေ့မှာ မကြိုက်ပါ ။ ဆံနွယ်လေးတွေကအစ ခြေဖမိုးအထိ သူအရိပ်အောက်မှာသာ ထားချင်သည့် အတ္တတစ်ခုသည် သူကိုယ်တိုင်ပင် မသိလိုက်ချိန်မှာဘဲ သူစိတ် သူ့ခန္ဓာအားလုံးကို ကြီးစိုးသွားခဲ့သည် ။

" ခုဏက စကားပြောနေတာ ဘယ်သူလဲ "

အလယ်တန်းကျောင်းသားကလေးသည် သူ့အား ဒေါသတကြီးမေးနေသူအား နားမလည်နိုင်ပါ ။ အခုတလော phi Perth က အရမ်းစိတ်ကြီးတာတော့ သူသိသည် ။

" Tata သူငယ်ချင်းအသစ်လေ အရင်သူငယ်ချင်းတွေက ကျောင်းမတူတော့ဘူး "

အကျိုးသင့် အကြောင်းသင့် ပြောပြပါသော်လည်း တွန့်ချိုးနေတဲ့ မျက်ခုံးတန်းတို့သည် အလိုမကျကြောင်း သိသိသာသာဖော်ပြလို့နေသည် ။

" သူငယ်ချင်းထပ်မထားနဲ့တော့ "

" ဘာလို့လဲ "

" phi တစ်ယောက်လုံးရှိနေတာ သူငယ်ချင်းလို လို့လား "

ထိုအခါ စဉ်းစားဟန်ပြုနေသောကောင်လေးသည် တစ်ခဏအချိန်အတွင်း မျက်နှာလေး ပြန်ရွှင်ပြုံးလာသည် ။ ပြီးနောက်

" phi Perth ရှိတာနဲ့ ပြည့်စုံပါပြီ "

ထိုသို့သော စကားမျိုးကြားရမှာ သူနေသာထိုင်သာရှိသွားသည် ။ ပြီးနောက် ကောင်လေးလက်ကိုဆွဲပြီး ကျောင်းထဲမှ ထွက်လာခဲ့သည် ။ Santa က အလယ်တန်းရောက်ပြီဆိုတော့ ဒီနှစ်မှ သူတို့ကျောင်းကို ပြောင်းလာတာ ဖြစ်သည် ။ ပိုကောင်းသွားသည်ဟု ဆိုရမလား ။ Santa ကို သူမျက်စိအောက်မှာ ထားနိုင်သည်လေ ။

အဲ့ဒီနေ့ကစပြီး ဒီကောင်လေးကို သူငယ်ချင်းထားခွင့် မပေးတော့ပါ ။ အတ္တကြီးတယ်ဘဲဆိုဆို သူကလွဲပြီး ဒီကောင်လေးနား အခြားလူရှိနေတာ မကြိုက်ပါ ။ စကားလေးပြောတာဘဲဖြစ်ဖြစ်ပေါ့ ။ Santa ကလည်း သူ့စကားဆို ဘယ်တော့သောအခါမှ မငြင်းပယ်ပါ ။ သူငယ်ချင်းလုပ်ဖို့လာပြောသူမှန်သမျှကို phi Perth က မကြိုက်ဘူး ဟူသည့်စကားတစ်ခွန်းနဲ့ ငြင်းချပစ်ခဲ့တယ်တဲ့ ။ ဒီတော့ Santa သည် ကျောင်းစာသင်ချိန်မှလွဲ၍ ကျန်သည့်အချိန်မှန်သမျှ Perth တို့အဖွဲ့နှင့်သာ ရောပါလာတတ်သည် ။ တစ်ချို့ကလည်း အထက်တန်းကျောင်းသားတွေကြား အလယ်တန်းကျောင်းသားပါနေတော့ တွတ်တိတွတ်တိ လုပ်တတ်ကြသည် ။ ထိုလူများကို Perth ရဲ့ အကြည့်တစ်ချက်ဖြင့်သာ နှုတ်ပိတ်စေခဲ့သည် ။ ကျောင်းမှာဆိုရင် Perth က စာတော်တဲ့အပြင် ကျောင်းလှုပ်ရှားမှုတွေမှာလည်း မနှေးပါဝင်တဲ့လူ ။ ကျောင်းကောင်စီအတွက်ပါ ရာထားခံရသည် ။ အဲ့ဒီအတွက် ကောင်မလေးတော်တော်များများရဲ့ သဲသဲလှုပ် ။ ဒီတော့ Santa ကို ကြိတ်အားကျကြတဲ့အဖွဲ့လည်းရှိသလို မနာလိုကြသည့် အဖွဲ့လည်းရှိသည် ။ တစ်ချို့ကျတော့လည်း သိပ်လိုက်ဖက်တဲ့အတွဲလေးဆိုပြီး ကြိတ်ship ကြသည် ။ ဒါကိုတော့ Perth က သိပ်သဘောမကျဘူး ။ သူအနေနဲ့ Santa ကို ညီငယ်လေးတစ်ယောက်လိုဘဲ သဘောထားသည်လေ ။ ပြီးတော့ ဒီလို ship ဖို့ Santa ဟာ အရွယ်မရောက်သေးပေ ။

" မောနင်း Ta ! "

" မောနင်း phi Phu "

Perth ပေးလိုက်သည့် Milo အားသောက်ကာ Phuwin နှုတ်ဆက်တာကို ပြန်ဖြေနေပုံက တကယ့်အူယားစရာအတိ ။ သူငယ်ချင်းထားခွင့်မပေးထားပေမယ့် Pond နဲ့ Phuwin ကိုတော့ ရင်းနှီးခွင့်ပေးထားသည် ။ Phuwin ကလည်း Santa ကိုဆို တော်တော်လေးခင်သည် ။ ငယ်ငယ်ကတည်းက မြင်လာတဲ့ပေါက်စလေးဆိုတော့ သူတို့အတွက်လည်း Santa က ညီငယ်လေးတစ်ယောက်ပင်ဖြစ်သည် ။

" ညီလေးကို သူငယ်ချင်းပေးထားလိုက်ပါ "

Phuwin ရဲ့အပြောကြောင့် Perth ရဲ့အကြည့်က ဒိုင်းကနဲ ဝင်ရောက်လာသည် ။ မကြိုက်တာသိပေမယ့် ပြောမှရမည်လေ ။ ဘယ်နှယ့် ဒီတိုင်းထားလို့ဖြစ်မလား ။ ကလေးလည်း သူ့ရွယ်သူတွေနဲ့ လွတ်လွတ်လပ်လပ်နေချင်မှာပေါ့ ။

" မလိုဘူး ! "

" မင်းကလေ မတိုသင့်တာကို တိုတယ် မင်းညီကို ဘယ်သူမှ ကိုက်မစားဘူး "

" ကြည့်တဲ့အကြည့်တွေကို မကြိုက်တာလေ Tata ကို ငယ်ငယ်လေးနဲ့ ဘယ်အရောင်မှလာမဆိုးစေချင်ဘူး Tata က အရွယ်မရောက်သေးဘူး "

Phuwin ရော Pond ရော ခေါင်းသာ အသာခါရမ်းလိုက်ကြသည် ။ ဒီကောင် သူ့ညီကိုနှမြောတာ သိပေမယ့် အခုအခြေအနေက ညီတစ်ယောက်ကို နှမြောတာနဲ့မှ တူမနေဘဲ ။ ဘယ်သူက ညီလေးဆိုပြီး ဒီလောက်တွန့်တိုလို့လဲ ။

" Ta သူငယ်ချင်းမလိုဘူး phi Perth ရှိရင် ရပါတယ် "

Santa ၏ စကားကြောင့် Perth ရဲ့တွေ့လားဆိုသည့် အကြည့်က မာန်တက်ချင်နေသည့်သဘော ။ မာန်မတက်နိုင်ဘဲ ရှိရိုးလား ။ Tata က သူမှသူလေ ။

ဒီလိုနဲ့ နေ့ရက်တိုင်းမှာ Santa ဆိုတဲ့ကောင်လေးက Perth ရဲ့ သဘောဆန္ဒတိုင်းမှာ နေထိုင်ရတာကို သဘောအကျဆုံးဖြစ်နေခဲ့သည် ။ ပြီးတော့ အချိန်တိုင်း Perth ကသာ သူ့အနားရှိနေမည့်လူလို့ ယုံကြည်ထားသည် ။ ဒါတွေသည် ကောင်လေး၏ ခံယူချက်မဟုတ်ဘဲ ခံယူချက်တစ်ခုဖြစ်လာအောင် လုပ်ယူသည့် အတ္တများကြောင့်ဖြစ်သည်ဆိုတာကိုတော့ ဘယ်သူက သိမှာတဲ့လဲ ။ အဲ့ဒီလို ခံယူချက်က ဘယ်လောက်ထိ ပြင်းထန်ခဲ့သလဲဆိုရင်

" Tata .... "

" phi Perth ! "

ရင်ခွင်ထဲ ပြိုကျလာသည့်အကောင်ပေါက်လေးသည် တသိမ့်သိမ့်ရှိုက်ငိုလေသည် ။ ကျောပြင်အားခပ်ဖွဖွပုတ်ပေးရင်း တစ်ကိုယ်လုံးကို တင်းကျပ်စွာ ထွေးပွေ့ထားမိသည် ။ ထို့နောက် ပတ်ဝန်းကျင်အား ကြည့်တော့ အနက်ရောင်သီးသန့်ကိုသာ ဝတ်ဆင်ထားသော လူတစ်စုရယ် ရှိုက်ငိုနေသော ဒေါ်လေး Saung အား နှစ်သိမ့်ပေးနေသူ မေမေရယ် သူတို့အား ခပ်လှမ်းလှမ်းမှရပ်ကြည့်နေသော မျက်နှာမကောင်းလှသည့် ဖေဖေရယ် ။ ပြီးနောက် ဓာတ်ပုံထဲမှ အလှဆုံးပြုံးပြနေသည့် ဦးလေးရယ် ။

သူလက်ခံလိုက်သည် ။ဦးလေးက တကယ်ဘဲ Santa တို့ကိုထားခဲ့ပြီ ။

ရင်ခွင်ထဲက ခန္ဓာကိုယ်လေးအား ထုတ်ကြည့်ကာ မျက်နှာလေးကို ဆွဲမော့တော့ မျက်ရည်စတို့ပြည့်နေသော မျက်နှာလေးကြောင့် သူ့ရင်တစ်ခုလုံး ပူလောင်သွားရသည် ။

" ဖေဖေ .... ဟင့် ဖေဖေ မရှိတော့ဘူး phi အင့် "

ပြောပြီးသည်နှင့် ရှိုက်ကြီးတင် ငိုချလိုက်သော အကောင်ပေါက်ကလေးအား သူ့ရင်ခွင်ထဲ နစ်နေအောင် ဆွဲသွင်းပစ်လိုက်သည် ။

" ကိုယ့်ရင်ခွင်မှာ အဝငိုလိုက် Tata .... ပြီးရင်တော့ မငိုနဲ့တော့ ဒီနေ့ကစပြီး ကိုယ်က စောင့်ရှောက်ပေးမှာမို့ "

သူ့အား တင်းကျပ်စွာပြန်ဖက်သွယ်လာပြီး အားပါးတရငိုနေသူကြောင့် သူကိုယ်တိုင်ပင် ဝမ်းနည်းပက်လက်ဖြစ်ရသည် ။ ထိုနေ့က သူ့ရင်ဘတ်ထဲစကားတစ်ခွန်းထဲကသာ ထပ်နေခဲ့သည် ။

သူ Tata ကို အသက်ရှင်နေသမျှ စောင့်ရှောက်သွားမည် ။

အိမ်ပြန်ရောက်မှ သိခဲ့ရတာတစ်ခုရှိသည် ။ Tata သည် စျာပနာပွဲသို့ သူရောက်မလာမချင်း မျက်ရည်လည်းမကျသလို မျက်နှာပင်မပျက်ဘဲ သူ့အဖေဓာတ်ပုံရှေ့ထိုင်နေခဲ့တာပါတဲ့ ။ သူရောက်လာမှသာ အားကိုးတကြီး ငိုဖို့သတိရခဲ့တာပါတဲ့လေ ။

-----

အနှောင်အဖွဲ့တစ်ခု အစပျိုးခဲ့ခြင်း

" တို့ Perth နဲ့ခင်ချင်တယ် "

မျက်စိရှေ့သို့ရောက်လာသော ချောကလက်ဗူးလေးကြောင့် Perth စာရေးနေရာမှ မော့ကြည့်လိုက်သည် ။ ထိုအခါ ပြုံးရွှင်နေသောမျက်နှာလေးနှင့် ကောင်မလေးတစ်ယောက် ။ အခြားလူတော့မဟုတ်ပါ Perth နဲ့ ငယ်ငယ်ကတည်းက အမြဲတမ်း စာပြိုင်နေတဲ့ကောင်မလေး Wan ။

" ဘာအတွက်လဲ "

သူမေးလိုက်တော့ ကောင်မလေးက မျက်နှာအနည်းငယ်ညှိုးသွားကာ

" တို့ မင်းအဆင့်ကို ကျော်နိုင်ဖို့ ဘယ်လိုကြိုးစားရမလဲ မသိဘူးလေ အနီးကပ် လိုက်ကြည့်ပြီး ထပ်ကြိုးစားရမလားလို့ "

ထိုကောင်မလေးစကားကြောင့် Perth နည်းနည်းတော့ သဘောကျမိပါသည် ။ ပုံမှန်ဆိုလျှင် သူ့အနားကပ်လာသမျှ မိန်းကလေးတိုင်း သဘောကျလို့ ချစ်မိနေလို့ ဆိုတာကလွဲပြီး အခြားဘာမှ မပြောတတ်ကြပေ ။

" စကားတော့ကောင်းပါတယ် ဒါပေမယ့် ကိုယ်တော့ မင်းနဲ့မခင်ချင်ဘူး "

ထိုသို့ပြောပြီး စာထဲကိုသာ အာရုံပြန်စိုက်လိုက်သည် ။ ခဏသာ ငြိမ်သက်သွားသည့်ကောင်မလေးသည် ဇွဲလျော့သွားပုံပေါ်ပါသည် ။ မတတ်နိုင်ပါ ။ Perth အနေနဲ့ ဘယ်မိန်းကလေးနှင့်မျှ အရောအနှောသိပ်မလုပ်တတ်ပေ ။ ယောက်ျားလေးသူငယ်ချင်းတောင် Pond နဲ့ Phuwin သာ ရှိသည် ။

ဇွဲလျော့သွားပြီထင်ရပေမယ့် နောက်တစ်နေ့မှာ ထိုကောင်မလေး ပြန်ရောက်လာသည် ။ ဒီတစ်ခါတော့ မျက်စိရှေ့ရောက်လာသည်ပ ချောကလက်ဘူး မဟုတ်တော့လဲ င်္သချာဖတ်စာအုပ်တစ်အုပ်သာ ဖြစ်လေသည် ။

" တို့ကို စာရှင်းပြမယ်မဟုတ်လား "

" ..... "

" မငြင်းပါနဲ့ တို့က စာကိုဘဲလိုချင်ရုံပါ "

ဒီလိုနဲ့ နေ့တိုင်းလိုလို စာအုပ်တစ်အုပ်ကိုင်ပြီး သူ့ဆီရောက်လာတတ်တဲ့ ကောင်မလေးတစ်ယောက်နဲ့ ခင်မင်ရင်းနှီးခဲ့သည်ဘဲ ဆိုရမလား ။ ရင်းနှီးမှုဟာ တစ်ဖြေးဖြေးတိုးလာပြီး နောက်ဆုံးစာတွေ အတူတူအမြဲလုပ်ဖြစ်ကြတဲ့အထိပင် ရောက်လာခဲ့သည် ။ Wan က တကယ်တော်တဲ့ မိန်းကလေးပါ ။ အားလပ်ချိန်တိုင်း စာအတူကြည့်ဖို့ရောက်လာတတ်သည် ။ တစ်ချို့ရက်တွေဆိုရင် အိမ်မှာဘဲ စာအတူတူလုပ်ဖြစ်ကြသည် ။

" Perth ကို တို့ဘယ်လိုလိုက်လိုက် လိုက်မမှီဘူး Perth မှာ စာတော်တဲ့ဆေးတွေများ ရှိနေတာလား "

" ရှိနေရင်တောင် ကိုယ် မင်းကို မပေးဘူး Wan "

" စိတ်ပုတ်လိုက်တာ "

အားလပ်ချိန်တော်တော်များများမှာပင် Wan နဲ့ စာအတူတူလုပ်ရင်း အချိန်ကုန်နေခဲ့မိသည် ။ ဒီလိုအချိန်ကုန်နေခဲ့ခြင်းသည် သူ့အတွက် လစ်ဟာမှုတစ်ခုလည်း ရှိခဲ့ပါသည် ။

" Wan အခု ဘယ်နှနာရီရှိပြီလဲ "

" လေးနာရီခွဲပြီလေ စောပါသေးတယ် Perth !! ဘယ်သွားမှာလဲ "

Wan ကိုပင် မဖြေနိုင် ။ သူဆိုင်ထဲမှ ပြေးထွက်လာခဲ့သည် ။ လေးနာရီခွဲဆိုတော့ ကျောင်းဆင်းပြီးလို့ နာရီဝက်ကျော်နေပြီ ။ ပေါက်စလေး သူ့ကိုစောင့်နေတော့မည် မဟုတ်လား ။ ဒီနေ့မှ သူက နေ့လယ်ပိုင်းအတန်းဖျက်ပြီး စာသွားလုပ်မှာမို့ Tata ကို သေချာစောင့်နေ phi ပြန်လာကြိုမယ်ဆိုပြီး မှာထားခဲ့တာ ။ သူအမြန်ဆုံးနည်းနဲ့ ကျောင်းရှေ့ကို အပြေးလာခဲ့ပါသည် ။

ကျောင်းရှေ့ရောက်သည်နှင့် သူ့ရင်တွေကို အစိတ်စိတ်မွန်းလိုက်သလိုပင် ။ ခုံတန်းလျားလေးမှာ လှဲကျနေသော ပေါက်စလေးရဲ့ခန္ဓာကိုယ်ကို တွေ့ခဲ့ရသည် ။ ဆေးရုံကို အမြန်ပို့ပြီးကာမှ သူသိခဲ့ရသည် ။ ဒီထက်နောက်ကျရင် အသက်အထိပါစိုးရိမ်ရနိုင်တယ်တဲ့ ။ အလယ်တန်းတက်ခါနီးကတည်းက ဒီကောင်လေး အရမ်းချူချာလာတာ ။ မကြာခဏ သတိလစ်တတ်တယ် ။ နေမကောင်းဖြစ်တယ် ။ ဒါကို သိသိရက်နဲ့ သူမေ့ဖြစ်အောင်မေ့သွားခဲ့သည် ။ သူမလာမချင်း စောင့်နေခဲ့တဲ့ကလေးက တစ်ယောက်ထဲ ဘယ်လောက်တောင် ကြောက်နေခဲ့ပါ့မလဲ ။ ထိုနေ့က ဖေဖေရော မေမေပါ သူ့ကို အပြစ်တင်ဆူပူခဲ့ကြသည် ။ သေချာဂရုစိုက်ပေးပါ့မယ်လို့ ကတိပေးခဲ့တဲ့ကြားက မတည်နိုင်တဲ့ ကိုယ်ကိုကိုယ်လည်း စိတ်ပျက်ဝမ်းနည်းခဲ့ရပါသည် ။ ပေါက်စလေး သတိရလာတော့ တောင်းပန်စကားဆိုခဲ့ရသည်မှာလည်း အကြိမ်ကြိမ် ။ ပေါက်စလေးကတော့ တောင်းပန်ဖို့မလိုကြောင်း သူ့ကြောင့်ဖြစ်တာ မဟုတ်ကြောင်း သေသေချာချာပြောပြနေတာ လူကြီးလေးအတိုင်းပင် ။

အဲ့ဒီနေ့ကစပြီး သူ Wan နဲ့ စာလုပ််ဖို့အချိန်တွေ ဖျက်ပစ်လိုက်တယ် ။ ဒီရက်ပိုင်း သူလစ်ဟာခဲ့သမျှတာဝန်တွေကို နောင်တရမဆုံးဖြစ်နေမိသည်လေ ။ Pond နဲ့ Phuwin ကတော့ သူ့ကို တော်တော်လေးစိတ်ဆိုးကြသည် ။ အကြောင်းကတော့ Tata ကိုကျ သူငယ်ချင်းမထားနဲ့ပြောပြီး သူကျ ကောင်မလေးနဲ့ သာယာနေနိုင်လို့တဲ့လေ ။ Tata က အားလပ်ချိန်တိုင်း Phuwin တို့နားလာထိုင်ပြီး သူ့ကို စောင့်နေတဲ့အကြောင်းပါ ထည့်ပြောသေးသည် ။ သူပြန်ပြောခဲ့တာက Wan နဲ့ သူ့ရဲ့ဆက်ဆံရေးသည် သူငယ်ချင်းသက်သက်ဖြစ်ကြောင်းနဲ့ စာလုပ်ဖို့ သက်သက်သာဖြစ်ကြောင်း ။ အဟုတ်လည်း သူ Wan အပေါ် စိတ်ယိုင်ခဲ့တာ ရှိမနေပါ ။ ဒီကိစ္စတွေကြောင့် ပေါက်စလေးအပေါ် အကိုတစ်ယောက်တာဝန်လစ်ဟင်းရတယ်ဆိုရင် သူ Wan ကို ရှောင်မှာပါ ။တကယ်လည်း သူ Wan ကို ရှောင်ပြီး ပေါက်စလေး အပေါ်ကိုသာ အချိန်ပေးခဲ့သည် ။ Wan ကတော့ သူ့အနားရောက်ရောက်လာတတ်ပြီး ရရင်ရသလို စာတွေမေးတတ်သည် ။ Santa ကို အားကျကြောင်းကိုလည်း ဝမ်းနည်းရိပ်သန်းနေသော အသံဖြင့်ပြောတတ်သေးသည် ။ ဒီလိုဆိုတော့လည်း Perth အနေနဲ့ Wan ကို အားနာရသည်မဟုတ်လား ။ သူဆုံးဖြတ်ခဲ့သည် ။ Wan နဲ့ အရင်လို ရင်းနှီးစွာပြန်နေမည် ။ ထို့အတူ ပေါက်စလေးအပေါ် မလစ်ဟင်းရအောင်လည်း သူဂရုစိုက်ပါမည် ။

ဒီလိုနဲ့ စာသင်နှစ်တစ်ခု ကုန်ဆုံးခဲ့သည် ။နောက် စာသင်နှစ်ခုစချိန်တွင်တော့ ပိုပိုသာသာလေး လှလာပြန်သည့် Santa Pongsapak ကြောင့် ရန်လိုက်ဖြစ်ရတာပါဘဲ ။ ကောင်မလေးတွေပါမက ကောင်လေးတွေကပါ Santa အနား သိသိသာသာ လိုက်ကပ်ကြသည် ။ Perth ရှိနေတာကိုပင် သတိမူကြတော့တဲ့အထိ ကဲသဲကြလွန်းသည် ။ တစ်ခါတစ်လေ ထိုးပစ်လိုက်မိလို့ ရုံးခန်းပါတက်ရသည်အထိ ။ ပြီးမှသာ Perth ရဲ့ လက်စကိုသိပြီး သိပ်မကပ်ကြတော့တာပင် ။ Santa ကတော့ ထုံးစံအတိုင်း သူငယ်ချင်းတစ်ယောက်မျှ မရှိပါချေ ။

" phi Perth ..... Tata ရေခဲမုန့်စားချင်တယ် "

" ကိုယ် အပြန်ကျဝယ်ကျွေးမယ် "

" ပြီးရင် အရုပ်လည်း သွားကောက်ရအောင် "

" ဟုတ်ကဲ့ဗျ သခင်လေးသဘော "

ပြုံးသွားသည့်ကောင်လေး၏ မျက်နှာကြောင့် Perth လည်း လိုက်ပြုံးမိကာ ဆံပင်လုံးလုံးလေးကို ထိုးဖွလိုက်သည် ။ အပြန်ကျလည်း တကယ်ဘဲ ရေခဲမုန့်ဝယ်ကျွေးမှ ရပါလိမ့်မည် ။ ကျောင်းဆင်းချိန်တွင် Tata လက်ကို ကိုင်ဆွဲကာ သူကျောင်းဝန်းထဲမှ ထွက်လာသည် ။ အိမ်ကကားလည်း လာကြိုနေပြီမို့ ကားဆီသို့ နှစ်ယောက်သား လျှောက်လာခဲ့ကြသည် ။

" Perth ! .... နေအုံး !! "

ကားပေါ်တက်ခါနီးဆဲဆဲတွင် ကြားလိုက်ရသည့်အသံကြောင့် Perth လှည့်ကြည့်လိုက်တော့ စက်ဘီးအားတွန်းလျက် သူတို့ဆီပြေးလာနေသည့် Wan အားတွေ့လိုက်ရသည်မို့ Perth ရပ်စောင့်နေလိုက်သည် ။

" Perth ကို တွေ့တာနဲ့အတော်ဘဲ တို့ မနက်ဖြန်ဖြေရမည့် Lesson ကို နည်းနည်းမရှင်းဘူးဖြစ်နေတာ ရှင်းပြပေးပါလားဟင် "

Wan အပြောကြောင့် Perth နည်းနည်းတော့ တွေဝေသွားရသည် ။ ပေါက်စလေးကို ရေခဲမုန့်လိုက်ကျွေးမယ်လို့ သူကတိပေးပြီးပြီလေ ။ သို့သော်ငြား မနက်ဖြန်ဖြေရမယ့် Lesson ဆိုတော့ ငြင်းပြန်ရင်လည်း Wan အခက်တွေ့နိုင်သည် ။

" မငြင်းပါနဲ့ Perth ရယ် မကူညီရင် တို့မနက်ဖြန် စာမေးပွဲကျလိမ့်မယ် "

မငြင်းသာတော့တာမို့ ကားပေါ်က ပေါက်စလေးအား သူလှမ်းကြည့်လိုက်သည် ။ ထိုအခါ သူ့အားမျက်လုံးဝိုင်းဝိုင်းများဖြင့် ကြည့်နေကာ ဘာတစ်ခုမှတော့မပြောပေ ။ driver ဦးလေးကလည်း သူ့အဖြေကိုစောင့်နေပုံပေါ်ပါသည် ။

" Tata ..... "

" Tata ဦးကြီးကိုဘဲ ဝယ်ကျွေးခိုင်းလိုက်ပါ့မယ် "

သူမပြောခင် ဖြတ်ပြောလာသည့် ကောင်လေး၏ အသံသည် ပကတိတည်ငြိမ်နေသည်ကြောင့် သူ့စိတ်ထဲ နည်းနည်းတော့ ဘဝင်မကျမိပါ ။ သို့သော်လည်း

" နောက်နေ့မှ ကိုယ်တို့အရုပ်သွားကောက်ရအောင် "

" Tata အရုပ်မလိုချင်တော့ဘူး "

" ...... "

" ဦးကြီး ရေခဲမုန့်ဆိုင်ကို မောင်းပေးပါနော် "

ကားလေးထွက်သွားပြီးသည့်နောက် နေရာမှရပ်ကျန်ခဲ့သည့်သူသည် အကြောင်သားဖြစ်လို့ရယ် ။ Tata က သူ့ကို စိတ်ဆိုးသွားတာလား ။ ဒီလိုပုံစံက Tata ရဲ့ စိတ်ဆိုးတဲ့ပုံစံလား ။ သူ့သဘော သူ့ဆန္ဒသာ နေခဲ့သည့် အဲ့ဒီပေါက်စလေးက ဒီလိုစိတ်ဆိုးတဲ့ပုံစံရှိသေးသည်တဲ့လား ။

" Santa က တို့ကို သိပ်သဘောမကျပုံဘဲနော် Perth "

" စိတ်ထင်လို့ဖြစ်မှာပါ "

ထို့နောက် စက်ဘီးတစ်စီးအား နှစ်ယောက်စီးရင်း စာလုပ်နေကျဆိုင်သို့ ရောက်လာခဲ့သည် ။ ကားထဲမှ နောက်လှည့်ကြည့်လျက်ပါလာသူ ကောင်လေး၏ မျက်ရည်များကိုတော့ driver ဦးကြီးမှ လွဲ၍မည်သူမျှ မြင်မည်မထင်ပါ ။

" ဦးကြီး Ta ရေခဲမုန့်လည်း မစားချင်တော့ပါဘူး အိမ်ဘဲ ပြန်ရအောင် "

" စိတ်မကောင်းမဖြစ်ပါနဲ့ကလေးရဲ့ ရေခဲမုန့်က ဦးကြီးဝယ်ကျွေးလည်း ချိုပါတယ် "

" ဟင့်အင်း Ta အိမ်ပြန်ချင်လို့ပါ "

ပြုံးလာစေရန်စသော်ငြားလည်း ပို၍ မှိုင်ကျသွားတဲ့ကောင်လေးကြောင့် ကားမောင်းနေရင်း စိတ်မကောင်းဖြစ်ပေးရုံမှ အခြားမရှိပါ ။ ဒီကလေးတွေ ခုတလော အရင်လိုမဟုတ်ကြတော့ပါ ။ မဟုတ်ဆို Perth က အရွယ်ရောက်နေပြီလေ ။ Ta လေးကို အချိန်သိပ်မပေးဘဲ ကောင်မလေးနဲ့ အချိန်ဖြုန်းတတ်နေပြီ ။ Ta လေးလည်း ကောင်မလေးရတဲ့တစ်နေ့ Perth ကို နားလည်မှာပါဟုပင် တွေးလိုက်မိသေးသည် ။

ဦးကြီးအတွေးက ရိုးရှင်းလွန်းပါသည် ။

-----

( အခါးတွေ အကျွေးလွန်နေမိလို့နောက်ကြောင်းလေး လာပြန်ပေးတာပါနောက်တစ်ပိုင်းလည်း နောက်ကြောင်းပြန်တာလောက်ဘဲ အဓိကထားရေးပါ့မယ်ရှင့် 💕

ကျွန်မ သွေးပေါင်တွေကျပြီးနေမကောင်းဖြစ်နေတာ ကိုယ့်ကလေးတွေကိုဖတ်စေချင်လို့ ကြိုးစားပြီးရေးပေးလိုက်ပါတယ်နော် ။ အခုတော့ LOL performance ကြောင့် အသက်ပါထွက်ချင်နေပါပြီ 😭 )

5.5К2990

Previous chapter Next chapter

There are no comments yet. Log in to be the first to leave a review!

12

Similar stories