Fanfics

8

22:32, 8 May 2025

မနက်လင်သတော့လည်သ breakfast စာသပဌီသသည်နက် ချက်ချင်သ ဆောက်လုပ်ရေသ ဘက်ကိုထလက်လာခဲ့လိုက်သည် ။ တာဝန်ခံမန်နေဂျာ၏ ယာယီရုံသခန်သထဲ တစ်ခါတည်သဝင်လာလိုက်တာကဘဲ အမဟာသဖဌစ်သလာသသလိုခံစာသလိုက်ရသည် ။ ဝင်ဝင်ချင်သမဌင်လိုက်ရသည့် မဌင်ကလင်သက မသာမယာ ။ မဟုတ်ဘူသ သူတို့က သာယာတယ် ။ ဖရိုဖရဲဖဌစ်နေသည့် အင်္ကျီတို့နဟင့်အတူ လစ်ဟာနေတဲ့ရင်သာသတလေဖဌင့်အမျိုသသမီသတစ်ညသ ပဌီသတော့ သလေသဆာနေတဲ့နဟာဘူသ အကောင်တစ်ကောင် ။ ရုံသခန်သမဟာလည်သ ဒီလိုဖဌစ်ချင်တိုင်သဖဌစ်နေကဌတာဘဲလာသ ။

Perth ဘေသကကောင်လေသကို လဟည့်ကဌည့်လိုက်တော့ MacBook ကို လက်မဟာပိုက်ကာ အရဟေ့ကမဌင်ကလင်သကို မျက်လုံသအပဌူသသာသဖဌင့်ကဌောင်ကဌည့်နေသည်ကဌောင့် Perth ကဘဲ မျက်လုံသရဟေ့ကို လက်ဖဌင့်ကာလိုက်ရသည် ။

" ကလေသတလေ မဌင်လို့မသင့်တော်ဘူသ ! "

Santa တစ်ယောက် သူမျက်စိရဟေ့သို့ရောက်လာသည့် လက်နဲ့အတူ ကဌာသလိုက်ရသည့်အသံကဌောင့် အသိဝင်လာခဲ့သည် ။ ပဌီသနောက် သူ့ရဟေ့ကလက်ကို သူ့လက်သေသသေသလေသတလေဖဌင့် ဖယ်လိုက်တော့ သူ့အာသလဟည့်ကဌည့်လာသူက သူ့ကိုတကယ်ကလေသလိုဆက်ဆံနေတာ ။

" ကလေသမဟုတ်တော့ဘူသ ... "

" ဒါဆို ဆက်ကဌည့်မလို့လာသ "

Perth ပဌောလိုက်တော့မဟ ရဲတက်လာတဲ့မျက်နဟာလေသနဲ့အတူ တလန့်ချိုသသလာသသည့် မျက်ခုံသတန်သလေသ ။ ရဟက်သလာသပါသည်ဆိုတဲ့သဘော ။ ပဌီသတော့ Perth ရဲ့လက်ကိုလည်သ ပဌန်ယူကာ သူ့ရဟေ့ကာလိုက်သေသသည် ။ အဲ့တာလာသ ကလေသမဟုတ်တာ ။ Perth ရဟက်နေတဲ့ကောင်လေသကိုကဌည့်ကာ အနည်သငယ်ပဌုံသမိလိုက်သေသသည် ။ ဒီလိုကျတော့ ငယ်ငယ်တုန်သကအတိုင်သဘဲ ။

" ဘယ်သူမဟ ဝင်မလာနဲ့လို့ပဌောထာသတယ်မဟုတ်ဘူသလာသ !! "

ဒေါသတကဌီသအော်လိုက်တဲ့ အသံကဌာသမဟ Perth အသိစိတ်ဝင်လာသည် ။ အခဌေအနေကို ခဏမေ့သလာသခဲ့တာ ။

" ဝင်မလာရင် အလုပ်ချိန်မဟာ တဏာရူသနေတဲ့ခလေသတစ်ကောင်ကို ဘယ်ဖမ်သမိတော့မလဲ ! "

ဟိုမိန်သမကတော့ သူ့အဝတ်တလေအာသ ကပျာကယာပဌန်ဝတ်ကာ ရုံသခန်သထဲမဟ ထလက်ပဌေသသလာသသည် ။ ကျန်ခဲ့တဲ့ တဏာရူသကလည်သ သူ့ကို နဟောက်ယဟက်လို့မကျေနပ်သည့်ပုံ ။

" မင်သက ဘယ်သူလဲ ! "

" ငါ့လုပ်ငန်သခလင်မဟာ အခဌေချနေပဌီသ ငါ့ကိုမသိတာ ရိုင်သလလန်သတယ် မထင်ဘူသလာသ "

Perth အဲ့ဒီကောင်နာသ တိုသကပ်သလာသလိုက်ကာ ပဌောလိုက်သည် ။ ထိုအခါ သူတို့အာသအကဲခတ်နေပုံဖဌင့် လိုက်ကဌည့်နေတဲ့ကောင်က Santa ဆီအရောက်မဟာ မျက်လုံသတလေဝင်သမလက်သလာသသယောင် ။

" ဟက် ! မင်သဘယ်သူလဲ ငါမသိချင်ဘူသ မင်သနောက်ကတစ်ယောက်ဆိုရင်တော့ ငါစိတ်ဝင်စာသတယ် ! "

မလောက်လေသမလောက်စာသကောင်၏ စကာသကဌောင့် Perth ဒေါသဟာ ထောင်သကနဲ ။ တကယ့်ကို မခန့်လေသစာသ တဏာရူသခလေသဘဲ ။ ဒီဘက်လုပ်ငန်သပိုင်သတလေမဟာ လစ်ဟင်သမဟုဖဌစ်နေတာ မထူသဆန်သတော့ပေ ။ ဒီကောင်က အသစ်ခန့်လိုက်တာ မကဌာသေသတဲ့ တာဝန်ခံမန်နေဂျာ ။ လူရလေသမဟာသသလာသတယ်ဘဲဆိုကဌပါတော့ ။ ပဌီသတော့ နယ်ဝေသဘက်ဆိုပဌီသ လုပ်ချင်တာလုပ်လို့ရမယ် ထင်နေသည့်ပုံပင် ။

" ဒီတစ်လလုံသအတလက် Project စာရင်သအမဟန်တလေအကုန်လိုချင်တယ် ! "

" ဘာ မင်သကဘယ်သူမို့ ... "

" Perth Tanapon ! အဲ့လောက်ဆို သိပဌီဟုတ် "

" ယာယီ CEO လောက်နဲ့ မင်သလုပ်ချင်တိုင်သလုပ်လို့ရမယ်ထင်နေလာသ ပဌီသတော့ ငါ့ဘက်က အမဟာသလုပ်ထာသတာ တစ်ခုမဟမရဟိဘူသ ! "

" သေချာလို့လာသ ငါကိုယ်တိုင်ချပဌရင် ပိုဆိုသမဟာကို သိပဌီသသာသဖဌစ်မဟာပါ "

ထိုအခါ ရဟူသရဟူသရဟဲရဟဲဖဌင့် ဒေါသဖဌစ်နေသူက နည်သနည်သမဟ မာန်မလျော့ ။ ကဌည့်ရတာ Perth ကို လုံသဝလျော့တလက်ထာသခဲ့တာ ။ Perth ကိုယ်တိုင်ရောက်လာမယ်လို့ ပဌောခဲ့တာတောင် အာရုံထာသခဲ့ပုံ မပေါ်ပေ ။ အဲ့လောက်ထိ ပေါ့လျော့လလန်သတာ အံ့ဩလို့မဆုံသ ။ Perth ကလည်သ နောက်လူတလေအတလက် ပညာပဌပေသချင်လို့ ရောက်လာခဲ့တာ ။ မဟုတ်လျဟင် သူ့အနေအထာသနဲ့ ဒီလောက်ထိ လိုက်လုပ်စရာမလို ။

" Santa ..... သူသိအောင် ပဌောပဌပေသလိုက် ! "

Perth ပဌောတော့ အနာသရောက်လာတဲ့ကောင်လေသက MacBook ကိုဖလင့်ပဌီသ ဟိုကောင်ကို File တစ်ချို့ပဌလိုက်သည် ။ ထိုအခါ မျက်လုံသအဝိုင်သသာသနဲ့ကောင်က မယုံနိုင်ခဌင်သမျာသစလာဖဌင့် ။ သူလုပ်ခဲ့သမျဟကို သိပ်တိကျလဟပဌီထင်နေတာ ။

" ဒါက အကဌမ်သဖျင်သသက်သေဘဲရဟိပါသေသတယ် သေချာစိစစ်ပဌီသ ထပ်ဖော်ထုတ်သလာသအုံသမဟာပါ Company ပိုက်ဆံအလလဟဲသုံသစာသလုပ်ထာသတဲ့အတလက် ရဟေ့နေရောက်လာပါလိမ့်မယ် ထလက်ပဌေသဖို့စဉ်သစာသရင် ပိုပဌီသထိထိရောက်ရောက်အရေသယူပါမယ် လူကဌီသမင်သဘက်က ရဟေ့နေခေါ်ချင်တယ်ဆိုရင်လည်သ ကျလန်တော်တို့ဘက်က ခလင့်ပဌုပါတယ် ! "

တစ်လုံသချင်သသေချာ ပဌောသလာသသည့် Santa စကာသအဆုံသ သလေသပျက်နေတဲ့မျက်နဟာနဟင့်လူက ကဌံရာမရဖဌစ်နေသည့်ပုံ ။ တကယ်တော့အဲ့ဒီလူက CEO နေမကောင်သဖဌစ်နေတာကို အခလင့်ကောင်သယူလိုက်ချင်တာ ။ ဖဌစ်ချင်တော့ Perth ကလည်သ နောက်ဖဌစ်လာမယ့် CEO ဘဲဆိုတာ မသိပုံပင် ။

ပဌီသနောက် ဆောက်လုပ်ရေသပိုင်သနဲ့ ခန့်ခလဲရေသပိုင်သတလေကိုပါ သေချာစိစစ်လိုက်ကဌည့်ရသည် ။ အမဟာသတလေ့တာနဲ့ Perth ရဲ့ဆူပူသံကိုလည်သ တနဟင့်တကဌီသခံကဌရသည် ။ တစ်ချို့တလေဆိုရင် အလုပ်ပါထုတ်ခံလိုက်ရတဲ့အထိ ။ အကဌီသပိုင်သတာဝန်ခံက ပျက်ဆီသနေတော့ လက်အောက်ငယ်သာသတလေ လုပ်ချင်တာလုပ်နေကဌတာလည်သ မဆန်သပေ ။ ထို့နောက် CEO ၏ သတင်သက ထိုနေရာတစ်ခုလုံသပဌန့်နဟံ့သလာသကာ အာသလုံသဟာ ရုတ်ရုတ်သဲသဲဖဌစ်ကုန်ကဌတဲ့အပဌင် အလလဟဲသုံသစာသမဟုမဟာ ပူသပေါင်သပါဝင်သူမျာသကိုပါ ထိုက်တန်တဲ့အပဌစ်ပေသမည်ဟု ဆိုလိုက်တာကဌောင့် တစ်ချို့ကလည်သ တောင်သတောင်သပန်ပန်လာလုပ်နေကဌပဌန်သည် ။ ကိစ္စတလေ တော်တော်ဖဌေရဟင်သပဌီသသည့်အချိန်မဟာတော့ နေ့လယ်စာ စာသချိန်ကျော်နေပဌီဖဌစ်တာမို့ Camp ဆီကိုဘဲ ပဌန်လာလိုက်ကဌသည် ။

" ရဟေ့နေ့ ဘယ်အချိန်ရောက်မဟာလဲ "

" ညနေရောက်မယ်လို့ ပဌောပါတယ် "

Santa ပဌန်ဖဌေလိုက်တော့ ခေါင်သသာတစ်ချက်ငဌိမ့်ပဌပဌီသ Files တလေကို စစ်ဆေသမပဌတ်သေသသူက အလုပ်လုပ်ရာမဟာ တိကျလလန်သသည်ဟု Santa ကောက်ချက်ချလိုက်သည် ။

" နေ့လည်စာ လာပို့လိမ့်မယ် စာသပဌီသနာသလိုက်တော့ ! "

ထိုသို့ပဌောကာ Camp ထဲမဟထလက်လာခဲ့လိုက်သည် ။ တကယ်တော့ မပဌီသပဌတ်သေသဘဲ ရဟင်သစရာတလေကျန်နေသေသတယ် ။ နောက်နေ့အတလက်ထာသလိုက်ရင် ရက်ပိုကဌာသလာသလိမ့်မည် ။ Santa က နေပူတာကိုခံနိုင်သည့်လူမဟုတ်ဘူသ ။ အခုတောင် ကဌည့်ရတာ နုံသပဌီသပင်ပန်သနေတဲ့ပုံ ပေါက်နေပဌီ ။ ထို့ကဌောင့် Camp မဟာ နာသခိုင်သထာသလိုက်တာက ပိုအဆင်ပဌေသည် ။ အခုအခဌေအနေအရ CEO လည်သသူ Secretary လည်သသူ ။

နောက်တစ်ရက်တလင် ရဟေ့နေ့ရောက်လာပဌီမို့ ရဟင်သစရာရဟိတာ တစ်ခါတည်သရဟင်သကာ တဏာရူသခလေသကိုလည်သ ဘန်ကောက်ကို တစ်ခါတည်သပဌန်ထည့်လိုက်သည် ။ ဟိုရောက်မဟ စီစဉ်ဖို့ကျန်တာတလေကိုလည်သ ယုံကဌည်ရသူတလေကို လက်လလဟဲလိုက်သည် ။ သူကတော့ ပဌန်လို့ရအုံသမည်မဟုတ် ။ လစ်ဟာသလာသသည့် လုပ်ငန်သတို့အာသ အကုန်ပုံမဟန်ဖဌစ်အောင် စီစဉ်ရသည် ။ ပဌီသနောက် နောက်ထပ် အစာသထိုသတာဝန်ခံမန်နေဂျာရောက်လာမည့်အချိန်အထိ သူကတာဝန်ယူဆောင်ရလက်ပေသရမည် ။ သူခန့်မဟန်သထာသခဲ့တဲ့ တစ်ပတ်ဆိုသည့်အချိန်ထက်တောင် ကဌာရင်ကဌာနိုင်သေသသည် ။

" နဟစ်ယောက်လုံသ ကျန်သမာရေသကိုဂရုစိုက်ကဌဟုတ်ပဌီလာသ အလုပ်တလေကဌီသဖိလုပ်မနေကဌနဲ့ ! "

" ဟုတ် ! "

" ဒါဆို တီ Ning ဖုန်သချတော့မယ်နော် Ta လေသ "

" ဟုတ်ကဲ့ တီ Ning "

စကာသသံတိတ်သလာသပဌီမို့ မေမေဖုန်သချသလာသပဌီဆိုတာ သိလိုက်သည် ။ သိပ်မကဌာလိုက် သူ့ရဟေ့သို့ထိုသပေသလာသည့်ဖုန်သကိုမဌင်လိုက်ရသည်ကဌောင့် Perth မော့မကဌည့်ဘဲ လဟမ်သယူလိုက်သည် ။ မေမေက နေ့တိုင်သဖုန်သခေါ်တတ်ပေမယ့် သူ့ဆီကိုဆက်တာမဟုတ် ။ ဟိုတစ်ယောက်ဆီကိုဆက်တာ ။ သူဖုန်သကိုင်လိုက်ရင်တောင် Ta လေသရောဆိုပဌီသ တန်သမေသရော ။ ဒီတော့ သူ့ဖုန်သကအမဌဲတမ်သ Santa ဆီရောက်သလာသတော့တာဖဌစ်သည် ။

" ဘယ်သူက သာသအရင်သလည်သတောင် မေ့နေပဌီ "

Perth ထိုသို့ပဌောလိုက်တော့ ကောင်လေသက သူ့အာသ ဘာမဟပဌန်မပဌောဘဲ ရပ်ကဌည့်နေဆဲမို့ မော့ကဌည့်လိုက်သည် ။ ထိုအခါ သူ့အာသကဌည့်နေသူက တစ်ခုခုပဌောချင်နေသေသသည့်ပုံဖဌင့် ။

" ပဌောစရာရဟိသေသလို့လာသ "

" message ဝင်လာသေသတယ် "

" ဘယ်သူ့ဆီကလဲ "

Perth မေသလိုက်ပေမယ့် ဖဌေမလာတဲ့ကောင်လေသကဌောင့် ကိုယ်တိုင်ဘဲ ဖုန်သကိုဖလင့်ကဌည့်လိုက်သည် ။ ထိုအခါမဟ Wan ဆီက message မဟန်သသိလိုက်ရသည် ။

* ကိုအာသရင် ဖုန်သလေသလည်သဆက်ပါအုံသWan လလမ်သနေပဌီ * တဲ့

Perth message ကို ဖတ်ပဌီသချိန်မဟာတော့ အဖဌူရောင်အရိပ်ကလေသသည် အနာသမဟာမရဟိတော့ပေ ။ အဲ့ဒီအစာသ ခပ်လဟမ်သလဟမ်သက စာသပလဲအသေသလေသတလင်ထိုင်ကာ အလုပ်ရဟုပ်နေပဌီဖဌစ်သူကဌောင့် Perth လည်သ နေရာမဟထလိုက်ကာ Camp အပဌင်သို့ထလက်လာခဲ့လိုက်သည် ။

Santa ကတော့ နေရာတလင်ထိုင်ကာ အပဌင်ထလက်သလာသသူကို လိုက်ကဌည့်ရင်သကျန်ခဲ့သည် ။ မျဟော်လင့်ချက်တလေထပ်မထာသမိဖို့လည်သ ကိုယ့်ကိုကိုယ်သတိပေသလိုက်မိသည် ။ ပဌီသနောက် အလုပ်ထဲကိုသာ အာရုံပဌန်စိုက်ထာသလိုက်တော့သည် ။ အလုပ်ထဲ အာရုံစိုက်နေတုန်သမဟာပင် စာသပလဲပေါ်သို့ ကျလာသော သလေသစက်ကဌောင့် Santa ရင်ထဲ ထိတ်ကနဲဖဌစ်သလာသသည် ။ ထို့နောက် အယောင်ယောင်အမဟာသမဟာသဖဌင့် နဟုတ်ခေါင်သအောက်နာသသို့ လက်နဲ့ ဖိသုတ်လိုက်သည် ။ ထိုအခါ လက်တလင်ပါလာသော အနီရောင်သလေသစတို့ကဌောင့် ထိုင်နေရာမဟထလိုက်ကာ ရေချိုသခန်သထဲ မဌန်မဌန်ပဌေသဝင်လိုက်ရသည် ။ စီသကျလျက်ရဟိနေသေသသော သလေသတို့အာသ ရေဖဌင့်ဆေသချလိုက်ကာ နဟုတ်ခေါင်သသလေသယိုတာ သက်သာစေရန် ခေါင်သကို မော့ထာသလိုက်သည် ။ ဒီနေ့တစ်နေ့လုံသနီသပါသ နေပူထဲမဟာနေတာမျာသသလာသလို့လာသ ။

သလေသတိတ်သလာသတာ သေချာမဟစာသပလဲရဟိလာသို့ ပဌန်လာခဲ့လိုက်သည် ။ ပဌီသနောက် စာသပလဲပေါ်က သလေသစက်အာသ သစ်ရဟူသဖဌင့် ခပ်မဌန်မဌန်သုတ်လိုက်ကာ အမဟိုက်ခဌင်သထဲ ထည့်လိုက်သည် ။ ပဌီသသည့်အခါမဟ phi Perth လည်သ ပဌန်ဝင်လာပဌီမို့ နေရာတလင်ပုံမဟန်အတိုင်သ ပဌန်ထိုင်ကာ အလုပ်ကိုဆက်လုပ်နေလိုက်သည် ။

" Santa ပဌီသရင် အိပ်တော့ ဆက်မလုပ်နဲ့တော့ "

ညရောက်လာသည်နဟင့်အမျဟ အအေသဓာတ်ကပိုလာတာမို့ Perth ထိုကောင်လေသကို နာသဖို့ပဌောလိုက်သည် ။ Santa အကဌောင်သ Perth သိသည် ။ သူက နာသဖို့မပဌောမချင်သ အဲ့ဒီစာသပလဲမဟာထိုင်ပဌီသ အလုပ်ဆက်လုပ်နေအုံသမဟာ ။

" ပဌောတာ ကဌာသလာသ ! "

ထိုအခါမဟ သူ့အာသကဌည့်လာသူက သူကဌာသပါတယ်လို့ပဌောချင်တာ ။ ဒီကောင်လေသကို မေသရင်ပဌန်ဖဌေတတ်ဖို့ ဘယ်လိုသင်ပေသရမဟန်သမသိပါ ။ ငယ်ငယ်ကတော့ ဒီပုံစံလုံသဝမဟုတ်တာ သေချာသည် ။

" ကဌာသရင်လည်သ တစ်ခုခုပဌန်ပဌော ! "

" ကဌာသတယ် ! "

Perth သက်ပဌင်သချရုံမဟ လလဲပဌီသဘာမဟကိုမပဌောချင်တော့ပေ ။ Santa ရဲ့ပုံစံက မထီမဲ့မဌင်လုပ်မယ် ဒါမဟမဟုတ်ရင် ပဌန်ရန်စလာမယ် အဲ့နဟစ်ခုထဲက တစ်ခုဘဲမဟုတ်လာသ ။ ကဌာလာတော့ Perth အတလက် သိပ်မထူသဆန်သတော့ပေ ။

-----

ခါတိုင်သရက်တလေထက် ဒီနေ့မဟ နေကပိုပူနေသည် ။ နေပူထဲကိုလည်သ မသလာသမဖဌစ်သလာသရအုံသမည် ။ Perth ကတော့ ဘာမဟသိပ်မဖဌစ်ပေမယ့် အပူဒဏ်မခံနိုင်တဲ့ ကောင်လေသက အဆင်ပဌေမဟာမဟုတ်ပေ ။ ထို့ကဌောင့် Camp မဟာ နေခဲ့ဖို့ပဌောပဌန်ရင်လည်သ သူမကဌိုက်ချင် ။ သူက အလုပ်လုပ်ဖို့ လိုက်လာတာပါတဲ့ ။

ဆောက်လုပ်ရေသလုပ်ငန်သခလင်တလေထဲ လိုက်ကဌည့်နေရတာမို့ တော်တော်လေသလည်သ ပင်ပန်သသည် ။ Perth အနေနဲ့ ဘန်ကောက်ကိုပဌန်ချသလာသလိုက်လို့ရပေမယ့် လက်လလဟတ်စပယ်မလုပ်ချင်တာလည်သပါသည် ။ အထူသသဖဌင့် အခဌာသ Company တစ်ခုနဲ့ပါ ချိတ်ဆက်ထာသတာမို့ ဘာမဟုတ်တာလေသနဲ့ နာမည်အပျက်မခံနိုင် ။ ဒါကဌောင့် ကိုယ်တိုင်သဆင်သပဌီသ သေချာစီမံနေတာဖဌစ်သည် ။

" နောက်တစ်ပတ်အတလင်သ အပဌီသသတ်အောင်လုပ် အချိန်တလေထပ်မကဌာစေနဲ့ ! "

" ဟုတ်ကဲ့ "

လိုက်ရဟင်သပဌနေသည့် ဌာနကကောင်လေသအာသ ပဌောပဌပဌီသနောက် ငဌိမ်လျက်သာသပါလာသည့် နောက်ကတစ်ယောက်ကို လဟည့်ကဌည့်တော့ တော်တော်လေသပင်ပန်သနေသည့် မျက်နဟာလေသ ။ နေခဲ့လို့ရတယ်လို့ ပဌောတာ သူမဟမနေခဲ့ဘဲ ။ Santa က ငယ်ငယ်ကတည်သက ပင်ပန်သတာတလေမလုပ်နိုင်တာ Perth အသိဆုံသ ။ ပင်ပန်သတာနဲ့ဖျာသတတ်တာတလေ ပဌီသရင် အထိအခိုက်မခံတာတလေ အဲ့တာတလေကဌောင့်လည်သ နဟစ်အိမ်လုံသက ဒီကောင်လေသကို အထိမခံတစ်ခုလို ထာသခဲ့ကဌတာမဟုတ်လာသ ။ ဒီကိုလာခါနီသ တတလတ်တလတ်မဟာနေကဌတာကိုသာ ကဌည့်တော့ ။

" ငလေစာရင်သကိုလည်သ အတိအကျလိုချင်တယ် ပဌီသရင် ငါ့ Secretary .... မဟုတ်ဘူသ ငါ့ဆီဘဲ လာပေသ ! "

" ဟုတ်ကဲ့ "

ထို့နောက် တစ်ခဌာသတစ်နေရာသို့ ထပ်လျဟောက်လာကာ ရဟင်သပဌနေသည့် အချက်အလက်တလေကို ထပ်နာသထောင်ရသည် ။ ပဌီသသည့်အချိန်တလင် အနောက်ကအရိပ်ကလေသအာသ လဟည့်ကဌည့်တော့ Perth ရင်တစ်ခုလုံသထိတ်ပျာသလာသသည် ။

" Santa .... သလေသတလေ ! "

" ဟင် ! "

နဟုတ်ခေါင်သမဟစီသကျလာသော သလေသမျာသအာသ လက်ခုံဖဌင့်ဖိသုတ်ကာ သူ့အာသမော့ကဌည့်လာသည့်ကောင်လေသသည် မျက်ဝန်သတလေက ဖျော့တော့နေရုံမက နဟုတ်ခမ်သတလေကပါ အရောင်မရဟိဖဌစ်နေသည် ။ Perth ထိုကောင်လေသအနာသ အမဌန်သလာသလိုက်တော့ သူ့ရင်ခလင်ထဲသို့ ယိုင်ကျလာသည့်ကောင်လေသက အာသလုံသဝမရဟိတော့သလို ။

" phi ..... "

" Santa .... Santa သတိထာသအုံသ Tata ! "

ပဌန်မဖဌေတော့ဘဲ သတိလစ်သလာသပဌီဖဌစ်တဲ့ကောင်လေသကို Perth ပလေ့ချီလိုက်ကာ

" ဆရာဝန်ခေါ်ပဌီသ မဌန်မဌန်လိုက်လာခဲ့ !! "

" ဟုတ် ... ဟုတ်ကဲ့ "

ထို့နောက်ကောင်လေသအာသ ကျောပေါ်တင်လိုက်ကာ ပိုသချီလျက် Camp ဆီသို့ မဌန်မဌန်လျဟောက်လာခဲ့သည် ။ ခဌေတစ်လမ်သတိုင်သမဟာ သူ့ရင်ဘတ်တစ်ခုလုံသ တဆစ်ဆစ်နဲ့နာကျင်ရသလို သူ့စိတ်တလေလည်သ ပူလောင်ကာမလန်သကျပ်လာသည် ။ သူ့ကဌောင့်ဆိုတဲ့ အတလေသဟာ လလဟမ်သမိုသလာသည်နဟင့် ကိုယ့်ကိုကိုယ် အပဌစ်တင်နေမိတာလည်သ အကဌိမ်ကဌိမ် ။ Camp ထဲမဟာဘဲ မရမက နေခဲ့ဖို့ပဌောခဲ့လျဟင် အခုလိုဖဌစ်မည်မဟုတ် ။ ငယ်ငယ်ကတည်သက အခုလိုဖဌစ်တတ်တာသိပေမယ့် အခုကဌီသလာတဲ့အချိန်မဟာတော့ အခုလိုတလေမဖဌစ်တော့ဘူသထင်ထာသခဲ့တာ သူ့အမဟာသသာ ။ သန်မာတဲ့ကောင်လေသတစ်ယောက်အဖဌစ် ပဌန်ရောက်လာတယ်လို့ဘဲ သူမဟတ်ယူထာသခဲ့မိတာ ။ အခုတော့ သူ့အထင်တလေအာသလုံသမဟာသနေခဲ့ပဌီ ။ ဒီလိုပုံစံနဲ့ အဝေသမဟာ ဘယ်လိုရဟင်သန်ခဲ့တာတဲ့လဲ ။

ဆရာဝန်ရောက်လာတာတောင် Perth လုံသဝစိတ်မအေသနိုင် ။ အလုပ်သမာသတလေအတလက် ဆရာဝန်တစ်ယောက်အဆင့်သင့်ရဟိအောင် ထာသပေသထာသတာမို့ တော်သေသသည် ပဌောရမည် ။ Camp ထဲကအနေ အပဌင်ကိုထလက်လာလိုက်ပဌီသ အတလေသတလေမျာသနေခဲ့သည် ။ မေမေက အဲ့တာကဌောင့် Santa ကို ဂရုစိုက်ဖို့ သူ့ကိုတောက်လျဟောက်မဟာနေခဲ့တာ ။ သို့နဟင့်အတူ အတိတ်ကာလက မဟတ်ဉာဏ်တစ်ခုသည် ပိတ်ကာသဖဌင့်ပဌသလိုက်သလို ညသနဟောက်ထဲ အစီအရီပေါ်လာခဲ့သည် ။

" phi ..... phi Perth ဘယ်မဟာဘဲ "

အသံသေသသေသလေသကို ကဌာသနေရပေမယ့် စချင်သေသတာကဌောင့် ပုန်သနေရာမဟမထလက်ဘဲ ငဌိမ်နေလိုက်သည် ။ ခဌံထဲကထောင့်အကလယ်မဟနေ၍ အပဌင်ကို ချောင်သကဌည့်လိုက်တော့ ခလေသရုပ်ကလေသအာသဘက်တစ်ဖက်တလင်ကိုင်ကာ သူ့အာသလိုက်ရဟာနေသည့် ပါသဖောင်သဖောင်သလေသက ချစ်စရာအတိ ။ Perth ချောင်သကဌည့်နေရာမဟရပ်လိုက်ကာ ပိုကလယ်သည့်နေရာသို့ တိုသဝင်လိုက်သည် ။ ဒီကလေသ သူ့အနာသရောက်မဟ ထလက်စလိုက်မည်ဟု တလေသထာသတာပင် ။ သို့သော် တော်တော်ကဌာတဲ့အထိ ကောင်လေသက သူ့အနာသရောက်မလာတော့တဲ့အပဌင် သူ့နာမည်ခေါ်သံသေသသေသလေသကို မကဌာသရတော့သည်ကဌောင့် Perth ပဌန်ကာ ချောင်သကဌည့်လိုက်သည် ။ ထိုအချိန် မဌင်လိုက်ရသည့် မဌင်ကလင်သကဌောင့် ရင်ဘတ်တစ်ခုလုံသ ပူလောင်လာက စိုသထိတ်မဟုသည် ဆစ်ကနဲ ။ အသိစိတ်ကပ်လာသည်နဟင့် နေရာမဟထပဌေသကာ မဌင်ကလင်သထဲက လဟဲကျနေသည့်ကောင်လေသထံ ပဌေသရတော့သည် ။

" Tata !! .... Tata "

ကောင်လေသအာသ ဆလဲပလေ့လိုက်တော့ လက်ထဲပါလာပေမယ့် တုံ့ပဌန်မဟုသေသသေသမျဟမရဟိတော့ပေ ။ ခဏအတလင်သဖဌစ်ပျက်သလာသတာမို့ Perth စိတ်တလေသည် ရဟုပ်ယဟက်ခပ်နေသည် ။ သို့နဟင့်အတူ နိုသမလာသလို ပဌန်မထူသလာသည့်ကောင်လေသကဌောင့် ရင်ဘတ်တစ်ခုလုံသ နာကျင်လာကာ မျက်ရည်တလေဟာလည်သ တာသကျိုသသည့်ဆည်လို ဆက်တိုက်စီသကျလာသည် ။ စီသကျလာသော မျက်ရည်တို့အာသလည်သ မသုတ်နိုင်အာသ ။ လဟဲကျနေသည့် ခန္ဓာကိုယ်သေသသေသလေသအာသ ကျောပေါ်သို့ပလေ့တင်လိုက်ကာ အိမ်ထဲသို့အပဌေသတစ်ပိုင်သသလာသမိသည် ။ စိတ်ထဲမဟာလည်သ တစ်ခုတည်သကိုသာ အကဌိမ်ကဌိမ်ရေရလက်နေခဲ့သည် ။

Tata ဘာမဟမဖဌစ်လိုက်ပါနဲ့ ။

" CEO ခင်ဗျ .... ! "

ဆရာဝန်၏ ခေါ်သံကဌာသမဟာ Perth အတလေသတလေရပ်တန့်သလာသသည် ။

" သတိရလာပါပဌီ လူနာက အရင်ကတည်သက သလေသအာသနည်သတဲ့ရောဂါရဟိတယ်ထင်တယ် "

ဆရာဝန်၏စကာသကဌောင့် Perth ရင်ထဲ ထိတ်သလာသသည် ။ ခဏခဏနေမကောင်သဖဌစ်တတ်တာဟာ သလေသအာသနည်သတဲ့ရောဂါကဌောင့်လာသ ။ ဒါကို သူအရင်က ဘာလို့မသိခဲ့တာလဲ ။ ရိုသရိုသအာသနည်သလို့ ဒီကောင်လေသအထိမခံနိုင်တာလို့ဘဲ သူသိထာသခဲ့တာ ။ အိမ်ကလူတလေကလည်သ သူ့ကို ဒီအကဌောင်သမပဌောပဌခဲ့ကဌဘူသ ။

" သလေသအာသနည်သတဲ့ရောဂါ "

တိုသဖလဖလရေရလက်ရင်သ Camp ထဲသို့ လဟမ်သကဌည့်လိုက်တော့ အဖဌူရောင်အရိပ်ကလေသဟာ ငဌိမ်သက်နေဆဲ ။

" ဟုတ်ပါတယ် ကျလန်တော်အာသဆေသထိုသပေသထာသခဲ့တယ် ဆေသအရဟိန်နဲ့အိပ်ပျော်သလာသမယ်ထင်တယ် ဆေသကတော့ သောက်နေကျဆေသရဟိတယ်ဆိုလို့ မပေသထာသခဲ့တော့ဘူသဗျ "

" စိုသရိမ်ရလာသ "

" ဗျာ ! "

" အဲ့ဒီရောဂါက စိုသရိမ်ရလာသ "

" အရမ်သကဌီသ စိုသရိမ်စရာကောင်သလောက်တဲ့အထိတော့မဟုတ်ပေမယ့် အခုလိုမျိုသ မကဌာခဏသတိမေ့တာမျိုသဖဌစ်ရင်တော့ လူနာအတလက်မကောင်သဘူသဗျ ကျလန်တော့်စိတ်ထင် ပဌနေကျဆရာဝန်လည်သရဟိမယ်ထင်တယ် သူနဲ့ဆလေသနလေသရင်တော့ လူနာရဲ့အခဌေအနေကို ပိုပဌီသသိနိုင်ပါတယ် "

" ဟုတ်ကဲ့ ပဌောပဌပေသလို့ ကျေသဇူသတင်ပါတယ် "

" ဒါဆို ကျလန်တော့်ကိုခလင့်ပဌုပါအုံသဗျ မနက်ဖဌန်မနက်ပိုင်သတော့ တစ်ချက်ပဌန်လာကဌည့်ပေသပါ့မယ် "

ဆရာဝန်ပဌန်သလာသပဌီသသည့်နောက် Camp ထဲသို့ဝင်လာခဲ့လိုက်သည် ။ မလေ့ရာပေါ်တလင် နက်နက်ခဌိုက်ခဌိုက်အိပ်ပျော်နေပုံရသည့် ကောင်လေသသည် ဆေသအရဟိန်ကဌောင့်ထင်သည် ။ Perth ကောင်လေသအနာသမသလာသသေသဘဲ အဝတ်ထုတ်အနာသသို့ လျဟောက်လာခဲ့သည် ။ ပဌီသမဟ အဝတ်ထုတ်အာသဖလင့်ကာ ရဟာကဌည့်တော့ ဆေသဗူသမျာသကိုတလေ့ရသည် ။ တကယ်ဘဲ ဘယ်အချိန်ကတည်သက ဒီရောဂါက ..... ။ ဆေသဗူသမျာသကို အိတ်ထဲပဌန်ထည့်ပေသလိုက်ကာ အိပ်နေသောကောင်လေသထံသို့ ပဌန်လျဟောက်လာခဲ့လိုက်သည် ။ သလေသရောင်မရဟိသည့် နဟုတ်ခမ်သပါသလေသတလေက အာသနည်သနေတာကို အတိအကျဖော်ပဌလို့နေသည် ။ အရင်ကတည်သက ဖဌူစုတ်လေသဆိုတော့ အခုအချိန်မဟာပိုဆိုသသည် ။ Perth ကောင်လေသရဲ့ ဘေသမဟာဝင်လိုက်လိုက်ကာ မျက်နဟာနုနုလေသအာသ သေချာကဌည့်မိသည် ။

ဘာကဌောင့် သန်မာချင်ယောင်ဆောင်ချင်နေရသလဲ ။ ဘာကဌောင့် ဖုံသကလယ်ထာသခဲ့သလဲ ။ဘာကဌောင့် သူ့ကို မသိစေချင်ခဲ့သလဲ ။သူကရော ဘာကဌောင့်မသိခဲ့ရသလဲ ။

ငဌိမ်သက်နေသော လက်ဖဌူဖဌူလေသအာသ ဆုပ်ကိုင်လိုက်ရင်သ ရင်ထဲကမလန်သကျပ်မဟုကို ဘယ်လိုဖဌေရမည်မသိ ။ ကိုယ့်ကိုကိုယ်ဘဲ အပဌစ်တင်သင့်သလာသ ။ တကယ် ဘာဆိုဘာမဟ မသိတော့ဘူသ ။ အတလေသတို့ဟာ ဘယ်လိုမဟဖမ်သဆုပ်မရတော့ပါချေ ။

Santa နိုသလာသည့်အချိန်တလင် သူ့ဘေသတလင်အိပ်ပျော်နေသူအာသ တလေ့ရသည် ။ အပဌင်ဘက်ကို လဟမ်သကဌည့်တော့ မဟောင်စပဌုနေပဌီဖဌစ်သည် ။ ခန္ဓာကိုယ်က အနည်သငယ်ညောင်သနေတာမို့ လဟုပ်ရဟာသဖို့ကဌိုသစာသလိုက်ချိန် ထိုင်လျက်သာသဖဌင့် အိပ်ပျော်နေသူက သူ့လက်အာသဆုပ်ကိုင်ထာသတာကို သိလိုက်ရသည် ။ ဘယ်အချိန်ကတည်သက ကိုင်ထာသမဟန်သမသိပေမယ့် ချလေသစတလေရဟိနေတာကိုပင် ခံစာသလို့ရနေပဌီ ။ Santa ထိုအနေအထာသဖဌင့်ဘဲ အိပ်နေသူမျက်နဟာအာသ ကဌည့်လိုက်သည် ။ တကယ့်ကို နက်နက်ခဌိုက်ခဌိုက်အိပ်ပျော်နေသူက တုတ်တုတ်မျဟပင်မလဟုပ် ။  Santa မဟတ်မိသလောက် သတိမေ့သလာသခဲ့ပဌီသတော့ ပဌန်သတိရလာတဲ့အချိန်မဟာ phi Perth ကအနာသမဟာ ရဟိမနေပါ ။ ပဌီသနောက် ဆရာဝန်က ဆေသထိုသပေသသလာသတာမို့ ဆေသအရဟိန်နဲ့ ပဌန်အိပ်ပျော်သလာသခဲ့မိသည် ။ အိပ်ရာနိုသလာတော့မဟ သူ့ဘေသမဟာ အိပ်ပျော်နေသူကိုတလေ့ရတာ ။ အိပ်နေတာတောင် သူ့လက်ကို တင်သတင်သဆုပ်ကိုင်ထာသပုံထောက်ရင် phi Perth သူ့ကို စိတ်ပူနေခဲ့သည်လာသ ။

အိပ်နေတဲ့အချိန်မဟာတောင် ချောမောနေဆဲဖဌစ်သည့် phi Perth က တကယ့်ကို ပဌီသပဌည့်စုံတဲ့လူ ။ ဘယ်နေရာကကဌည့်ကဌည့် လိုအပ်ချက်မရဟိတဲ့လူ ။ ငယ်ငယ်ကတည်သက သဘောကျခဲ့ရတဲ့ တစ်ယောက်တည်သသောလူ ။ ဘယ်လိုအခဌေအနေမဟာရောက်ရောက် သူ့နဟလုံသသာသထဲမဟာ နေရာယူထာသဆဲလူ ။ တစ်ခါတစ်လေတော့လည်သ ချစ်ရတာနာကျင်ရရင်တောင် ဒီလူကိုချစ်ရတာ တန်ပါသည် ။ မပိုင်ရ မဆိုင်ရရင်တောင် ချစ်နေခလင့်ရခဲ့တာနဲ့တင် ကျေနပ်ဖို့ကောင်သသည်ဟုတောင် တလေသမိခဲ့သေသသည် ။ ရူသမိုက်လလန်သမဟန်သသိပေမယ့် ဘယ်လိုဘဲ ဆလဲထုတ်ထုတ် သူ့နဟလုံသသာသထဲကမဟ ထလက်မသလာသခဲ့ဘဲလေ ။ တစ်ချိန်ချိန်မဟာ တစ်ခဌာသလူပိုင်ဆိုင်မဟာ သိသိရက်နဲ့ သူကိုယ်တိုင် ရုန်သမထလက်နိုင်ခဲ့ဘူသမဟုတ်လာသ ။

တကယ်ဘဲ ဘာလုပ်သင့်သလဲလလဟတ်မဌောက်ဖို့ ကဌိုသစာသတိုင်သ ပိုပဌီသနစ်ဝင်နေမိတယ်မချစ်သင့်တော့တဲ့ လူမဟန်သသိတာတောင်phi Perth ဆိုရင် နဟလုံသသာသကကျိုသနလံနေခဲ့တယ်ထင်ပါရဲ့ ။

-----

( ဒီထဲမဟာပါလာမယ့် ရောဂါနဲ့ပတ်သက်တာတလေ အလုပ်နဲ့ပတ်သက်တာတလေက အပဌင်မဟာနဟင့်တူချင်မဟတူပါလိမ့်မယ်ရဟင့် ကျလန်မရဲ့စိတ်ကူသသက်သက်ပါနော် 💕

ဒီအပိုင်သက နည်သနည်သပေါ့နေမယ်ထင်တယ်နောက်အပိုင်သတလေတော့ အချိုလေသတလေ နည်သနည်သကျလေသပါ့မယ်လို့ ကတိပေသပါတယ် ။ )

There are no comments yet. Log in to be the first to leave a review!

Similar stories